黃心穎「奪命追魂Call」挽留成功 馬明密謀赴美國見面

編輯：C Lam｜圖片來源：Instagram、東方新地｜資料來源：東方新地

黃心穎「奪命追魂Call」挽留成功

黃心穎一手做成的「安心偷食事件」，結果累完全家累全台，受影響人士多不勝數，而直接身受其害的男友馬國明，則一直處之泰然，很快就公開回應事件，對於女友的不忠，馬明從沒有說原諒或不原諒，亦拒絕回應是否會分手，他只是處處維護，所以被封「絕世好男人」。然而馬明心中的悲憤，只有他自己最清楚，騙到人騙不到自己，出事後馬明一直沉迷在工作之中，日接夜夜接日拍《降魔的 2.0》，收工即回家休息。

馬明同心穎拍拖三年一直被利用上位，飽受情傷後依然為女友護航，並坦言知道事件後，好快沒有生氣的感覺，反而變成擔心：「我擔心牽涉到呢件事嘅所有人，任何一個受到傷害我都唔希望，我可以代表佢講少少嘢，我知佢都知道自己做錯，佢仲好年輕，未來仲有好長嘅路要走，希望大家畀啲空間佢！」

黃心穎追魂短訊同視像電話 馬明有心軟跡象

據知馬明不想事情變得更複雜，所以沒有多講，他也想等拍完劇集後有時間想清楚先再作決定，知情者透露：「心穎真係好帶挈，佢自己出事可以一走了之，可憐馬明要硬食，仲要扮冇嘢，睇得出佢呢兩個月開工都心事重重，已經捱到又殘又乾，所以佢想將感情事放埋一邊先。不過心穎就咬住佢唔放，日日都追魂發短訊同打視像電話，馬明最初都冇聽冇覆，想大家冷靜吓先，不過係人都知佢易心軟，最終佢都有keep住覆，畀心穎狂氹之後心情好番好多，不過 佢唔會再盡信心穎，亦唔會抱太大期望。早前心穎話知道自己有一段長時間唔可以返香港做嘢同見屋企人，仲話自己情緒唔好，又話會亂諗嘢，好想身邊有個人陪，佢知道馬明6月拍完 《降魔的2.0》有成個月休息，所以喊晒咁叫馬明飛去見佢，又話好掛住。事業已經一鋪清袋，心穎唯一可以挽回少少形象就係得到馬明原諒，而馬明見到心穎咁，亦好唔忍心，仲有成個月假，所以佢亦隨時起行。」

辛苦拍劇拍足幾個月，馬明擔正的《降魔的2.0》終於煞科，放大假至8月，終於可以靜下來解決感情事。

家人強烈反對

其實同心穎拍拖前，馬明慳家樸實，凡事以家人為先，與母親的感情更是好到不得了，曾說過婚後都要與母同住。不過自與心穎拍拖後，馬明為迎合年紀細一截的女友改形象扮後生，花錢置裝又破費買禮物哄心穎開心，不止買20萬一對情侶戒指面不改容，就連過百萬車都買，馬明更一改口風，明知母親與女友不能同一屋簷下，公開表示會努力賺錢買多層樓結婚，馬國明母親對於心穎早已甚為不滿，不過仔大仔世界，無奈被迫接受。

直至今年4月驚爆「安心事件」，癡心的馬明被重創，馬母被記者追訪時表現出前所未有的歡喜，心穎被撕開真面目，馬母以為不費吹灰之力就可以令馬明醒覺，卻不知道這段期間心穎原來一直在暗中挽留求復合。當知道馬明隨時會出發赴美後，馬母都好言相勸，知情者說：「呢兩個月嚟馬母都以為個仔會決心斬纜，因為唔見佢有提心穎，心情都好似平復咗，馬明唔係返工就黐家，同馬母關係又回復以前咁親密，馬母都有同馬明分析，話個女仔變咗心已經冇得救，就算勉強再一齊都會有條刺唔會有結果。馬明係孝順仔，佢唔會講大話呃阿媽，早前佢有提過會去探心穎，結果所有屋企人都反對，勸佢唔好再做傻仔畀人利用，不過忠言逆耳，馬明都係要去。」