掃葵涌廣場13必食 超靚「生日蛋糕」雪條

Text|Carrie Photo|Clay Lam
專程假期紅日去葵涌廣場掃街試食，就係要感受人頭湧湧的葵廣「食力」，街頭美食當然係主打，不過shopping得耐都想坐低抖吓，唔想同大媽爭長櫈坐，原來小餐廳都有好多抵食選擇，響葵廣真係可以食足一日！
01 超人氣！松露軟雪糕$25
千祈咪諗多！呢杯雪糕所講的松露(Truffle)應該不是價錢媲美黃金的黑松露，食晒成杯都唔覺有黑松露味，佢應該係指Truffle Chocolate(朱古力的一種)。因為主打係朱古力雪糕，好多人就拎佢同Godiva比，雖則朱古力冇咁濃，不過幼滑感覺卻更勝一籌，綑咗果仁邊的威化筒好香脆，$25杯性價比計係超值。

02紅果雪糕 $25
將士多啤梨以真空脫水技術變成乾果再打成細粒，灑在雪糕上做toppings，味道酸甜，中和咗雪糕甜味，不過略嫌份量不夠多。

Kiss Ice-cream

地址：葵涌廣場3樓85A店

03 時令登場 紫薯奶黃鐵塔窩夫 $22

Haru & P lolly waffles 不斷推出新口味，最新時令之選當然係奶黃系列喇！睇咗十分鐘，最多人買係紫薯奶黃鐵塔窩夫($22)，八吋長的鐵塔窩夫，唧滿咗紫薯後已冇法打直豎起，紫薯夠熱香噴噴，紫薯味重令奶黃味唔突出，不過已經好好食！

04 其貌不揚明太子牛角包 $28
從店員手上拎到時已是紙袋包裝，打開已經係變晒形，賣相絕不討好，不過咬咗一啖睇法完全唔同晒，明太子味道好突出但唔會多到有腥味，醬汁多而唔覺膩，牛角包凍咗都唔會出晒油，下午茶食最開心。

Haru & P

葵涌廣場2樓C07店

NextPage>>葵廣最新手工雪條登場，非睇不可！

05 「生日蛋糕」雪條 ＄38
最近熱捧就是新開的手工雪條Smiley Popsicles，廿呎小店一個雪櫃就做生意，響葵廣可以索價$26至$38一支雪條，難怪假期都冇排長龍，不過佢貨亦唔多，我哋想揀最靚最大支的3D叫「生日蛋糕」雪條($38)，店員話今日返得八支，剛剛賣晒！店員話每日每款番的量都唔同，要買就趁早！
當日買最後一條「生日蛋糕」($38)的女士好慷慨咁食咗一半都俾我哋影張相，佢話味道唔錯，賣相真係一流。

06Pineapple and Passion Fruit $28
菠蘿味超香，士多啤梨乾果做裝飾，令人懷緬士多冰菠蘿。

07 Mango Chilli $28
芒果味雪糕好香甜，面有層薄薄辣椒粉，是完全沒辣味的噱頭嘢，雪條尖有椰絲朱古力，帶來香脆口感。

Smiley Popsicles
葵涌廣場3樓141店

Next Page>抵食夾大件Pancake!

08 抵！木糠焦糖班戟$25

能夠屹立多年(現場街坊說保守估計都有十年，店員答唔知)絕對唔簡單，又一班戟舖面已經殘殘舊舊，但人龍亦依舊，相信抵食夾大件係最大原因，新推出嘅木糠焦糖班戟($25) ，兩個自選雪糕球，加埋大量忌廉，仲有木糠同焦糖淋面，咬開時焦糖有拉絲，加埋鬆軟木糠，唔稱得上係絕頂好味，但份量絕對係填補甜品心靈的滿足。

09 鴨胸蜜桃班戟$25
班戟烘得香脆，煙鴨胸、蜜桃同生菜一鹹一甜味道好夾，份量大到可以當一餐lunch！

又一戟
葵涌廣場3樓( Kiss Ice-cream 隔離)

NextPage>>想坐低食好少少，都有好介紹！

10 $38 泰式雞扒漢堡下午茶餐
行咗成日街，唔想企響度食嘢！想坐低又想平靚正都有選擇，開咗剛好一年的Homemade Pizza冇跌watt，仲不時有新登場，心水推介有泰式雞扒漢堡下午茶餐，即叫即做，雞扒酥炸咗都仲juicy，淋埋泰式酸甜汁做漢堡，不得不讚係麵包既質素，鬆軟有包香，配埋炸薯角同Lemonade，$38坐低慢慢食，仲想點？

11 穀飼牛漢堡下午茶餐$43
食得出塊牛肉係上品，配埋醬汁同生菜，響中環食的話起碼要$88！

12 招牌「老墨」Pizza 下午茶餐$38
厚底Pizza香口配番茄芝士肉碎等配料，份量輕盈點，可以保留實力出去再「掃街」！

Homemade Pizza
葵涌廣場2樓C06店

Next Page> 喜歡食韓國菜的不可以錯過下頁！

13 首爾街坊味道 韓藝餐
唔係得葵芳OL帶路，完全搵唔到呢間韓國小餐廳，又是大廚又是收銀又是侍應嘅韓籍大叔，加埋隔籬枱都坐住個正宗Oppa，就知呢度幾咁韓國地道風味！Lunch嗜辣推介海鮮豆腐湯($68)送白飯，份量超大，叫多個香口杯炸雞($26)，兩個OL夠有凸！

同場推介：外賣叫紫菜包飯即係飯卷($30)切出嚟足八件，抵食夾大件！

正宗韓式Bibimbap拌飯($48)，叫多樣小食，兩個女生Share最抵！

藝餐
葵涌廣場1樓21店

葵涌廣場
地址：新界葵涌葵富路7至11號 (葵芳港鐵站)

延伸閱讀

▲試食！長沙灣名人飯堂親民版TANG2

HTTP://GOO.GL/09GI3N

▲酒店級日菜下午茶自助餐 印COUPON有75折

HTTP://GOO.GL/DAKRXG

如欲率先接收資訊，請讚好我們的FB專頁並於「已讚好」選單設定「搶先看」，多謝支持。
More Facebook :https://www.facebook.com/morehk.hk