葵涌廣場新食力

Text |Carrie

葵涌廣場向來都是掃街天堂，愛吃的久不久都想去「巡視業務」看看有甚麼新登場，今次來到發現有兩新店進駐之外，還有老店推陳出新有新美食，一於來葵廣置裝換季，同時試試各式新口味。

大阪一拓餅

大阪一夠膽殺入「掃街少林寺」怎可沒有驚天動地招牌美食，他們引入了日本「拓餅」，拓餅是日本以海灘和滑浪見稱的鐮倉江之島傳統小食，原件餅大過一張A3紙，味道就像我們由小食到大的「脆脆蝦餅」，但勝在老闆特別引入平板壓機，即叫即做，仲有口味揀，可以加原隻烏賊、木魚及海老(蝦)三款口味，同即做「卡樂b薯片」一樣，新鮮的真係脆口好多，幾十蚊有交易，值得一試。

烏賊拓餅($40)

明顯見到原隻魷魚在餅的中央，壓平後有咬口又不會太靭，和餅身的香脆更夾，餅亦會像脆脆蝦餅般黐唇和「乸喉」，咁大塊四個姊妹，每人夾十蚊買都有排食。

即叫即造，雖然人多時差不多等半個鐘，但入微暖鬆脆，也是值得的。

估計有10張廿蚊紙咁大，冇花冇假。

大阪燒($22)

好失望，跟日本原裝的大阪相差極遠，首先粉太多菜太少，材料太少不夠香口，仲要是早早煎好，有客人叫才番煎，內裏已變得太乾，如只求飽肚的話，$22大大份就絕對滿足。

雖然味道普通，但有個靚靚盒裝住，呃到人。

大阪一

地址：葵涌廣場3樓33-36號店

繼光香香雞

雖然是一間台式連鎖店，不過來到葵廣這個掃街場依然可以大排長龍，原來不少炸雞迷都話他們是最好食的炸雞，比韓式炸雞，他們細細件方便拿着通街食，因為雞粒已去皮，相對就沒這麼油膩，配埋清熱桂香酸梅湯，即使吃晒整包炸雞，也不怕會生暗瘡。

開放式廚房，小份量不停手炸，確保新鮮香脆。

香香炸雞($26)

沒有誇張的台式香料味，難得小巧雞粒炸得香口但仍保留肉汁，討人歡心。

蒜脆杏鮑菇($24)

估計是先將杏鮑菇氽水才炸，香口惹味，正如店員的溫韾提示，要即買即吃，因為杏鮑菇多汁，容易令脆皮變腍。

桂香酸梅湯($14)

有梅味不太甜，多了點桂花香，解膩效果很好。

繼光香香雞

地址：葵涌廣場3樓303A號店

東門町新推紫薯手抓餅($15+$7肉鬆)

東門町的酸辣粉相信是不少葵涌OL同中學生的午餐和下午茶的心水選，不過一成不變怎留嘴刁客人，近期他們熱賣的小食是紫薯手抓餅。紫薯是近期人氣食材，加入手抓餅令餅身更香糯，可以加入不同的Toppings，更惹味，當然都是吃得一手油淋淋，但如果手抓變得乾身如薄餅皮，相信請你也不吃。

一口蘿蔔糕($13)

見到不少學生來都買「一口蘿蔔糕」，原來只是$13姑且一試，細細顆半煎半炸好香口，原來秘密來自他們的辣醬，辣味好夠乾身惹味不油膩。有人留住隻杯的辣醬再去別舖買魚蛋來點。

東門町

地址：葵涌廣場3樓87號B店

不能錯過的經典強記小食

不要說我離題，介紹一間不在葵廣的店，它亦只是在葵芳港鐵站傍，在葵廣吃得再開心也要留肚來強記小食吃一轉，沒有花巧的美食，只是賣魚蛋、燒賣同牛肉球等經典小吃，足以令每天都排滿人龍，令人吃罷再排再買的人間美味，如果話你聽是全香港最好味的小吃店服唔服？我服！

魚蛋($7/串)燒賣($7/串)

是最正宗細細粒街邊炸魚蛋，彈牙香口，粉味不重有魚味；燒賣不是粉團一件，有肉味，辣汁更將味道大大提升。

牛丸($10/串)靚生腸($10/串)

牛丸雖然只是明顯是來貨，但算有肉味彈牙合格；生腸爽口沒梳打粉味，口感不錯，當然最大賣點是沙嗲汁，不要問我是沙嗲汁是馬來風格還是東瀛口味，我只可以說是秘製街頭的好味道，試過你就知！

強記小食

地址：葵芳港鐵葵芳站D出口

延伸閱讀：

▲西環6大新舊美食 秘尋龍蝦麵●流沙西多

▲美孚 爆餡 車輪餅 + 街坊勁讚美食15道