新店試食！ 旺角老街 必食滿漢牛肉麵

香港人有三日假都想「出走」，近年首選熱點是台灣，目的不是觀光購物，重點是品嘗美食。好多人都話去台灣食嘢，唔求山珍海錯，地道街頭風味才是美味精髓。大家早已認定了台灣的小店美食才算是台灣菜，最近旺角新開的「老街」台灣菜仲掛住個「試業」牌響大門，就等我們一齊去俾俾分吧！
論環境：****(5*為滿分)
你可以話香港間間台灣餐廳都係咁上下，都係走懷舊老線，搵堆老套廣告牌貼響牆，「老街」就行多步搵咗啲街景相做feature wall，即刻高檔咗！更重要係光光猛猛位夠闊落，身形較大件嘅我座卡位都唔覺迫狹，響旺角小店要坐得舒服真係bonus嚟！

論食物：(5*為滿分)
招牌滿漢大塊牛肉麵 $65 *****
兩個女生的份量，有齊牛腩、牛筋、金錢、貢丸同花枝丸做餸配粗麵，湯是牛肉湯底雖略鹹，要正宗台式就是濃味，牛腩同牛筋好稔又入味，貢丸都有豬肉同菇香，麵略嫌不夠爽口，但都算合格。

木魚炸豆腐 $19 ***
木魚即日本的鏗魚絲，代替炸粉包住硬豆腐炸香，聽說是日本傳至台灣的炸豆腐做法，不過台灣改良咗淋醬油汁增強味道，浸滿醬汁當然失去香脆口感，外皮鹹得過分，幸好咬開豆腐仍保持到熱度，中和鹹味。

香酥排骨肉燥乾拌麵 $48 ***
台灣風味菜食拌麵是常識吧！香酥排骨鬆化有肉香，算是水準之作，乾拌麵影埋相擺咗成五分鐘先食都冇結埋一舊，但略嫌肉燥和醬汁份量太少，拌吃時有點乾。

香酥排骨滷肉飯 $45 ****
台灣同事揀咗呢款試，大讚炸排骨味道同台灣食嘅一樣，明顯係用米酒、中藥同五香粉等醃過，香酥脆口，滷蛋是台灣街頭菜精髓之一，呢度做得好入味，讚！

番茄豬軟骨麵 $56 ***
餐牌有個皇冠仔之推介，心諗唔衰得去邊，賣相都算OK，台灣同事一食就話湯頭偏甜，麵也過軟 ，好彩爽口入味豬軟骨幫手「救亡」，補番飛！

冬瓜茶$18(左)及凍台灣咖啡$17(右) **
講到飲品四個字講完──「乏善足陳」，點了冬瓜茶同凍台灣咖啡；冬瓜茶好甜，明顯係買黑糖冬瓜磚沖嘅，凍咖啡飲唔出「台灣」味，不過睇清楚價錢，十幾蚊杯，又唔可以太高要求嘅！

老街 Old Street
地址：旺角豉油街65號地舖
電話：2779 9283
延伸閱讀

▲旺角食街 九大最受歡迎精品小食

HTTP://GOO.GL/JI9SYU

▲紅磡小店新抵價 $88 食帶子龍蝦漢堡

http://goo.gl/8burW3

如欲率先接收資訊，請讚好我們的FB專頁並於「已讚好」選單設定「搶先看」，多謝支持。
More Facebook :https://www.facebook.com/morehk.hk