《迷》索空姐 陳庭欣 完美演繹拜金港女

資料來源：東方新地

陳庭欣 完美演繹拜金港女

劇集開始可見嘉穎一個大男人，同一大班婦女逼喺一間美容中心門外，原來係為咗幫女朋友換一部「全功能射頻美顏機」。換購時間開始，所有人一擁而上，嘉穎好快就被人愈推愈後，仲跌埋喺地下！

見勢色不對，坐喺地上的嘉穎就用手篤女士們的腳（抽晒水喎！），之後仲大叫有老鼠！眾人即時如鳥獸散，而嘉穎就一個箭步衝入中心內換貨。堂堂一個大男人、堂堂一個警察都要搞成咁，不過冇辦法啦，女朋友大晒！

搞咗一大餐，女朋友終於出場，原來係Toby飾演的索空姐！唔少男士都對空姐呢估職業情有獨鍾，而Toby着上貼身制服後，豐滿上圍幾乎「Big」爆件衫，再加上黑絲長腿，絕對係睇到流晒鼻血，排隊換機都抵啦！但原來Toby誤以為普通CID的嘉穎係重案組督察，而嘉穎就好似一般男人咁唔可以衰俾女朋友睇，於是繼續死撐：「我叫個夥計換之嘛！」

唔知情的陳庭欣繼續用高八度的聲線讚揚嘉穎，之後見到嘉穎腰間插住手槍，竟然想拎出嚟玩！唔係嘛大佬？

之後Toby聽到嘉穎話帶佢去食「咪之蓮」星級食肆，即時非常興奮，點個原來只係間街頭漢堡店，即時大失所望！之後嘉穎仲話要上山頂邊睇夜景邊食漢堡，Toby即時原形畢露，面都「西」埋！

落車睇真啲，Toby先驚覺部車係cheap嘢（日本車都唔係好失禮啫…），心諗做督察應該最少有七萬蚊月薪，點解唔係揸靚車？之後仲發現部車原來係警隊車輛，嘉穎連車都冇部，中伏！

前往山頂途中，突然有個疑似南亞裔人士衝出馬路，威脅嘉穎俾一百蚊佢，否則就用磚頭打爆佢架車。嘉穎本來可以行使警察權力制服對方，但為免自己揸警隊車輛載女朋友一事曝光，佢竟然決定妥協，放低一舊水之後走佬！

睇到呢度，小編即時諗起呢一幕經典……

Toby當然候O晒嘴，谷谷埋埋的不滿呢個moment要爆啦！佢大鬧嘉穎「冇錢、冇車、冇膽識」，叫佢留喺屋企唔好再遺害人間！其實以上幾點真係唔少男士共同的問題，Toby你又唔使咁直接嘅，小編好傷心……

港女Toby大爆發，即時同嘉穎分手，落車轉搭的士走人。被飛的嘉穎仲好心提對方攞埋部射頻機，點知Toby完全不留餘地：「出面貴嘅射頻機賣四千幾蚊，cheap嘢留番cheap精用啦！」