【張晨】《在我們還未懂得 戀愛 時，遇上得太早的那些人》

內容由博客提供及授權轉載，不代表本刊立場

「我覺得兩個人，Timing真係好重要。」
呢句說話，你喺人生之中，都由唔同人口中聽過十次八次。

細個你冇咩感覺；大個就略有所感，暗自點頭。

點為之細個；點為之大個？
當「遺憾」堆積到某個程度，你自然會大個。

早排同老死阿強傾閒偈，
又聽到一句：「Timing真係好重要。」
之後大家開始數番咁耐以嚟遇過嘅不同緣份，

慢慢就發現，
我哋以前根本唔識拍拖，應該話唔識咩叫愛一個人。
曾經覺得自己「啱晒」，到頭來都係誤解。

好似阿強咁，當時係極限佔有慾，
要女朋友日日陪自己，唔可以覆男仔Msg，要佢世界得自己一個。

我都試過因為女朋友出席嘅場合多男仔，走去發脾氣、吃乾醋，仲自己唔開心咗一日鬧情緒，諗落都想瘋狂毆打自己。

不斷諗落去，想毆打自己嘅地方實在太多，
不過你冇可能接觸到過去嘅自己，更遑論毆打自己。

阿強覺得，以前未識得談 戀愛 ，糟蹋咗好多機會。
佢話，如果可以再嚟一次，所有嘢可能會唔同。

當一個故事存在「如果」，
始終都蘊含住悲劇味道。

我拍拍佢膊頭，勸佢唔好諗太多，反正都冇結果。
阿強苦笑：「每個人都知冇結果，但就係冇結果，你先想諗呀嘛。畀我FF下啦。」

佢再講：「年幾前撞番個Ex，大家閒談幾句，都話當時大家都好癲，好唔成熟，根本唔識拍拖。嗰次見番佢，感覺到佢真係大個咗好多。」

「有Feel？追番人囉。」我輕描淡寫。

阿強搖頭：「兩個人嘅感情唔係永遠嘅，
大家感情最深嗰刻，我唔識咩叫 戀愛 ；
到我學識，大家嘅感情都已經係一份歷史啦。

對於呢啲Timing錯，嚟得太早嘅人，我哋只有一個對待方法。
就係企得遠啲，望到佢已經好幸福，盡量企遠啲，唔好畀佢見到，唔好為佢生活添加一份混亂。

貿然行上去，呢個Timing都係錯。
對呢個你真係鍾意嘅人，唔好畀兩次錯嘅Timing人啦。」

或者，咁做已經係最後嘅祝福。
的確有啲人，相遇相知相交十多年，但Timing總係錯，落得傷心。

最後我問阿強：「佢幸福你就唔打擾啫，如果佢Single呢？」
佢笑笑口答：「有呢個如果，先再算啦。」

我們都知，用「如果」來包裝的事，多半不會成事。