陳展鵬因單文柔改變一生 娘爆衣著成標誌 自爆曾做地盤散工又爛蒲做「狗公」

陳展鵬歌星夢碎

陳展鵬的人生並非順風順水，近年演戲為主的他，其實有個歌星夢未圓，那時候唱片公司寶麗金睇中陳展鵬想簽他做歌手，當時他只有18-19歲，唔知有經理人同冇經理人的分別，盲樁樁走去唱歌，搞到電視台工作全面停止，他說：「其實都好失望，喺TVB都做咗一段時間，本身想雙線發展，但就只能夠二選一，然後入咗去寶麗金唔夠兩年執笠。夢碎咗唔緊要，但冇錢，唔知之後點行，又唔想冇嘢入返TVB，唔想咁樣，然後好彩識咗出面電影公司人去拍電影，但唔夠一年又冇埋。」

陳展鵬事業低谷時 做狗公𥄫女

陳展鵬在訪問中直認自己生性頑皮，不過唔做犯法事，他表示入行後一高一低睇到好多嘢，他說：「嗰五、六年輸咗畀自己，做乜輸乜，個環境又差喎！我性格比較內斂，個樣又寸寸貢，唔會去主動搵人畀機會，後來愈來愈唔掂，焗住去敲門，臨時演員都去做吓，嗰時仲開始沉淪，去蒲吧唔知自己做乜……純粹去𥄫女，又冇錢，好頹廢。之後又教返打乒乓波又做地盤，地盤好搵日日Pay三嚿水，唔使睇人面色，做完嘢就走。」

陳展鵬被Bob嘲笑拍月曆卡

陳展鵬回憶當年辛酸，他說：「我諗每一個人入呢行都會有不如意，頭兩、三年都覺幾辛苦，辛苦係捱唔到，冇時間休息，我以前做運動員係11點瞓，但去到TVB凌晨4點起身，放工又天光先放。個時拍戲唔興有凳，係啲大哥大姐先有得坐，我哋就企，有時十粒鐘。個段時間係要捱囉，生活節奏同體能搞唔掂。」

後來陳展鵬去亞視重頭做起，被阿Bob笑指當時受力捧月曆卡都排頭幾位，陳展鵬尷尬笑，他表示早年拍的電影與電視劇好虛火，由亞視再返無綫，人工由4萬減至1萬，陳展鵬話交租都要8,000蚊，本打算食老本三年再無起色就轉行，好彩又畀佢博到。

陳展鵬感恩「黑妹」李麗霞走出事業低谷

不過在低谷中幸得「黑妹」李麗霞助他登台賺外快「第一次Show人哋畀幾多錢佢，佢畀番個筆錢我，$12,000同我份糧差唔多。」黑妹姐一個仙都沒有抽取令他非常感動，更主動介紹朋友圈給他拓展人脈，因此他非常之感恩，亦明白到做得娛樂圈都是靠大家互相幫助和照應。

陳展鵬表示老婆單文柔有初戀感覺

近年事業算得意，陳展鵬更遇上單文柔，結婚生女同年發生，好幸福，他在訪問中自爆當年單文柔選港姐做評判已有私心，評「最上鏡小姐」時畀單文柔最高分，不過憑他一人之力都幫唔到單文柔拎獎，陳展鵬話年幾後才真正與單文柔有接觸，仲好大膽話：「當年佢都冇依家咁靚……結婚因為神推鬼㧬」同埋「年年都有港姐，原來我浪費咗好多機會。」陳展鵬表示單文柔畀到一種初戀的感覺「好純、好乖、好簡單、諗嘢完全唔複雜」，有讚冇彈。

陳展鵬單文柔戀情不被看好 護花令感情升溫

當年陳展鵬正在內地拍攝劇集《天命》，陳展鵬與老婆的地下戀被媒體揭發，戀情曝光後被一眾網民認為胡定欣才是正印，更公開到單文柔社交平台留言炮轟，但因工作關係未能陪伴在太太身邊，只從旁建議她一星期內不要外出，希望太太給予時間讓他好好處理，免得事件再被報導。事後陳展鵬出面護花，更公開答謝單文柔的陪伴：「佢真係好單純又陽光，佢將陽光感染埋我，我以前成座冰山咁，現在慢慢被佢融化。」更表明與胡定欣從來沒有拍過拖，在這件事情後兩人感情更堅固。

自爆全因「電視劇情」求婚成功

陳展鵬坦言自己36-37歲已經準備好結婚，在拍拖兩年後，已忍不住要向太太求婚，但當時單文柔不願相信，更認為陳展鵬「講笑」覺得太假，在求婚失敗半年後，陳展鵬全靠《逆天奇案》電視劇情，當時摺了一隻戒指給林夏薇，同一個求婚心思用在單文柔竟然就成功了！

他指「趁佢瞓覺嘅時候摺咗隻戒指俾佢，然後將戒指套喺佢手指，第二日瞓醒，佢發現點解會有隻野喺度？然後就成功求婚！」場面見當搞笑！陳展鵬更非常多謝編劇，如此貼心為他想到一條絕世求婚好橋！

陳展鵬為單文柔及「小豬比」有更好的生活買軍澳晉海

為了太太單文柔及「小豬比」有更好的生活環境，更入住將軍澳「晉海」千萬豪宅，組織一個安樂窩。其實陳展鵬在2017年時便以母親名義花1,280萬購入將軍澳晉海一個700呎3房高層單位，有時當時陳展鵬一心想與中風後行動不便的母親同住。隨著與單文柔結婚後便一同入住將軍澳晉海單位，直至單文柔結誕下女兒「小豬比」才與母親分別居住。