【張晨】《當他的 短訊 只剩下Emoji，你還拼命甚麼？》

內容由博客提供及授權轉載，不代表本刊立場。

「死啦，佢呢排覆得我好Hea呀……你哋覺得點解呀？」

呢個問題嘅常見程度，好比喺一間茶記見到人點凍奶茶。

無論段關人係「戀人」、「準戀人」、「戀人未滿」，抑或「純粹FF」，全部都適用。

其實答案大家都知，不過冇咩人敢講出口……

為咗顧及佢感受，唯有答啲「行貨」：
「佢可能呢排忙啫」、「都唔Hea呀，至少句句都有Emoji，不過句句都剩係得Emoji……」

睇住佢手機中嘅對話，面對任何話題，對方只係「笑喊emoji」、「手指公emoji」同「馬騮掩面Emoji」，唯一一個有文字嘅msg已經係「呢個好笑」，外送「笑喊emoji」combo x 3。

但某啲人會覺得「肯覆即係有機會」，於是佢抓破面皮，希望不斷努力，搏對方一笑。
其實呢個行為仲慘過自殺……簡稱「求殺不遂」。

佢冇勇氣自殺，仲要不斷努力，希望對方引刀成一快。
但對方偏偏只後退，想佢知難而退。

睇見無數人都跌落入呢個傷心漩渦入面，不能自拔。
或者佢哋都未明白，有一種人，對方一定唔會愛，
就係「唔會離開」嘅人。

佢冷淡，你死纏。雙方嘅價值愈拉愈遠。

有時明知對方對自己再冇意思，灑脫都係一種招數。
等時間過，等對方清晰知道你已經唔會出現。

可能，就到佢懷念。
如果佢仲係樂得逍遙，咁你都只需勸自己灑脫得太遲。

溝通係任何關係最基本嘅事，
當Whatsapp入面，對方只剩下Emoji，你還拼命甚麼？

繼續畀藉口自己犯賤，
呢種傷害並唔會傳到畀對方。

其實呢個道理，你係深深明白嘅。