【iTRIAL美評】fresh紅茶緊緻眼部精華幫我對眼抗衰老咁勁?

Text and Photo: Jacob媽媽 (IG: cjoycec)

fresh 紅茶緊緻亮采眼部精華

價錢：$660 / 15ml
產品類型：眼部精華
賣點：蘊含紅茶酵素、紅茶萃取、荔枝籽精華及黑莓葉萃取，具備強效抗氧化功能，有助保護、軟化及平滑肌膚，防止糖化老化，令肌膚細嫩飽滿，同時紓緩肌膚。雙效眼周塑形胜肽有助撫平及縮細眼袋，令輪廓更細緻。杞子果實萃取及宇治茶萃取能提升肌膚緊致度，保持膚質年輕富彈性，並能鎮靜紓緩肌膚。

fresh紅茶緊緻眼部精華實測

質地：

因為眼部嘅產品份量一般特別少而貴，所以我用eye serum/cream 最驚一唧就唧出爆多份量，嗰下真係好心痛。超開心呢款唧頭設計一按就差不多等於一雙眼嘅份量，如果想再多D 用嚟按摩眼周就唧多下，份量剛剛好。

其次，佢個味超舒服呀! 佢係茶香加少少荔枝味，清香入鼻，淨係聞個味都feel 到嗰種天然程度，唔似某D 產品一大陣香料或者直頭臭臭地化學味。

易推度：

5分
最重要及最適合我嘅，就係佢啫喱嘅質地好輕薄、好易推。佢可以幫眼周肌膚補水之餘，唔使擔心引起油脂粒。我有試過其他質地比較豐潤嘅cream 狀，好lup 同會出粒粒。而且因為佢係啫喱狀易吸收，我朝早化妝，D 粉都唔會卡住喺眼周。

保濕度 ：

5分

睇嚟我皮膚真係沙漠，上次個測試一開始係25%，今次測試又係25%。用完水份爆升咗一倍！保濕度好夠。眼周如果乾，細紋就會更加明顯 (所以我上妝前用佢就可以減淡D 紋，望落對眼有神D)。

去紋度：

5分

好後侮後生時我無乜用過眼部精華，導致30歲未到眼底已經有5-6 條明顯嘅紋。上半圖可見我只要微微笑，眼底紋就出晒嚟，下半圖為我持續用咗三星期後嘅效果。我盡量用同樣燈光及表情希望做到比較，可以見到三星期後仍然有2-3 條細紋，但係有幾條明顯嘅紋已經唔太覺眼，而且緊致咗。眼部細紋要預防相對容易，要改善係非常困難，基本上用一支Eye Serum 可以力保不失已經好勁，今次可以做到呢個效果好驚喜同振奮。

總評:

4.5分

由產品設計到質地我都好滿意，最後效果更加出人意表。但因為我略嫌佢唔太幫到我一起身對浮屍眼，所以扣咗半粒星。最後想分享下搽上眼嘅手法，因為手法錯咗搽幾多嘢都無用！正確手法應該係用無名指點塗式咁搽喺眼周皮膚，需要順住同一個方向輕輕點拍 / 按至吸收，去到眼尾可以稍稍往上做提拉。因為眼部肌膚非常薄嫩，千萬唔好做拉扯或大力推嘅動作，咁樣反而容易形成紋路。