速遊東京都心 賞櫻 打卡熱點

Text | 今日七七子
Edit | Avis

睇得櫻花嚟又少左兩日行街購物？未必！其實東京都心亦有唔少人氣 賞櫻 打卡位，新宿、目黑、上野、SKYTREE等，一早起身賞櫻食早餐再直落行街零難度！

2016年日本網站嚴選東京10大賞櫻場所，第一位由充滿個性小店和餐廳的目黑川奪得。4公里長的目黑川兩岸800棵櫻花樹，滿開時有如一條櫻花河隧道。由JR 目黑站落車徒步到東急中目黑站全程約30分鐘是櫻花開得最燦爛的一段路，行到仲可以在河畔餐廳或cafe 邊吃邊賞。中目黑櫻花祭（至四月初）舉行期間更有夜櫻觀賞，打晒Spotlight 十分浪漫。

中目黑（目黑川）
交通：中目黑站徒步3分鐘或
目黑站徒步5分鐘
入場：免費

另一心水之選就是臨近Skytree 的隅田公園，約有1公里長的櫻花道，最大賣點是有河道和日本第一高的Skytree 做背景。今日至4月10日期間Skytree 舉行空中賞櫻活動，夜間塔身會展現櫻花顏色，幻化成巨大櫻花樹，而塔內展館又設有櫻花展望台，讓大家空中尋找東京櫻花處，最後當然要順便逛逛Solamachi 商場買櫻花手信先好返歸。

隅田公園
交通：淺草站徒步5分鐘
入場：免費

東京SKYTREE Tower
櫻花活動：即日至4月10
交通：東武SKYTREE 站或押上站

十大之中免費入場賞櫻公園中，井之頭恩賜公園、上野恩賜公園算是遊客的兩大至愛。位於平價學生區吉祥寺的井之頭公園有500多棵櫻花樹，不少賞花客會租天鵝船暢游池塘拍櫻花照。

井之頭恩賜公園
交通：吉祥寺站徒步5分鐘
入場：免費

至於上野恩賜公園是東京人最愛的賞櫻派對據點，人人摸黑霸好位，帶備小食啤酒坐足一日。掛住霸位忘記帶食物？公園出口沿路有大量「屋台」（大排檔），章魚燒、炒麵、大阪燒等應該夠大家飽到上心口！是重要一環。

上野恩賜公園
交通：上野站徒步2分鐘
入場：免費