【粉底液】慳家Hourglass Vanish無痕修飾粉底液 真係半泵就夠？| iTRIAL美評
之前聽過 Hourglass，都係話佢coverage 好又或者係 cruely-free（非動物測試），但係就冇聽過有人話佢慳家。而且佢放得喺連卡佛，大家都唔會將佢同「平」呀，「抵用」呀呢啲字眼掛勾。但佢最近出嘅呢隻Vanish 無痕首飾粉底液就聲稱唔只遮瑕度高，而且淨係用半泵就足夠化晒全面。但係粉底嘅嘢唔試過就永遠唔知，如果真係咁襟用，咁年中咪慳唔少？TRIAL美評立即為大家送上美評試用報告！
Text: 趕時間OL – Winni (IG: Melbowinni) | Editor: Tiffany Ng | Video & Photo: Q | Video Editor: Katie & Fai
實測影片:Hourglass Vanish Seamless Finish Liquid Foundation無痕修飾粉底液
順帶一提，官方都有suggest最好配埋佢支燈系列嘅掃（Vanish 無痕修飾粉底刷），聲稱遮瑕效果會更好。其實我自己就好少用粉底掃，因為一來好食粉，而且好易有粉痕。不過既然官方咁樣建議，我就美妝蛋同埋個掃兩樣試啦。
Hourglass Vanish Seamless Finish Liquid Foundation無痕修飾粉底液
價錢：$500/25ml
平均價錢：$20/1ml
產品類型：粉底液
賣點：只需1/2泵粉底液，濃縮配方能徹底修飾肌膚，創新輕盈的粉底配方猶如第二層肌膚，24小時持久配方，可全日保持完美妝容，而且採用了防水防汗配方，不會引起粉刺。
詳細實測:Hourglass Vanish Seamless Finish Liquid Foundation
利申： 我係超級超級乾皮人，夏天開埋冷氣嘅話會乾到變混合性肌膚嗰隻乾。所以我第一樣要睇嘅就係佢嘅水潤度。
水潤度：
3.5 分
對於遮瑕度高嘅粉底，其實我都唔會要求太多。睇佢唧出嚟嘅質地係偏杰，你話好水潤就唔會架啦，但一日落嚟又無覺得乾，我已經無投訴。
遮瑕度：
4分
一上面泛紅位已經無晒，黑眼圈都遮得七七八八。
性價比：
5分
一開始無諗咁多，一野隊咗支掃落啲粉底到……正確做法係應該用手指將粉底喺塊面輕輕點開，再用支掃或者美妝蛋平均掃開。粉底液嘅延展性出奇地高，真心用半泵就搞掂。呢支嘢我應該可以用到明年今日。
化妝掃柔軟度：
4分
啱啱講過平時我唔鍾意用掃，但係呢枝掃真係唔錯。好軟又唔拮面，重點係無粉痕！用掃上個妝感亦都細緻啲，唔錯！
總評:
4分
佢真係做到佢標榜嘅高遮瑕同半泵就夠。乾皮人如我就要睇皮膚狀況取捨啦，如果要水潤透薄但又要好遮瑕，就好似要搵一個又靚仔又專一嘅男朋友一樣……唔敢話無，難啲掛（好似係）。
P.S. 我用嘅係色號係#Shell，係一隻中性自然嘅淺膚色。Vanish 成個系列其實有16隻色，冷暖色調都有，曬黑咗都唔驚搵唔啱。
