高海寧忽然同關詠荷撞樣 網民驚呼：激似娥姐！
近日，性感女神高海寧 (高ling)為TVB新劇《殺手》轉新look，嚟個髮型大改造，先將一個到膊頭髮剪短，兼染上一個新髮色，成個效果出嚟非常有新鮮感！不過，唔少網民見到就話佢個新look同關詠荷撞哂樣！真係有咁似？
撰文：東方新地｜圖片：Instagram、Facebook、新傳媒圖片庫｜編輯：wingyee
高海寧轉新髮型
高海寧 (高ling) 最近為TVB新劇《殺手》轉新look，將原本到膊頭嘅頭髮一下子再剪短啲，兼換上一頭橙粉色的one-length新髮型，成個人望落感覺即時醒神哂之餘，仲要勁新潮！啱啱換咗個新髮型就梗係即刻影番幾張相同大家開心share吓啦！
唔止咁，高ling仲將近乎完成變髮嘅短片放上個人社交網，原來係燈光嘅照射下，髮型師將高ling個頭漂至金色。
再剪一剪頭髮，高ling𣊬間變成短髮金毛ling，望落都幾有型喎！
高海寧同關詠荷撞樣
不過，原來個髮型最終完成係橙粉色，非常特別！高ling仲特登影四格相俾大家睇真啲，唔知係咪角度問題，高ling淡妝加埋個新髮型突然好似同關詠荷撞樣咁，唔少網民都留言話指佢勁似娥姐！
關詠荷之前都試過剪個one-length髮型，望落兩個人又真係有幾分相似喎！唔知大家點睇呢？
《BB來了》高海寧演型格調酒師
性感女神高海寧(高Ling)，無綫劇《BB來了》廣受觀眾歡迎，劇情溫馨又貼地，除了主角李佳芯(Ali)最搶鏡外，高海寧喺劇中一頭短髮造型，演一位多作中性型格打扮的調酒師，其實都同樣吸睛呢！
為拍劇學調酒
高Ling在劇中係調酒師，有不少調酒嘅場面，為此，佢拍《BB來了》前曾經抽時間跟調酒師學調酒，難怪在劇中調得似模似樣啦！
有片睇：
驚現鬼剃頭
《BB來了》在去年11月初開拍，而高Ling去年10月底在IG上載咗一張用手揭起後尾枕頭髮嘅相片，見到佢頭皮出現一個大約五蚊銀咁大嘅「空洞」，高Ling就留言：「當身體已向你發出警報…要怎樣學習放鬆。」呢個就係俗稱「鬼剃頭」的斑禿嘅情況，好多網民都叫佢好好保重同休息，甚至提供治療方法。
原來非首次「鬼剃頭」
高Ling當時接受訪問話嗰排都覺得身體有啲唔舒服，成日出手汗。而佢6年前都試過出現「鬼剃頭」，那是第二次出現，所以都唔太驚：「後尾枕有兩個地方有五蚊銀咁大嘅位置甩頭髮，睇咗醫生話我壓力大，叫我放鬆心情，今次冇理，反正身體好番就會生番頭髮。」佢仲話媽媽、爸爸知道後即刻停工陪佢，又煮飯畀我食，仲話只可以為個女做呢啲，令高Ling好感動。
高海寧10年前選港姐入行
南京姑娘高海寧今年31歲入行以來都好搏！喺十年前參選2008年港姐競選，由於身材實在太突出，高Ling入圍不久已經備受關注，並被外間視為大熱。最後高Ling三甲不入 (三甲為張舒雅、陳倩揚及馬賽)，不過隨即成為無綫旗下藝人，踏入娛樂圈。
「象鼻頂胸」超經典
既然身材係最大賣點，高海寧當然唔會吝嗇，次次見人都谷到盡，2009年時高Ling去泰國拍攝《美女廚房》特別版，著住低胸吊帶背心的高Ling被象鼻夾起，洶湧上圍即「奪衫而出」，非常誇張，堪稱經典！
與「咪神」、「性感女神」劃上等號
高海寧出道後幾乎與「咪神」、「性感女神」劃上等號，無論出席活動、拍戲拍劇集還是綜藝節目都定必性感示人，大家亦清一色將焦點集中在其身材上。
慳足7年上車做業主
工作咁賣力，全因高Ling恨做業主！在2015年佢斥資約526萬，購入油塘新盤Peninsula East一座一個522呎中層兩房單位，當時畀咗大約105萬做首期，高Ling話儲足7年錢至上到車。上年底，高Ling和父母收樓時大舉V字手勢，睇得出佢哋好開心！不過高Ling話依家除咗每月供樓要兩萬蚊及其他支出，仲希望再儲多一筆錢作首期，目標係買多一層樓用嚟收租！
置業拒靠父幹
高Ling係慳妹一名，搵到錢都儲起用嚟做首期，甚少見佢周身名牌。入行初期經常見佢坐公共交通工具出入，高Ling話其實早喺08年已想買樓一家人住，但到12、13年儲到錢時，樓價已高出一倍，直至15年高Ling認為唔可以再等，是時候「上車」，她說買樓是自住而不是投資，升跌都冇所謂，最終同銀行做了30年的貸款，但她認為擁有自己的安樂窩，工作再辛苦也是值得！
高Ling說自己勤力慳儉的性格是似足媽媽，但一家人都不太會投資，覺得要有樓才有安全感。
圈中出名孝順女
高海寧工作向來不錫身，毫不吝嗇大晒豐滿身材，難免令人有啲負面印象，但其實佢係圈中出名的孝順女、好家姐！高Ling永遠把家人放在首位，每逢大時大節都一定將時間留畀家人，聚埋一齊食飯，更不時於網上分享家庭照，非常孝順！
高海寧弟弟 大學畢業
高海寧家中有個弟弟，其中較年長的一位去年11月大學雙學士畢業，高Ling上載一張與弟弟的合照，並留言：「I’m very proud of you!」戴上四方帽、穿著畢業袍的弟弟手持一隻Mario公仔，而高Ling則戴上眼鏡及黑色帽，不少人留言大讚兩人非常相似！見到高Ling展現燦爛笑容、興奮的挽着弟弟的手，就知佢真係好高興！
弟弟似坤哥？
另外有網友留言，指高Ling與吳業坤 (坤哥) 似樣，高Ling即搞笑回應度：「的細佬絕唔係偽毒！」咁唔通係真毒？
外婆是一生中最愛
高Ling在南京出生，自幼跟婆婆住到13歲，所有的冷衫衣物都是婆婆親手織畀佢，所以來港後高Ling時常惦念遠在南京的婆婆，就算要拍劇的時候都會趁空檔跟婆婆視像通話。放假時，更加會飛返去南京探婆婆，仲話見到婆婆的笑容就乜都值得！每次一談起外婆，高ling總顯得特別感性：「你陪我長大我陪你到老」，亦祝福婆婆健健康康，可以繼續陪著佢，這份跨越兩地的婆孫情實在教人感動。
有什麼Netflix、Disney+推薦及必睇劇集？
為大家整理一下截至目前為止小編追過的Netflix影集清單，必睇Netflix電影或劇集片單；Disney+方面，則可以一看電影片單推介。
