中村藤吉關店 開pop up同外賣店養粉絲

Text |Carrie
京都綠茶名牌中村藤吉登陸香港一年多就悄悄結業？原來因為業主收樓，他們已租下美麗華商場一舖重整旗鼓，新店裝修期間特別在金鐘廣場開設pop up 店及於4月18日在美麗華Miramall開設外賣店NEXT，推出各式期間限定美食，一解粉絲們單思之苦。
京都站店軟雪糕窩夫筒 ($53)中村藤吉京都站店及京都站店NEXT每年夏天都會有期間限定有軟雪糕窩夫筒，配紅豆蓉及白玉丸子，梅雨悶熱天拿一杯回甘抹茶軟雪糕又真是透心涼。*只於尖沙咀外賣店出售。

抹茶啫喱及焙茶啫喱($45/每杯)嫌食大大杯軟雪糕太heavy，不如改為食細細杯啫喱，味道清新，配埋紅豆蓉和白玉丸子吃，分量剛剛好。*只在太古廣場pop up 店出售。

凍綠茶浮冰($41)綠茶味對好多人來說太澀，日本人夏天會飲加糖加冰的綠茶，連埋圈半綠茶軟糕錦上添花。*只於尖沙咀外賣店出售。不愛甜綠茶的，可改為加脆米，亦可以焙茶雪糕，售價一樣。

現泡日本茶($28起)不方便的日子，又或是緊守戒凍飲的你，就要試試即沖日本茗茶，以前The One的茶店沒有供應，今次可以即買即沖，下午買杯健康又醒神。

有7款不同茶葉供選擇，想知邊款適合自己，不妨叫店員給意見。

我今日選了玉露茶($33)，聞好清香，入口回甘味很提神。貴嗎？這麼大的茶包，真材實料，買回公司其實可以沖多一次。

甜綠茶歐蕾($33)我會叫它做凍抹茶flat white，選用日本進口牛奶乳味香濃，能和甜綠茶的味道分庭抗禮，愛飲flat white的值得一試。

濃茶及焙茶伯特朱古力($168/每盒)入日本京都的總壇不會讓你空手回，香港的外賣店也有讓你放不下的手信，新產品濃茶伯特朱古力及焙茶伯特朱古力，打開盒充滿已陣陣茶香，咬開有綿花糖、杏仁和核桃，有點像鳥結糖，但味道的層次就豐富得多。

茶卡龍($58)法國馬卡龍食得多，日本的茶卡龍又有另一種風味，脆口帶甜，比起我印象中甜到爛牙的和果子更合香港人口味。

茶道杯($1,388起)外賣店當然沒有茶道班，但卻有正宗傳統的茶道杯賣，每隻杯有齊出世紙，同靚靚麻布繩袋裝好，內裏仲有說明書簡介茶道，送禮矜貴得體。

中村藤吉期間限定店
地址：金鐘太古廣場一樓
開店期限：即日至2016年5月15日
營業時間：每日上午10時30分至晚上8時
中村藤吉Next (4月18日開業)
地址：尖沙嘴彌敦道118號美麗華商場Miramall地下G06店
營業時間：(試業期間)上午11時至下午6時
(4月23日後正式開業) 上午11時至晚上10時
延伸閱讀

▲四國九州美食 野餐必備

http://goo.gl/T7OnkV

▲香港麥當勞推出 手撕雞漢堡

http://goo.gl/PTDow5