江嘉敏自爆「自己寸又冇禮貌」＋被上位小生力追！被前粉絲數5宗罪咁回應

江嘉敏《黯夜守護者》演技被讚有進步

對於今次江嘉敏的髮型，觀眾都有唔少意見！當中大讚江嘉敏可愛兼「後生咗」嘅言論都為數不少！尤其是江嘉敏早期因為拍劇而剪短頭髮被指「顏值大減」，突然行可愛風的確有很大反差，對反，都有人話江嘉敏面圓圓加埋個煲蓋頭，更加盡得面大，「好似粒珍寶珠」。不過江嘉敏在劇中要扮後生都係無可奈何，事關她飾演的盧小寶，角色設定是20歲，仲要係陳敏之個女，二人實際年齡分別係27歲同埋43歲，同劇入面一樣相差16年！

江嘉敏短髮Look致敬仙杜拉？　戰鬥格被嘲滲「東莞味」

而事實上，江嘉敏早前已經為拍攝劇集《四十二章經》而剪去多年長髮，豈料她犧牲嘅唔單止係留落多年嘅髮絲，她更曾自爆因為剪短髮連個男朋友都冇埋！當日她曾經在IG寫道：

知道嗎舊人
嗱長頭髮丫
一個人愛你係唔會理你長頭髮定短頭髮

江嘉敏短髮Look再被批評

其實嫌棄江嘉敏短頭髮的，不單只是佢前男友，仲有一班網民。早前發福不少的江嘉敏於IG貼谷胸照，自稱獲友人大讚「身瘦咗但塊面圓咗」，並謂：「我把自己吃得這麼圓，就是為了不被別人看扁。」自信滿滿的她早前還以戰鬥格，穿黑色Deep V Bra Top披藍色西裝外套入馬場，惟有網民嫌「鄉姑」味濃，紛紛留言「件衫隻色想點，以為返咗大陸」、「東莞夜場小姐」、「啲Taste咁差」、「花家姐咁款」、「以為夾個髮夾喺頭就會似番女人？」等。然而去年底換上新造型時，江嘉敏已被指「完全Carry唔到短髮」，甚至問：「係咪致敬仙杜拉？」

江嘉敏認自己化妝幾恐怖　爆造型原來搵朋友幫手

對於被封「時裝車禍」，江嘉敏接受鄭裕玲（Do姐）主持的商台節目《口水多過浪花》訪問時，大方直認不懂扮靚、幫自己化妝都幾恐怖，「可能件衫本身係靚，但我冇諗到咁深層次，原來件衫唔啱我身形著，我冇留意呢啲。」又表示造型是搵朋友幫手，現會考慮聘請形象指導，Do姐追問：「嗰個朋友絕咗交未？」江嘉敏即解釋：「冇，朋友好好，佢哋有勸我嘅，但我就好堅持，我覺得呢件衫真係好靚，咁其實自己衰囉！」

江嘉敏成「車禍」榜常客　被批造型老氣兼自曝其短

假如「宇宙巨肺」鄧紫棋是歌壇「時裝車禍」的代表，那麼劇界的「佼佼者」必定是江嘉敏，皆因她幾乎次次現身大型活動都例牌炒車！好似2019年出席《萬千星輝頒獎典禮2020》，當時蜜運中的江嘉敏一身「幸福肥」，卻穿上一襲Bling Bling直間緊身魚尾裙，將其腰間贅肉表露無遺，相當趕客；而經常被批評打扮過於成熟的她，上月以黑色喱士襯藍色連身短裙Look亮相《周年慶典節目巡禮2022》，雖然「中門暗開」身形若隱若現，但仍遭網民狂踩顯肥兼老氣。

江嘉敏充斥負面新聞自認全因性格使然 被兩大高層嚴厲對待

江嘉敏早前被主持林柏希問到知唔知外界點睇自己時，江嘉敏九秒九答：「是非精吖嘛﹗呢樣嘢有少少唔開心嘅，因為自己性格衝動，好多嘢加埋變成觀眾覺得我好多新聞，一提江嘉敏就等如負面，扼殺咗我喺背後付出過嘅努力﹗」林柏希指江嘉敏過去負面新聞多多，包括有同湯盈盈去船P最後搞到姊妹反目收場，江嘉敏直言每次有負面新聞，樂易玲都會「訓話」她，江嘉敏在鏡頭前模仿樂小姐惡氣惡氣：「你知唔知自己今次點解出事呀？」林柏希又問樂小姐點睇她勾人夫的緋聞？江嘉敏就答：「樂小姐會覺得我太熱情，其實我已經收斂咗，因為我一直想工作環境開心，所以同咩人都啱傾，老中青乜都傾一餐，乜話題都傾到﹗」

除了樂小姐，曾勵珍都對她都好嚴厲，江嘉敏指曾因著leggings被珍姐大聲訓斥，江嘉敏話：「珍姐問我係咪去減肥，做乜著成咁，leggings係做運動著嘅，作為一個藝人要注意形象，其實珍姐講得好啱，我會記住﹗」江嘉敏直指樂小姐和珍姐對她好嚴厲﹗林柏希問電視台潛規則要送禮？江嘉敏即答：「我完全冇做囉﹗過年會送賀年食物，但唔會淨係送畀佢兩個﹗」

江嘉敏自爆有上位小生追求：係好sweet嘅﹗

江嘉敏在節目中自爆有男藝人瘋狂追求，她指對方為她作歌，「佢唔係歌手，但好有心機，用我個名寫咗首歌，想同我講嘅嘢寫晒喺歌詞度，仲拍咗個MV送畀我。」主持林柏希追問下，雖然江嘉敏未有開名爆，但就透露是無綫上位中的男藝員，並透露「後生嘅」、「未上到一線，努力緊努力緊」、「青靚白淨」、「好溫柔，斯斯文文」又指對方姓氏唔普通。雖然江嘉敏未有透露幾時被追求，但就指對方好好又sweet，只是自己狀態未適合再拍拖，所以拒絕對方，似暗指是年初和有米男友Anthony分手後、近月的事。

江嘉敏望大家多提點：我知大家覺得我寸又冇禮貌，我會變好﹗

主持林柏希畀機會江嘉敏自白，指讓外界重新認識她，江嘉敏就話知自己性格太主動，又太衝動所以導致令人有誤解，亦因此而有不少負面新聞，她指知道外界會覺得佢「為人好寸、冇乜禮貌」，但她解釋只是性格衝動使然，又話：「大家第時見到我，唔好淨係叫我影張相，要提我唔好咁衝動，大家keep住提點我，我就會變好﹗」希望江嘉敏學懂慎言的重要性﹗

江嘉敏早前被前粉絲爆 5宗罪事後逐一回應

第一宗罪：愛卸責

該名前粉絲指責：「江嘉敏最大嘅問題係在於從來唔覺得自己有問題。次次有咩事都剩係識不斷為自己辯駁，將責任推向人哋度，有無限嘅藉口不斷死雞撐飯蓋。」

江嘉敏第二宗罪：態度差

江嘉敏被前粉絲指：「EQ又低又串串貢又貪心，態度差過好多輩份比佢高嘅偽人，公司又點會想捧呢啲帶來咁多麻煩嘅人。」另外亦有一名網友爆料指：「早兩年賣衫，佢試過R sponsor，真人態度X，又串XX咁，呢頭同你笑哂口，轉頭就叫第二個講，多多意見！」

江嘉敏第三宗罪：貪心

該名前粉絲又指控江嘉敏貪心，曾在網上問粉絲搵氣球，疑似「攞著數」：「你喺出面點R Sponsor我唔在意，但唔好畀我知你真係無論去到邊都想攞人著數好冇；叫人幫你買嘢又唔識還番錢畀人。雖然冇損失好多錢，但呢啲係基本禮貌同尊重。」

江嘉敏第四宗罪：無交帶

前粉絲又指責江嘉敏在台灣時拜託其他明星的Fans代她購買三文治，但買完後無講幾時交收：「雖然都係食物，唔係D咩貴價嘢，但呢個係基本禮貌。就算人哋冇打算收你錢，你都應該答謝人哋幫你買，同埋好好交代番。以為自己好紅咩，出Trip驚死人哋知佢住邊間酒店，約佢交收又唔應。嗰日佢班機提早咗又唔交代聲。」

江嘉敏第五宗罪：當粉絲下人

江嘉敏又被指對待粉絲有如下人一樣，該名前粉絲說：「佢好高竇㗎，對著啲Fans呢好似我哋係下人咁。之前Gathering佢完全唔幫手set場，走又唔講Bye bye，話送英國手信畀我哋，但啲手信係擺咗一年先送，仲要唔係親手畀，而係叫Fans club其他人幫佢比。真係有心送嘅話會唔會係咁。對著Fans佢都咁，想像唔到對著其他外人會係點。」

江嘉敏反駁：完全係作出嚟

對這次是非，江嘉敏非常勞氣，認為該名網民並非她真正粉絲：「自稱粉絲即係假啦、扮係我粉絲，我相信我嘅Fans唔會做啲咁無聊嘅嘢，睇佢所講嘅嘢，佢真係唔了解我，係完全作出嚟，而且近排都好多假Account，我留意到佢哋不停講粗口、鹹濕嘢、惡意抹黑我，我都Block咗好多Account，同Delete咗成二千幾個留言！」

江嘉敏又逐一反駁該名前粉絲的指控，講到被指叫台灣粉絲買三文治一事，她解釋當時她在台灣拍劇，有一個台灣粉絲去探過他們幾次班，她說：「個粉絲好好，成日買水果、飲品、三文治畀我哋全部劇組人員食，唔係淨係請我一個食，佢都係我哋個劇幾個同事嘅粉絲，唔係我一個粉絲，我覺得粉絲嚟探班，問我哋想食乜係好普通嘅事，唔明啲人點解要扭曲抹黑人哋嘅好意。」

至於搵衫𢱑贊助，她指絕對冇可能：「首先我因為我有經理人，我公司會幫我處理晒所有嘢，絕對唔會叫任何一個粉絲去處理，其次我都識好多客戶，佢哋好疼錫愛護我，去乜嘢Event，佢哋會幫我揀適合嘅衫，我又有自己嘅Stylist，我嘅工作絕對唔會叫粉絲做，如果唔係點解要畀錢請Stylist？唔可以扼殺佢哋嘅努力同好意。」

同場加映：江嘉敏對人態度兩副面孔開工擺阿姐款

現年26歲的江嘉敏出道經常扮玉女，不過玉女假象背後卻姣出汁，除了拍劇愛姣對手，又被爆愛黐富二代，兩年前撻著電競公司高層Anthony火速同居，冧到仔依然未收手，去年中被爆同馮盈盈一齊去船P，卻因事件被撞破各執一詞變羅生門，姊妹從此反目，江嘉敏亦極速埋新姊妹堆，黐林凱恩同小小超女友郭嘉文玩埋，生活繼續多姿多采。

熒幕前經常笑容滿面、天真可愛的江嘉敏，對住助手原來另一個樣，更加男女有別。早前本刊就影到她和女助手出外工作時，頻擺阿姐款，黑口黑面向助手訓示，當正助手係阿四，相當難服侍！

據知情者透露：「咪睇Kaman 外表好似乖乖女咁，真係畀佢食咗你都未知，佢份人好有心計，鍾意黐埋班有錢仔度，啲富二代鍾意識女明星，佢就成日拉埋啲姊妹一齊去玩，有殺錯冇放過！不過，佢對男仔就嬌滴滴，對啲男工作人員會放晒電，但對女助手就會擺阿姐款呼呼喝喝，有乜安排唔周到就發脾氣，真係唔易服侍㗎 ！」

早前她由寓所出發開工，等車期間已經皺晒眉頭相當不耐煩，去到會合助手更加玄壇面口，完成上半場工作，同助手一齊等的士，等了幾分鐘未有車，更黑口黑面向助手發火，之後坐的士去到目的地，見助手拖住個篋還孭住大袋嘢，依然要對方幫她攞手袋，工作完畢準備歸家才自己拿回手袋，麻煩態度現晒形！撕開玉女假面具，江嘉敏醜行愈揭愈多，仲有冇人敢埋身？