【藍橘子】 《千祈唔好信女朋友講嘅說話》

老老實實，女朋友係一種非常狡猾嘅生物！

佢講嘅每句說話，同佢腦入面真正本意係兩回事嚟。

我意思唔係指女朋友講大話呃我，而係佢每句說話背後都另外一個意思，就好似玩猜燈迷咁。

拆解唔到？後果會好嚴重！

撰文: 藍橘子 | 圖片來源:電影截圖、電視劇截圖、ViuTV截圖

相信唔少人都聽過，女朋友話「你個肚腩好好摟啊～好有安全感啊～」，網上亦有好多女仔發表言論，話有肚腩嘅男人先係最吸引。當好多男性（包括我）見到都鬆一口氣，將腹肌默默咁收返埋喺脂肪下。

但好奇怪嘅係，當女仔見到韓星不經意咁露出腹肌，又會尖叫大嗌話腹肌真係好正！好想咬一啖！點解會咁大反差？

其實，女朋友話你有肚腩好正，真正意思係「你肥咗吸引力會大減，根本無女仔鍾意，咁你就唔可以出去識其他女仔喇！」

當然女朋友嘅語言偽術唔止呢樣，當我工作好忙，連放假都要喺屋企繼續做嘅時候。女朋友只會冷冷地拋低一句：「唔緊要啊～工作緊要嘛，唔使理我嫁，你當我透明得嫁啦～」

其實隱藏於話語之間，女朋友心底真正想表達嘅意思係：「救命啊！我好可憐啊無人理！但你工作我又唔想騷擾到你，如果你可以花五分鐘陪我就好啦！」

其實情況就好似，一個百萬富翁送名輩手袋畀女朋友，同埋一個雖然失業，但都親手縫製一個銀包畀女朋友，感動程度後者大好多。

所以話呢，同女朋友相處每一刻都要非常小心。你嫌佢好麻煩咩？其實佢要求只係五分鐘就高興，唔會再有怨言。最慘係佢唔肯將呢個要求講出口，要靠你自己慢慢摸索咁解。

正如我出去同班朋友食飯，只要事先同女朋友講一聲，佢覺得無隱瞞，就會好放心咁畀我出去交際應酬，有隱瞞即是身有屎，就算班朋友全部都係男，女朋友都會幻想我係去女僕CAFÉ溝女僕。

同女朋友相處得愈耐，就愈熟悉對方性格。

好多人覺得拍拖無晒自由，好壓力，於是故意隱瞞另一半出去食飯、去打機、或想一個人靜吓…

但其實女仔又唔係想像中咁麻煩咁專制，

只要理解到佢個腦諗乜，大家無嘢隱瞞。

其實都可以好自由。