沙灘玩具被搶兒子爆哭對方家長反斥太緊張港媽一招反擊護子

Jul 29 2021

沙灘是爸爸、媽媽夏天帶小朋友玩樂、消暑的好去處，不過玩水同時，都要小心財物。近日有名網民於社交平台分享一事，她指自己目睹小朋友被另一名男童偷玩具，再據為己有的經過，男童媽媽要求小朋友禮讓「BB」，小朋友父母不從，即用一招反擊對方媽媽，成功護子。帖文超過千人讚好，好多網民話睇到大快人心，大讚小朋友父母在必要時候為兒子挺身而出，是個好榜樣。

撰文：Clara | 資料來源：「生仔要考牌系列」| 圖片授權：SHUTTERSTOCK｜原文刊於：Sunday Kiss

沙灘玩具被據為己有

一名網民於Facebook群組「生仔要考牌系列」投稿，一開始已對小朋友的媽媽表示讚歎：「我真係不得不佩服依家啲媽媽。」事緣她前兩日同朋友去沙灘玩，當時天氣不太穩定，偶爾下微微雨，所以她走到遮蔭位避雨。有個男童不斷尖叫，跑來跑去，突然走到旁邊的家庭。未幾，他手上拿住多拉A夢圖案的掘泥工具，他媽媽見到就說：「好靚喎，喺邊度拎㗎，咁叻嘅？」

之後，被拿走玩具的小朋友走到男童身旁問：「個掘泥工具好似係我嘅。」男童媽媽反駁：「係我個仔嘅！」話畢，小朋友就喊住走去跟父母訴苦：「佢拎咗我啲嘢…」護子心切的爸爸立即走去找對方媽媽談判「個多拉A夢掘泥器係我個仔嘅，因為有個位做咗記號。」

媽媽為護子教訓對方家長

男童媽媽沒有歸還玩具，她覺得她兒子沒有惡意，是小朋友的爸爸太敏感：「小朋友借嚟玩吓，唔使咁緊張。」小朋友媽媽聽到之後怒火中燒，斥罵男童媽媽：「『借』唔係咁㗎囉，你係『偷』喎，我仔啱啱喊住同我講，係你話個玩具屬於你個仔！」不甘示弱的男童媽媽毫無悔過之心，反而指責是小朋友太小器：「咁大個就讓吓BB啦！」

小朋友媽媽不輸蝕，一伸手就拿走對方媽媽的電話或銀包，提醒她「不問自取是為賊也」的道理：「我依家拎咗你啲嘢，可唔可以話係『借』呀？定係『偷』呀？你個仔細啫，你唔細吖嘛！咁簡單嘅道理都唔識教，正一無家教！」說罷就從男童手中取回原本屬於兒子的玩具，然後離開。