藍花 VS 櫻花！東京近郊「花」聲四起

Text | 今日七七子
Edit | Avis

相信大家前陣子在Facebook都被櫻花洗版，內心極度葡萄既同時，隻手忍唔住又click出來羨慕下，認真陰公豬！其實日本春天剛剛開始，櫻花洗禮過後，其他春夏小花亦陸續滿開，由東京出發只需一、兩小時車程，便可以即日來回花花世界，今次嚴選兩個4月中至5月尾盛開嘅花海俾大家。

茨城藍花
經過一輪粉紅熱，不如換片藍花海去刺激下視覺！

由東京站八重洲南口出發，乘坐約2小時巴士去到位於茨城的國營海濱公園（国営ひたち海浜公園）一睹藍花風采。

國營海濱公園面積約為20公頃，共分成6個園區，而藍花就在みはらし園區，由門口步行約10-15分鐘就到。

遠遠已看到小山丘上佈滿 藍花 ，由低位拍攝感覺更為濃密。

本人腳骨力麻麻，所以俾￥500構買園內小火車一日券坐車去賞花之餘，順道欣賞沿路風景。

園內設有周遊小火車，行走6大園區，一日也只是￥500。

其實藍花真名是粉蝶花，約4月中至5月中盛開。架車未駛入園區已經見到一個藍色山頭與藍天連成一色，落車沿路登上小山坡，左右都充滿一片藍海，感覺治癒！由山腳上到山頂短短10分鐘，可以不同視角欣賞花海，低抄、高眺、近距離微拍零難度，唯一問題就係賞花者太多，大家想影靚相應要就下角度喇。

如遇上藍天白雲， 藍花 跟天空化成一色。

藍花其實是一朵又一朵藍白小花，名為粉蝶花。

而山下開設了小食亭，約在6、7檔如拉麵，熱狗，雪糕等小食，登小山丘過後亦唔怕肚親。如果時間充裕，可乘坐小火車遊園一周，看看其他園區，如草原園區或樹林園區等。

每個園區內亦設有飲食攤檔。

国営ひたち海浜公園
開園時間：9:30 － 17:00 （逢星期一休息）
入場費：大人￥410 小童￥80 （火車一日券500)
交通：東京站乘巴士到公園入口約2小時，或於JR勝田站東口2號巴士站轉乘茨城交通巴士到公園南口
網址：http://hitachikaihin.jp/

藍花花期：即日至5月15日（目前為開花3-5分）

富士山芝櫻
富士山山腳，臨近5月才是櫻花滿開的季節，跟平常樹形櫻花有別，貼近地面生長的灌木類櫻花，名為「芝櫻」。芝櫻約4月尾5月頭開始盛放，可維持約2至3星期之久，加上品種繁多，粉紅色及白色等小花打造密集花海，難怪有「粉紅地毯」的美譽。

每逢一年一度富士芝櫻祭，園內約80萬棵芝櫻盛放場面，加上富士山做背景，都吸引成千上萬賞花客到訪！

好天時可看到雪頂富士山，加上腳下的粉紅地毯，是一張完美景相。

以芝櫻打造的迷你小富士山，吸引不少女士合照留念。

芝櫻祭舉行期間，有關方面會加開芝櫻LINER接送大家，由河口湖站乘坐這限定巴士，約30分鐘便到達會場。

場內除了芝櫻花路之外，特設富士美食大會、展望足湯、展望CAFE、展望台及迷你芝櫻富士山等，讓大家一嘗富士山鄰近地方的美食，當中最出名的就是富士官炒麵及富士山魚餅，比起花畑，美食檔人龍更為鼎盛。

可愛得很的富士山魚餅，多數被人拿來合照一番先食落肚。

富士芝櫻祭屬一年一度盛事，不是知名富士小食都會到場開檔。

如果想影靚相，記得登上特設展望台，前景是迷你芝櫻富士山，中距離是一片粉紅花海，而大背景則是可遇不可求的雪頂富士山，影完記得要立即SHARE俾朋友羨慕下！

因芝櫻會場較為平坦，場內特設展望台讓大家高抄一番，記得排隊拍照。

去賞芝櫻，當然不要錯過一天熱賣超過500個的櫻葉餅作伴手禮。

也有芝櫻祭限定的櫻花味薯片。
2016富士芝櫻祭
舉行日子：即日至5月29日
開園時間：8：00 － 17:00
入場費：大人￥600 小童￥250
交通：河口湖站轉乘芝櫻Liner或由新宿乖直行芝櫻Liner前往（約2.5小時）
網址：http://www.shibazakura.jp/chs/

延伸閱讀：
▲ 遠觀不如擁有的櫻花色潮物 http://goo.gl/DSEro1
▲ 坐係屋企賞櫻 原顆櫻花花蕾茶包 http://goo.gl/w7kTET

如欲率先接收資訊，請讚好我們的FB專頁並於「已讚好」選單設定「搶先看」，多謝支持。

More Facebook: https://www.facebook.com/morehk.hk