雨僑二胎陀仔成功湊「好」字 曾力數羅力威6大「問題」：好唔理解我！

雨僑二胎陀仔成功湊「好」字

現年37歲的雨僑與老公羅力威一向甜蜜，二人在2018年結婚後，率先在2020年誕下大女Harper，並於去年中秋節高調宣佈懷有第二胎，獲得不少網民送上祝福。日前，雨僑偕老公一同揭曉BB性別，二人在刺破氣球後飄出大量粉藍色波波，最終得知今胎陀仔，令二人開心地甜蜜相擁，雨僑更留言道：「It’s a boy雖然猜中的人已經很多，但我們還是簡單而隆重的揭曉一下，是弟弟喔！」拍拖7年、結婚4年的雨僑和羅力威成功湊個「好」字，十分圓滿。

雨僑陀仔較陀女辛苦

於2020年誕下大女的雨僑，雖然不是新手媽媽，已有為人母親的經驗，但她卻表示，陀仔與陀女的感受原來大有不同。她直指，是次陀仔比較辛苦，只因害喜較長亦較猛烈、肚子是尖的、皮膚變差和輪廓變得像男人，當中最令她擔心的是：「面貌變醜了水腫嚴重而且五觀（官）都變man了，讓我開始有點擔心會不會以後就長這樣。」

曾狂數老公羅力威6大「問題」獨力湊女勁辛苦！

雨僑直言與老公羅力威結婚四年來，最嚴重的一次鬧交是因為他們爭論應否請工人姐姐，她解釋: 「當個囡出咗世之後，好辛苦，咁啱嗰陣長老嘅身體狀況又一般，完全唔可以幫到我哋手照顧，所以我嗰陣要自己湊住BB。」她指湊B真的太辛苦，首三個月沒有一晚可以睡多過兩小時，加上她有兩隻貓要照顧，還有大量家頭細務，令她當時有少少產後抑鬱。

她希望聘請工人姐姐，惟羅力威堅決反對。他解釋，一開始以為照顧BB不是一件很辛苦的事，加上習慣二人生活，一下子無法接受有位陌生人共住：「我以為湊BB唔係我想像中…無我想像中咁辛苦嘅事之前，無小朋友之前喺屋企咩事都可以處理到，家頭細務對我嚟講係一啲好簡單嘅嘢。同埋唔想屋企多咗個…（陌生人），覺得怪怪哋。」

史無前例傷感情 靠工人促進夫婦之間和平

最後，二人達成共識，事隔八個月後終於請到工人姐姐，夫妻二人十分滿意姐姐。但雨僑認為，那次鬧交是史無前例地傷感情，沒有一個很輕鬆的方法可以解決這個問題：「因為兩個人都好辛苦又唔夠瞓…人生最唔夠瞓、最攰、最無助嘅時刻，一個人都幫唔到，其實係好絕望。同埋兩個人嘅情緒好繃緊，係最差嘅情況， 少少想原諒對方嘅空間都無。」直到有姐姐幫助，幫手緩和到問題，高呼「姐姐簡直促進世界和平」。羅力威事後反省過，承認自己沒有考慮到BB的出生會為他們帶來重大的改變同壓力，是自己輕視了這個問題：「之前無諗清楚，原來小生命每隔兩、三個鐘頭就會醒。」

羅力威最不能容忍對方的事：雨僑無手尾 甩漏多

除此之外，羅力威亦分享容忍不到雨僑的奇怪習慣，他舉例：「我自己睇到嘅嘢…㗩…點解佢睇唔到？！我就會開始埋怨、嬲。每次經過插蘇，佢叉親電，個插蘇永遠都係插唔實，永遠露出三份二或者二份一嘅插頭。」還有「我聽到廚房點解有煲水聲？煲親水，個煲蓋又唔會合實晒…個煲就會一直係咁煲水。」另外，羅力威指出，雨僑煮飯的習慣，例如指她開啟煤氣爐掣的時間過長，明明見到有火仍長按不放手：「硬係有啲人鍾意咁…」不過，他都知道自己「奄尖聲悶」：「又唔可以話佢，又唔係我煮飯。依家我會覺得隨便你啦，只要呢件事係安全就OK。」最後，他指自己不明白她為甚麼要用很多用具煮飯，此時，雨僑終於忍不住反駁： 「他永遠都數着我煮飯用多少碟、幾多筲箕。」

羅力威又說︰「屋企所有嘢我都知道擺係邊，但自從有咗姐姐之後，我而家所有啲野都唔知擺喺邊。」雨僑回應︰「而我嘅解釋只有一個，你睇睇我以前嘅廚房就講完啦，咁我邊度有位唔塞晒啲落個鋅盤度，我仲點切嘢點煮飯呢 ? Case closed！下一題！」

羅力威又指自己會很擔心雨僑有沒有「手尾」︰「有時兩個人出門口，你會擔心度門有無閂實。會有一個人去負責啲野閂得實，如果萬一真係唔係嗰個人（我）閂嘅話，係另一個人（雨僑）閂嘅話，你會擔心佢有無閂實。」雨僑埋怨︰「然後佢就會係全日餘下嘅旅程，每五分鐘就會問你一次，其實頭先你有無閂門呢？你係咪覺得有閂好呢？佢就會問足一日喇。」

雨僑最不能容忍對方的事：羅力威太粗暴

羅力威平時很粗暴，每次想坐在雨僑身邊時，身體都會大力碰撞她，雨僑投訴： 「佢成日以為自己個身型好似條燈柱咁闊，咁多年來我手手腳腳搞到咁多損傷流血始作俑者就係佢！」她形容老公的行為是「炮彈式坐低」和「核爆式躺平」，令到她多年都是遍體鱗傷，流晒血。羅力威反駁︰「你見我嚟緊，你唔識讓開兩格嘅？」雨僑難以理解︰「癡筋㗎！你見到人坐度，你望清楚先坐落去，但你攤開手腳就坐落嚟！」羅力威還擊︰「你開咗門一踏前，成日遞隻腳出嚟，被人踩喺後面，貼到你實一實，你估我想踩嘅咩？」雨僑再回應︰「你唔好喺佢嘅360度嘅一尺範圍內出現，你就唔會受傷。或者佢行緊過嚟，你就好避開喇！」

羅力威牛頭不搭馬嘴點做好？ 夫婦相處要記得3大法則

二人提及到，多年來即使對方說話時「九唔搭八」，他們都會明白到對方想表達的真正意思。雨僑指：「首先你要對於一啲佢經常會錯嘅嘢劃上等號，例如口罩等於牙套，露台等於平台，廁所等於廚房，呢啲野佢講親都錯，你就心中有數佢係講緊呢樣嘢，熄燈等於開燈，關小燈等於開大燈，你要知道佢講緊邊樣嘢。」她指自己跟羅力威不會共事，所以對方說話「九唔搭八」對她沒有甚麼大影響：「我就無咩所謂，除咗今次拍嘢，我係極少同佢一齊做嘢。因為如果我同佢一齊做嘢，我應該都頂佢唔順，所以，以前我哋都唔同公司，都有唔同既人照顧。最多依家關於BB嘅問題，要面對其他人，應該係話，我對住佢，我會知道佢講緊乜，如果我哋要一齊面對其他人的話，咁就會麻煩啲喇，咁但係好嘅呢係，呢個機會亦都唔係好多！」她指，夫婦相處有三大法則，每當面對爭執，都要道歉、補償、改過！

網民批羅力威自我中心：包容是愛情需要學習的一課

不少網民看畢片段都留言指羅力威，讚雨僑容忍程度很高：「睇得出雨僑EQ真係幾高，先生就係一般的男人咁，內向型+有點自我中心」、「羅生理論，只有別人錯，沒有自己錯，別人的細節數到足，自己的，沒有理別人感受卻不是自己的錯，而是別人沒有讓自己。雨僑小姐辛苦你啦，做呢種男人身邊既女人，沒有被體諒，還要被怪責做得不夠好。」有網民認同他們的日常非常真實，一段感情很多時候都會小吵小鬧，但對於雨僑和羅力威夫妻之間來說，鬧完、彆扭之後能夠和好如初才是最重要的事，而且人無十全十美，學懂包容是需要學習的一課。

即看完整影片吧！

原文刊於：SundayKiss