夏日限定 便利商店 解暑小食

夏日限定 便利商店 解暑小食

Text | 七七子
Edit | Kingyo

步入6月，日本人所稱的「真夏」看似步近，想要消暑，你可以選擇「總有一間在左近」的便利店。一入去就會發現清涼商品琳琅滿目。七七子趁前幾日30度高溫，走入7-11，Lawson同Family Mart三大便利店，尋找今個夏天極速降溫小食同飲品，做足準備！

一睇到便利店甜品及雪糕櫃，就會感謝夏天到來，「夏日限定」四粒字叫人口水直流。限定Haagen-Dazs雪糕應該唔使我介紹。

反而今次想介紹番果汁波波冰，網上唔少人話可以放入汽水一齊飲，我會叫大家拎住邊行食，頓時透心涼，又唔怕融到四圍都係。另外日本人最愛的ガリガリ君波子汽水味雪條同白熊練奶水果冰都係值得一試嘅經典。數數吓，我都要去食番支最新推出嘅ガリガリ君荔枝味雪條啦！

夏日炎炎，補充水分可算是最重要一環，萬一中暑，整個行程都就無癮了。但日日飲水、飲茶、飲寶礦力，又真係好悶，創意無限嘅日本，每季都會推出有味天然水。上個夏天爆紅的乳酪味水，今年終於唔使搶購，加上例牌的橙味、桃味及新推出的檸蜜味，日日轉款都冇問題。望望隔籬個雪櫃的限定果酒，7日6夜都試唔完。

而如果你唔喜歡甜嘢又或者怕肥，可以選擇椰青水，入口清涼。

而咖啡控就可以去7-11買杯即磨凍啡消暑。提提你，如發覺自己出現缺水情況，可於便利店或藥房買專用飲料「口水補充液」，並到陰涼地方悄悄休息。

天氣太熱同時影響胃口，拉麵？聽到都出汗，咁不如試吓各大便利店推出嘅中華冷麵，七七子食過幾間，暫時覺得七仔配料最多，醬汁易入口；

而LAWSON就麵底夠爽口，加上有大份同細份，揀份細的仲可以買包溫泉蛋或流心蛋加料。

另外飯團手卷等，可涼涼地行住食更為方便，比起明太子、三文魚，個人推薦於OL界極為人氣沙律手卷，口感清爽，而少少沙律醬有助增加食慾。

春天開始流行起來的希臘乳酪或卡樂B粟米片乳酷，則可做個輕早餐或下午茶，留肚晚上擦餐勁。

Caption
010/011

飯團、手卷方面，個人認為七仔係第一位好食，料多味夠，所以好搶手。

但LAWSON的沙律卷（JPY108)同Family Mart的餐蛋飯團三文治（JPY220)，口感涼快。

聽朋友講，香港都流行食呢款卡樂B粟米片，今次呢個乳酪版，阿信屋應該未有掛，JPY162。旁為藍莓味希臘乳酪 JPY124。

最後溫馨提示，袋幾包糖傍身，隨時補充糖分，左JPY130, 右JPY142。

＊所有價錢只供參考