梁祖堯爆mirror內幕｜鏡頭後12子真實面貌 Edan挨夜錄Demo、Alton清晨練咬字、姜濤真性情
【梁祖堯爆mirror內幕】ViuTv節目調教你MIRROR已在較早前播映完畢，不少人大讚節目有趣兼意義，自己又趁機可以了解Mirror成員私下一面。而節目中的奶媽梁祖堯完節目後更感性地為每個成員出Post，實行「一日一鏡仔」大爆成員內幕，以下就為大家整合了梁祖堯眼中的Mirror，帶大家從第二個角度了解Mirror 12子！
撰文：Ella｜圖片來源：梁祖堯IG、Mirror成員IG
梁祖堯爆mirror內幕｜鏡頭後12子真實面貌
因合作ViuTv節目調教你MIRROR而結緣的Mirror及梁祖堯，節目後延伸出深厚的師生情，有觀看節目都知奶媽梁祖堯愛鍚成員，原來私下更感性地為每個成員出Post，而今日小編就為大家整合了他對12子的感受吧！
Mirror內幕1. Anson Kong 江熚生
外形剛陽味濃的AK在過去的演唱會上大Show健身成果，其完美身形加上誘人笑容殺死不少女粉絲的心，人氣再度急升。雖然年頭他疑似「黑面」引起熱論，不過相信是出於對舞台的熱誠，就連奶媽梁祖堯都大讚AK是天生屬於舞台！
「每日一鏡仔 呢個仔，天生屬於舞台。隔住個電視，都無法完全感受佢嘅熱度。就算你之前唔認識佢，睇過佢一次live ,一定會深深愛上佢嘅温度！同你做朋友係一件好幸福嘅事，一個充滿愛嘅暖男，親愛的江爆生，永遠支持你！#ansonkong #江熚生」
Mirror內幕2. Lokman 楊樂文
作為隊長的Lokman，要背負整個團隊相信不會是件簡單的事，梁祖堯就大讚對方是一個非常親切的隊長，看得出他為團隊付出了好多心血，令他非常感動！
「每日一鏡仔 : Lokman
其實基於我哋有一個共同朋友嗰個叫做Baby John，所以唔知點解一早已經對佢有一個親切感，但事實上我哋喺入camp前係唔算識大家嘅，最多有時喺化妝間見到面會say個hi，我仲好記得有一次佢戴住口罩同我say hi，咁我都話Hello，跟住佢專登除低個口罩我話我係Lokman 呀，我當時心諗，呢個人都幾客氣喎，其實你個頭髮你嘅眼神就算你戴住口罩我諗全香港都冇人會認錯你
時間線又跳返去尋晚慶功。佢第二次對住我喊。第一次，係梅窩。佢話，好掛住以前果個好火嘅自己，但係果個好火嘅樂文又係一個臭名昭著唔好惹佢嘅超級CH（鏡仔懂的）。我説，那火人仲喺度呀。
尋晚嘅眼淚，其實唔需要原因的。完成咗一件事，當中被加冕了幾多光環，加持了幾多壓力，所有事加速了多少，我敢說，隊長最懂，甚至，隊長才懂。所以狂哭一塲，多爽快。
我以前以為隊長只係一個名，一個訪問時的代言人，一個為方便排位影相的角色。當和他們相處後，我見到，隊長為團隊付出了好多好多心血和愛，同時，他亦係最專業的一個，和他合作，真的很放心，安心。而每晚演出前，隊長都會向11個兄弟講一番show 前凝聚大家的說話，每當他熱淚盈眶地講佢有幾珍惜同11個兄弟一齊表演一齊成長，我都會好感動的。
呀，當大家都好記得Lok man 係一個大哥，係隊長時，切勿忘記他是一個好好好好的表演者，作者。香港地嘅rap ,係佢寫嘅。我每晚聽都會喊。而之後都會傻天台飛人嘅表演cheer up .實在太有愛，太精彩了。
Lokman , 多謝你嘅信任。要感恩你曾有過的輕狂，因為你的善良是一種經過提煉嘅選擇，而你的強大是用生命的歷年一點一滴累積回來的。
加油，雖然同你認識咗個幾月，但係我應承你，我會係蜘蛛俠，當你需要我嘅時候我就會飛出嚟，接住你
#lokmanyeung #mirrorweare #一日一鏡仔#我們的紀念冊」
Mirror內幕3. Edan 呂爵安
在大叔的愛有非常破格演出的Edan，雖然外表看似一個貪玩的小屁孩，但梁祖堯就指他私下做起事上來非常懂得顧全大局，理性感性有好好的平衡，更大爆Edan犧牲自己休息時間，在零晨時份依然為團員錄Demo，這暖心舉動令11位兄弟非常感動。
「每日一鏡仔: Edan
停咗兩日因為做嘢真係好忙，各位久等了。
全民造星2做評判嘅時候，已經留意到Edan，好鍾意佢表演嘅能量，而且好知道表演嘅分寸喺邊，有諗頭，又有執行嘅能力，嗰陣仲邀請咗佢同佢嘅隊友，嚟咗睇米線女戰士，呀jer 都一齊嚟埋添，不過坦白講嗰陣真係唔算熟。
今次再認識埋佢另外一面。其實佢係一個理性同埋感性平衡得好好嘅人，佢好知道成個團隊需要啲乜嘢，而且好努力去連結大家。佢亦都好夠膽講自己嘅諗法，會為大家嘅方向提供一啲不同嘅面向去選擇，喺大家見到無偶像包袱嘅表面其實有一個好敏感嘅內心。
今次演出睇足六場，E先生裏面嘅鋼琴solo六場都冇甩過拖，喺表演入邊彈啲咁深嘅嘢，其實好大膽。而呢一種信心，絕對唔係臨急抱佛腳可以得到。
唔講大家唔知，給自己的信係調教你MIRROR喺梅窩入邊搵咗一個著名教唱和音老師同大家上堂。特登為佢哋編寫左高中低嘅三條旋律。大家都冇唱和音嘅經驗都好努力去練習。大家唱完之後就好想將佢放晒喺演唱會入邊成為一個item，而我哋排練演唱會呢個項目之前果一晚，佢哋已經排練到差唔多兩點先返到屋企，但係Edan 憑佢嘅Perfect pitch 能力,成三點幾，犧牲自己休息嘅時間，將三條旋律自己彈一次唱一次，放咗喺兄弟嘅WhatsApp group 度比大家更有信心地練習。而第二朝10點就要排練啦。佢呢一個舉動令我同另外11個兄弟好感動。多謝你，Edan !
Edan加油，多謝你嘅信任，亦都多謝你願意去進步同埋改變嘅決心！
#mirrorweare #edan」
Mirror內幕4. Jer 柳應廷
有「金Jer」之稱的柳應廷在年頭成功勇奪新人獎之後，被指與團員埋下心結，幸得有節目幫助下，令大家可以有機會「攤開黎講」，成功解開心結，而梁祖堯就直指當下令他非常感動，更指自己與他作為天天蠍座的人要打開內心絕不容易，希望他能放下過去，好好享受當下！
「每日一鏡仔: Jer
Mirror 入面唯一天蠍，作為天蠍同鄉會特別有種親切感的。而又因為咁，我會好明佢。天蠍要表面去融入一個團體好容易，但係其實心底裏面好慢熱。又因為對真實嘅情感有潔癖，所以心靈進入一件事會寧願保持all or nothing ,一係唔俾，一俾就俾晒。所以，喺camp 入面，jer 算係我好遲先進入到內心嘅一個人，但我完全理解，因為如果將心比己我都會係一模一樣。
剛剛認識嘅時候總係覺得即係一個小心翼翼嘅人，後來喺camp入邊傾完計就知道點解。多謝你果一晚勇敢地分享你嘅諗法，講出黎真誠嘅感受，之後你同Ak ,同Lo 之後個抱頭痛哭，嗰一個畫面，我永遠都唔會忘記，而放喺給自己的信重現時，亦都係睇幾多次都會感動。我唔知最後節目出街嘅時候究竟會有幾多俾觀眾見到，但係呢一個經歷實在比起節目效果重要得多了。
Jer ,唔需要再步步為營，放低過去，更要拋開將來，反而好好真切地投入地享受每一個當下，感受，享受，釋放，綻放，聽落好容易其實需要人生最大嘅勇氣。淡忘前因不顧後果，大概就係呢個意思了。加油，互勉之!
Ps 可能你哋唔會知道，jer 係最後兩場演唱會，其實拉傷左大腿肌肉，肩頸亦都拉傷了。當大家睇到佢狂人日記嘅時候，同呀Lo dance battle 嘅時候箇中投入箇中瘋狂嗰種義無反顧，又有邊個知道其實佢出場之前都仲係好痛好痛呢？truly respect !!#jer #mirrorweare #我知道你哋等得好心急#但係真係唔想求其寫囉#每日一鏡仔#個每日係有誤導成份#咪再DM我催稿」
Mirror內幕5. Jeremy 李駿傑
在舞台上被大讚有「哥哥」風範的Jeremy，舞台反轉乎魅力驚人，就連梁祖堯都指他有種危險性！而Jeremy溫柔的性格在團中必定做到一個好好調和的角色，相信是12子有凝聚力的很大因素！
「一日一鏡仔 Jeremy
好耐冇見，之前忙到嘔，咁咪終於如大家所願寫下我哋呢一隻咁特別嘅獨角獸。
Jeremy 肯定係12個鏡仔裏便，最溫柔嘅一個。佢嘅溫柔，絕對唔係等於冇嚟力度嘅嗰一種，大家都肯定見過佢喺台上爆發出驚人嘅舞台魅力。佢嘅魅力係絕對獨特嘅，話佢似哥哥話佢似明哥，其實我覺得都唔能夠反映到佢獨有嘅魅力。因為我覺得香港根本就從來都冇一個咁樣嘅表演者喺主流媒體裏邊出現。佢嘅美麗，裏面又有一種危險性，而佢嘅危險裏邊又有一種溫柔，如果種溫柔裏面又有一種聖潔。你話呢一種質地嘅表演姐喺香港有冇？我就未見過啦。
舞台下面嘅Jeremy，嗰種溫柔，係佢唔介意付出，係佢真心會照顧晒11個鏡仔嘅需要，我估喺Facebook live 嗰晚，大家都見到，佢以為係影緊某一個講緊嘢兄弟嘅close up ,佢就跪喺前邊加湯，真係好可愛^_^但呢一啲只係我見到佢照顧大家每一個人嘅冰山一角。
我可以話，對凝聚其他11個人，Jeremy 係功不可沒嘅。
而佢係一個對自己要求好高嘅人，每晚演唱會佢係第一個喺條走廊不停自己warm up 開聲，不停練習Monster入邊果句高音。學cm老師話齋，Jeremy 係12個裏面其中一個唱得最穩陣嘅，由佢大家就會安心了。
我相信大家同我一樣咁期待佢有單飛嘅作品吧？但係我可以話俾你聽，佢調教入邊，Jeremy 講過一句我好深刻嘅說話:「我夠膽講，12個入面，冇人比我更加愛mirror 」
我估就係呢一份愛，令到佢對另外11個兄弟無微不至。
認識你，好幸福，Jeremy 。世界上珍貴的獨角獸。#mirrorweare #jeremy」
Mirror內幕6. Alton 王智德
Alton作為團中的大哥哥，非常懂得照顧團員，連梁祖堯都大讚對是個可靠、勤力的人。而梁祖堯就大爆他勤力的一面，指在Camp時一朝早就起身練咬字，直言是他見過最努力的人！
「一日一鏡仔: 德仔
Alton ,我估係梅窩camp 12個鏡仔中，我第一個交心的人。某個晚上，我見到他在流淚，然後和他在海灘傾了差唔多兩個鐘密計，交換了好多秘密。Alton 是一個可靠的人，一個同佢做朋友你會感到無比安全嘅人
Alton 是一個麻鬼煩的人，典型處女座，成鬼日鑽牛角尖，對自己要求好高，又會因為咁樣而情緒低落。
告訴大家一個小秘密，梅窩嘅時候晚晚都傾到好夜，第二朝都好早，我算係一個好早起身嘅人，我起身行出走廊，我見到佢揸住部手機喺度練咬字，身邊冇人，唔係為鏡頭而做，其他兄弟們都未起身，我真係未見過有一個人係咁努力，係咁樣努力法
今次佢嘅棟篤笑，概念都係來自佢自己，我同旁白君幫佢整理文本同埋同佢排練，麻利就負責初號機服裝。我哋三個稱之為Alton 小隊，每晚企喺旁邊，衷心期待呢一部份，
你睇住佢每晚嘅進步，越嚟越誠懇，越嚟越從容，打從心底為佢感到好自豪，好感動
世界上沒有懷才不遇的人，才華和努力都會被看到
德仔，你在台上發光了，所有人都看到，而你用你生命確確實實地，感染了我們
I love you , and we love you
#mirrorweare #altonwong #張相我好樣衰但我好鐘意#記住王智德」
Mirror內幕7. 姜濤
人氣爆登的姜濤，自出道就受到大眾的熱烈追捧，作但他絕對沒有因此感到高傲，反而更努力做好自己。梁祖堯自爆節目過後依然未能與姜濤Friend到，不過看到他的真性情！
「最後一鏡仔: 姜濤
今晚來個反高潮。關於姜濤，我實在沒有太多可以寫。
我記得花姐在起行之前，曾經同我講過，12個裏面，你要同姜濤熟，應該冇乜可能。
坦白講，旅程完結之後，我亦都唔會用同佢熟形容。熟唔熟始終係一種緣份，毋須刻意強求。
關於佢嘅真實一面，節目裏面都有唔少片段會見到。而佢嘅真性情，佢亦都毫無掩飾咁樣喺節目裏面表露。徹底放下了偶像包袱，真真實實地去解決問題，去承擔責任，去玩得開心，都攝入鏡頭了。
佢對mirror 的愛,我在旅程中真真實實地感覺到。
佢對自己的要求，我跟隨他們排練演唱會的時候，完全看到，他今天所得，都是他用200分努力去玩回來的。他自己排舞排到個身好像喺泳池上來一樣咁濕，每一次綵排都給盡200%的力量，沒有鏡頭影住，都比足精力去跳。這是我超級尊敬他的地方。
我們身體上邊最接近的距離就是演唱會的時候他拉傷頸部，我為他整理背脊受傷的筋腱和肌肉。
演唱會完結之後某一日，他Po 了I’m tired of everything,大家都有擔心，我也send了message給他。我只是告訴他如果有什麼需要可以找我傾偈，但如果你安好只是需要空間就不需要回覆了。
大約一星期之後收到他的回覆，說多謝關心。我想，他應該收到千千萬萬個這樣的慰問吧，但他也應該有逐一回覆。這就是他。
心靈上邊最近的距離，就是那天晚上和老虎在我房間拍攝要他們做朋友那一個環節，拍攝完，節目組收隊，之後我們三個繼續傾偈聊天，講了好多心底裏面嘅睇法。多謝你信任，和我和老虎分享了很多。
他對我說了什麼我不會在這裏透露。
但我對他和老虎說了什麼反而可以給大家知道。我告訴他們兩，你們是團隊裏面年紀最細的，也是最成熟穩重的兩個。團隊走下去，大哥哥們總會有疲倦的一天，你們一定要好好裝備自己，然後將來承擔起帶領這個團隊的責任。
能力越大責任越大，未來就是屬於年青人
加油，姜。
Ps 節目完結了，多謝大家對這個節目的支持。這種奇妙旅程，是一件可一不可再的事。
感謝節目組所有人的付出。每一位。和你們一起經歷這趟愛的旅程很愉快，很感恩有你們。真心的。
多謝花姐的信任。
多謝你們12位兄弟。」
Mirror內幕8. Ian 陳卓賢
Ian 陳卓賢被譽為讀書又叻、運動又勁的高材生，不但擁有迷死人的笑容，更加是大家心目中的大隻男神。不過在梁祖堯眼中，他卻是個非常慢熱但又非常有自己思想的真男人。
「#一日一鏡仔
呢個鏡仔，想寫好耐。今日係最好嘅機會。
坦白講出發之前，對佢哋12個大部份都唔認識，都會喺問吓身邊唔同嘅工作人員，梳頭化妝，打聽下關於佢哋嘅一切，務求做足功課，入去就一擊即中。
有人同我講，佢好聰明㗎，你做啲太低能嘅嘢佢應該未必會合作。
有人同我講，佢好cool 㗎。如果你想打開佢個心恐怕冇乜可能。
有人同我講，佢好有自己嘅諗法㗎，你同佢講啲嘢如果唔啱聽，你預備定會有不禮貌對待啦。
聽咗咁多之後，心裏面有一半係擔心，另外一半更加係有一種想放棄呢一個人了。
我哋拍攝上邊有一個好好嘅機制，就係我同大家講每一刻都真心傾偈，儘管可能有鏡頭影住，都真心傾，然後如果真係唔想出街嘅，我哋就同返製作團隊講頭先嗰段唔好出街。
第一個行駛呢一個權利嘅人，係佢。
真係第一日拍攝，食完午餐喺酒吧裏面，我見到佢一個人坐埋一邊，我走埋佢同佢傾偈。當然傾偈嘅過程都有隨身嘅攝影機，傾完之後我了解佢多咗，然後佢話，頭先我哋傾偈嗰啲唔好出街。咁故之然，你哋亦都唔會見到，而我亦都唔會喺呢度話俾大家聽我哋傾過啲乜。
由嗰一刻開始我對佢改觀。
無可否認佢係一個慢熱嘅人，一個聰明嘅人往往都會慢熱，因為所有嘢睇定啲先收集多啲資料先下決定無論如何都冇錯。經過幾日嘅相處，無論係我或者幕後製作團隊，都感受到其實佢係其中一個最真實嘅人，嗰種真，就係連我唔係太信任你我都唔介意俾你見到，咁樣其實對大家都好。我話我都係咁嘅人，就是呢一點。
幾日之後我哋做戲劇練習，哭得最斷腸，11個兄弟都完成，而他仍然在哭，彷彿抽離不出來。我帶領這種練習多次，第一次懷疑自己，是不是有些東西已經畫得太深，究竟之後我能不能夠填補佢心裏面呢一個洞？
多謝你對我嘅信任，喺過程裏邊你慢慢打開咗你自己，連粉絲都見到你嗰個久違嘅童真笑容。
記得最後一兩日，你同我講，就算有啲嘢現實改變唔到，原來願意同身邊信任嘅人分享，每講一次就好似個角度已經有少少唔同，原來真係會輕咗，原來真係會開心咗。
我亦都必須喺呢度向你道歉，因為我一開始聽人哋嘅講法，已經對你有一種偏見，多謝你用你嘅行動提醒返我，每個人背後都有難言之隱，如果就憑片面之詞去判一個人死刑，呢一種偏見實在很差很差。
希望你永遠都可以保持呢一個快樂嘅笑容，祝你生日快樂，永遠都快樂，親愛的Ian。」
Mirror內幕9. Frankie 陳瑞輝
現年32歲的Frankie被喻為MIRROR成員中最靚仔的一位，但出道後機會不算太多，被人批評沒星味。而梁祖堯都指Frankie是個不喜歡競爭的人，不過其實都是出於善良、見過世面，大讚對方是個真誠的人！
「一日一鏡仔 皮皮
12個鏡仔裏邊我應該係認識佢最耐嘅一個。
事緣疫情嘅時候，我除咗耕田都冇乜其他嘢做。當時有一班造星2嘅朋友仔想搵我教大家做戲，我應承咗，再同大家上咗大約八堂，唯一條件就係我唔想收錢，大家自由定價，所有收到嘅錢都會捐去良心基金，幫助有需要幫助嘅人。而當時，皮皮就係其中一人。
皮皮，係一個唔鍾意競爭嘅人，而佢亦都唔係一個會好主動喺大圍表達佢睇法嘅人。但絕對唔代表佢係一個冇要求冇睇法嘅人。以佢嘅睇法往往都會係私底下同大家分享。
我知道好多皮寶寶覺得節目點解好似唔係咁多見到佢嘅睇法，其實就係呢一個原因。
係啱啱開始兩面破冰，大家重新建立關係但係仍然有少少尷尬嘅時候，皮皮係好主動連結大家嘅人，而呢啲係唔會喺鏡頭面前見到嘅嘢。
佢嘅善良，佢嘅顧全大局，佢喺後面默默咁樣支持大家，而且真心唔介意係唔係會被鏡頭攝入，係我超級地欣賞佢嘅地方。而我可以同大家講，鏡頭前後嘅佢基本上係冇分別嘅，可以話係12個裏面，最真誠嘅一個人。
對於見過世面，經歷過好與壞嘅人來講，而真誠同埋善良，係一種選擇，而我眼中嘅皮皮，就係一個咁嘅人。
我好高興認識你，亦都多謝你嘅信任！」
Mirror內幕10. Anson Lo 盧瀚霆
Anson Lo近期必定是城中熱話，粉絲豪擲超過百萬幫偶像慶生！而梁祖堯都指透過旅程感受到對方的魅力，更感謝對方願意在他面前表露真實及脆弱的一面。
「一日一鏡仔 ah Lo
最後兩集了。打從開始就決定，最後三天才寫最後三個。今晚，是呀Lo
每個人都有很多面，其實正常不過。你對着媽媽一個面口，對着爸爸另一個面口，對着好朋友，對着情人，對着老闆，對着陌生人，大家都有不同的面口。每個面口，性格可以極端不同，其實全部都是自己。
呀Lo, 以前可能對住好多人都係一副哈客嬉戲恭恭敬敬的面口，有些人可能覺得虛偽，但其實過分保護自己，到頭來抑壓得太多，累積了的傷害，都只有夜闌人靜的時候自己一個才會懂，所以一開始接觸他的時候，總是在那個禮貌的面孔後面，感覺到一種深不見底的悲傷。
感恩在這個旅程認識了你真實的一面，也感謝您打開自己讓我們看到你的脆弱。今晚這一集最珍貴的是，你們終於可以看到在你們軟弱的時候，閉上眼流淚的時候，究竟是誰給過你最真切的安慰和擁抱，而且些都要默默地記着，永遠的感恩。lo，你不看也不知道，原來在你流淚的時候, Alton 捉着你的手，他的眼淚也在流。
lo是一個超人。他在狀態最差的時候梁能夠與200%的力量去表演，他在最孤獨最悲傷的時候，也能夠在傾談面前裝起一個叫所有神徒神魂顛倒的笑容。
所以衷心支持他的你們，不要以為他永遠只是活在那個粉紅色的氛圍裏面，接受他也是一個有血有肉的人，讓他自由自在快樂地過自己的人生，而不需要每刻都活在你們的期望當中。
真正愛惜一個人，不是應該這樣嗎？
明天是最後一集了。感恩有這趟旅程。」
Mirror內幕11. Stanley 邱士縉
而Stanley在梁祖堯眼中，是個最強和最弱的混合體，會非常真心地照顧每一個團員，但同時有顆好脆弱的心，對自己有太過多的壓力，一直力求完美。
「一日一鏡仔 Stanley
十二個入面，應該見佢最多，因為喺造星3時佢成日都來探呀蓮(Alina )班，每次比賽時又會做私人攝影師，有次排練中呀蓮講開有間嘅蘋果酥好好食，一陣佢就攞住兩盒出現咗，買哂俾我哋全部人食sweet 爆。排Alina 同Manson 10 強演出這麼近那麼遠，我哋3個創作團隊(Stanley , max 同我)成日一齊傾一齊jam ,好似已經係好耐嘅事，又好似啱啱咁，時間，真係奇怪。
講番Stanley .
我會用最強和最弱的混合體來形容佢。
強，佢有一個Big heart , 好真心地照顧大家。你諗吓，我哋果陣係佢女朋友嘅隊友，都咁照顧我哋，你就估到佢係會幾咁照顧11個兄弟。甚至乎拍攝嘅時候，佢亦都會主動咁樣照顧我哋成個拍攝團隊，無論係轉場要幫手攞嘢，幫手set up，維持秩序，甚至如果有機會要除暴安良我覺得佢都係會挺身而出嗰個。總之有佢喺度大家就會覺得好有安全感。
咁點解會話佢弱呢？Stanley 佢有個好脆弱嘅內心。佢係一個好善良嘅人冇人會傷害佢，但係往往佢對自己要求好高，佢會因為一個未能夠成功做到嘅位，不停咁樣反覆練習，比自己好大壓力，越緊張就越做唔到，最後嬲自己嬲到滴下下男兒淚。見到佢咁樣我就會好心痛，大家睇節目就會見到佢呢一面。而要勇敢俾大家見到自己嘅軟弱，真係要好大勇氣，我好敬佩你的真心和勇氣。
Stanley , 每個人都有自己果個階段嘅limitation.當然每個人都要努力，但係道理就同個杯半空定半滿一樣，一定要好好咁樣肯定自己而家有嘅成績同埋能力，好享受當下發生嘅每一刻，可能困難就會不知不覺地解決了，要肯定自己多一點，愛自己多一點，找回那個大無畏的初生之犢般的心態，然後再加上你現在的歷練和穩重感，你一定會更享受每次的機會。
講就易，我都仲學習中
互勉之，兄弟!#mirrorweare」
Mirror內幕12. Tiger 邱傲然
Tiger一直被花姐指是團隊中的「透明人」，在節目中就曾透露過心聲指自己只是想給其他成員多一點的鏡頭，背後原因非常暖心。其實早就在節目中，梁祖堯就表示對他刮目相看，覺得對方悟性很高，又聰明和敏感，是個非常有才華的男生。
「#一日一鏡仔
要講的，我都在節目單頭親口講了。
我估，你都知我係有幾咁欣賞你，錫你的，再講，就會開始假咗了。
送俾你，我手機拍的視角
虎仔，你真係唱得好好
老虎係個old soul ,年紀輕輕又穩重又成熟。認識咗佢嘅父母之後，我就明白了。
呢一對非一般嘅父母，信任佢，俾佢經歷俾佢飛，就成就左呢一個咁有才啦，又咁孝順嘅孩子
呢條片，其實係送給虎媽媽的^_^多謝你的招待，好期待再來你家食飯呀」
