在職媽媽唔畀老公每周末打波放鬆下 被對方指責感委屈

撰文：Clara｜資料來源：網上討論區｜圖片來源：Shutterstock｜原文刊於：Sunday Kiss

在職媽媽呻老公幫唔到手

該名在職媽媽於網上討論區以「個人興趣 Vs 照顧小朋友？」為題發文，自爆同老公因照顧小朋友的問題上有分歧，結果鬧大交。她與老公育有分別1歲半和3歲半的小朋友，由於家庭開支大，所以她決定做在職媽媽，人工同老公差不多，可以分擔財政壓力。由於早上要上班，所以在職媽媽有聘請工人去照顧小朋友。

在職媽媽指老公工作忙碌，每晚要9時半才放工回家，回到家就會負責湊住大仔，讓她專心哄完細仔睡覺，之後老公就會交大仔給她，讓她再哄大仔睡覺。她覺得自己同老公一樣，肩負經濟壓力，但不明白為何老公毫不積極投入家庭工作，將責任推給她，要她一腳踢：「其實我工作都忙，屋企大小事務都由我負責。佢星期六日都有時要返工，好少湊小朋友，佢嘅存在主要係幫我湊住大B。」雖然在職媽媽心中不忿，不過仍決定包容老公：「我理解的，因為工作嘛⋯⋯」

拒絕老公me time要求即被指責

最近，老公向在職媽媽提出想要私人時間「me time」的要求，他想逢星期五晚要落街打波，夜晚11時半才會回家，在職媽媽即時拒絕。她解釋，夜晚工人要休息、睡覺，她不想自己一個人照顧兩個小朋友，哄他們睡覺，而且她認為老公可以提早打波，就可以在較早時間回家，不需要玩到夜晚11時半。可是，老公沒有理會她的解釋，更指責她，最終鬧交收場。在職媽媽覺得很委屈：「依家佢黑我面，話我令佢無左人生，無晒個人興趣，係咪作為女人一定要成就佢？」

網民意見不一

有網民支持在職媽媽的老公，覺得他的職業工時長、假日都有可能上班，已是無可改變的事實，在職媽媽應該要體諒。網民認為在職媽媽老公工時長，工作壓力一定好大，但他放工後沒有馬上倒頭大睡，相反依然盡力幫手湊小朋友，毫無怨言，已經盡了做爸爸的責任。如今他只是想一星期休息幾小時，已經是最大讓步，想不到會遭到拒絕，所以才忍不住將內心抑壓的心情大爆發：「身心放鬆係好重要，一星期一晚係可以接受」、「雙方都要有陣時畀啲時間大家唞吓」、「有了小朋友不代表要完全無社交，所以我係你會一至兩星期出去安排一晩me time，大家互相幫忙」。另外，網民指在職媽媽一家有聘請工人，不明為何她仍需處理家頭細務：「可唔可以逢星期五搵工人姐姐幫手，我估工人姐姐都唔會詐型」。

另一邊廂，有網民覺得在職媽媽壓力都好大，斥她老公自私，只顧自己去玩，沒有考慮過另一半的感受：「啲男人就係咁，要打波得，放工返嚟盡咗父親責任，等細路瞓晒再出去打波，打通宵都得」、「你老公諗嘢真係離地，唔想照顧小朋友，當初唔好生兩個啦，萬一小朋友有乜家居意外，佢成世都後悔莫及」、「點解爸爸有時間可以走出去玩，掉低媽媽負晒全責？」