鄭中基高調炒何慶湘來龍去脈 疑似涉及三角戀?余思敏出面拆彈

機動娛樂發聲明 確認何慶湘已離職

鄭中基近日在社交平台發表聲明，表示：「由於發現何慶湘工作及道德操守有問題，本人與機動娛樂立即終止合作，有關工作交接問題會另作安排。」震驚眾多粉絲和網民，機動娛樂隨後亦發布聲明，確認何慶湘已於8月3日正式離職，而鄭中基則計劃在完成兩場演唱會後休息一段時間。

陳志雲爆鄭中基發文表達不清晰

在網台直播中，陳志雲首先透露，他雖然不認識鄭中基、余思敏和何慶湘三人，但有和鄭中基關係密切的人向他透露：「話今次佢只係寫嘅時候文字表達唔準確，唔係終止同機動電視嘅合作，係終止同何慶湘合作，間公司仍然都係佢嘅。鄭中基本身好多錢，都唔憂，佢唔係再科錢落去，呢個機動電視仍然會繼續，只係佢唔同何慶湘合作，佢冇理由終止同自己公司嘅合作。」

李婉華就留意到余思敏在鄭中基發表聲明前，已在IG限時動態預告了將有重大消息，並標註了鄭中基、何慶湘及機動電視台，惹人遐想。

稱員工或助手仰慕老闆好常見

陳志雲在直播中指出，員工或助手仰慕老闆和多了情感投射，都是十分常見的事。他分享了更多內幕：「鄭中基做幕前，佢搞呢個台，對營運唔係好大參與，佢抌咗錢出嚟亦都冇再注資，而家簽咗啲藝人，開支都大，聽聞坊間話何慶湘係好勤力，好賣力，周圍『R』數，但係就有啲八卦嘢，佢做經理人淨係同Ronald接工作，太太嘅工作佢唔接，有啲拗撬出咗嚟，太太出咗啲Post，可能對佢兩個啲關係唔高興，後來攞晒啲數嚟睇，覺得啲數唔係好對，搞到而家咁樣。」

余思敏疑不滿何慶湘代筆出po

但陳志雲續指何慶湘的朋友都相信她並不是會「穿櫃桶底」的人：「鄭中基最後出呢個Post，話要中止工作關係，覺得佢做嘢有問題，有熟鄭中基嘅朋友就話唔係好似佢，佢唔會寫到咁撇脫、咁絕、咁勁，話人哋幫佢代筆都唔定。呢個真係唔知，但係有啲暗湧喺入面，而家應該係佢太太掌管返個營運。」

陳志雲笑言鄭中基後來再出Po稱有情緒困擾，說不定就是因為夾在兩個女人中間：「一個係工作關係，一個係自己另一半，唔困擾都好難，哈哈！」

陳志雲教路搵助手一定要搵同性

李婉華則大膽假設何慶湘為人有機心，可能得一想二，想用圈套套著老闆，並指：「佢郁都郁唔到，要出動到正印大婆要出聲、做嘢，講到道德操守，作為一個咁腍善、冇所謂、咁錫人嘅鄭先生，又點會咁樣寫呢個何小姐，話你有操守問題？佢唔會寫得出，在公在私都有感情。」

最後陳志雲建議搵助手一定要搵同性，或者好醜樣的異性。李婉華就直言入行多年，見過娛樂圈有很多女助手乘虛而入，當一出埠工作，助手、經理人就如入無人之境，會有機心，知道對方有另一半，仍想試試自己能力。

網民列5大揣測

1. 鄭中基偷食湘姐

事件已發酵兩日，但鄭中基、機動娛樂同何慶湘都未有再發表回應，因此引來不少網民猜測，有網民就估係鄭中基偷食湘姐：「第一次睇佢哋個台時，見個湘姐同暴龍哥D對答、睇條女對住暴龍哥D眼神，已經有種好奇怪嘅感覺」、「似係鄭中基同湘姐有路，畀老婆發現咗，最後鄭決定斬䌫」、「要由老婆開波，仲要係大婆食花生爆大鑊語氣，似感情道德問題」、「睇佢老婆前排ig啲post，感覺唔簡單」、「最合理係出軌，其他錢銀/工作上佢老婆冇必要參與+出預告post」等。

2. 鄭中基被老婆騎劫社交帳號

更有網民指鄭中基社交網發出的第一個割蓆post，是由鄭太余思敏所出：「好明顯頭PO老婆出」、「如果係老婆岀post，搞人老公都可以係道德操心問題」、「嗰個post咁寫，都估唔係大佬出啦」、「直覺話我知點po唔係暴龍哥本人出，係佢老婆」等。

3. 湘姐穿櫃桶底偷公司錢

其中因為鄭中基指控何慶湘「工作及道德操守有問題」，所以出現了「湘姐穿櫃桶底」的揣測：「其實cap水似最大嫌疑啦，之前明明接咗堆廣告都話個台告急要廣告，做個選拔又話用咗好多錢搭景」、「勁似最近台灣一個YouTuber有AB約嗰啲問題…穿咗成8位數字台灣嗰件」、「可能係暗啞底收回佣來幫檯接job」，但亦網民指出「穿櫃桶底就直接ICAC啦」、「咁佢應該要採取法律行動，唔係中止合作就完」。

4. 湘姐犯法鄭中基急割蓆

有網民就猜測是湘姐進行了違法行為，所以鄭中基才會急於和她劃清界線：「間公司簽左啲大佬唔想做嘅contract，然後大佬被逼割蓆」、「用公司名接Job有問題，唔想上身」、「可能女方攪左d大鑊野，甚至犯法，可能類似舞台偷工減料之類」「會唔會經理人湘暗地做違規犯法行為，引致鄭中基自己不知情下都犯法（刑事要坐監）所以先以呢個方式劃清界線？」

5. 成件事係大整蠱

由於當事人一直冇再出聲，有網民就存有僥倖心態：「其實會唔會係整蠱？大家都冇移除到@湘姐，希望係整蠱」、「定係真係整蠱？畢竟佢哋認識並共事好似都有7/8年了喔。無可能到現在至發現詬病」、「成件事真係好匪夷所思」、「依家玩大咗收唔到科，所以唔出聲了」

鄭中基發長文自稱患抑鬱及酗酒

鄭中基今日再發表長文，不過內容由始至終都冇講到經理人衰咩，只將重點提到自身健康嘅聲明，包括患抑鬱及酗酒兩大情況，鄭中基更指太太會陪同自己到美國接受戒酒療程。好友林敏聰回應支持：「頂字（住）老友」，不過亦有網友猜測：「都係無交代同解釋到究竟關何慶湘咩事喎…」「酒後亂性？」亦有估計此聲明是化解公關災難嘅手段。

鄭中基澳門搞騷唔知開唔開得成

鄭中基將於今個星期六（10日）到澳門上葡京綜合度假村舉行My Only One音樂會，有網友擔心鄭中基自身健康問題，未知能否如期進行。

享受被稱為老闆娘 疑想做「劉嘉玲2.0」

陳志雲續指鄭中基與何慶湘終止工作關係後，鄭中基的事業管理權應該由余思敏掌管。事實上，余思敏一直喜歡被外界稱為「老闆娘 」。早前有網民在IG留言稱余思敏為「老闆娘 」時，余思敏親手點讚，更指「喜歡這個稱呼，多謝你」，似乎想做「劉嘉玲2.0」，為丈夫打點事業發展。

不介意高調大方批准楊千嬅做嘉賓

曾經做過幕前的余思敏，向來不介意為鄭中基高調現身。在2017年鄭中基舉行紅館演唱會時，余思敏就帶同一對仔女到場支持，到Encore更上台同鄭中基情深一吻。就算鄭中基「舊愛」楊千嬅做鄭中基演唱會嘉賓，余思敏都大方批准，認真唔話得。

盤點5大巨星身邊女人

1 | 劉嘉玲（梁朝偉太太）

劉嘉玲近年為梁朝偉所付出的一切，大眾有目共睹。劉嘉玲不但鼓勵梁朝偉接拍荷里活Marvel大片《尚氣》，令其人氣再度急升，成功打入荷里活市場；亦時不時在綜藝節目或社交平台大談梁朝偉鮮為人知的一面，使得梁朝偉的人物形象變得更加立體化、更加正面。

2 | 發嫂陳薈蓮（周潤發太太）

與發哥結婚36年的發嫂陳薈蓮是新加坡富商之女，86年與發哥結婚，兼任發哥的經紀人，多年來無論衣食住行，下至買餸、上至買樓，發嫂都手到拿來，她為發哥處理好工作和生活上的大小事情，對外她是女強人，但內心卻是一個仰慕丈夫的小女人。

3 |牛春龍（吳宇森太太）

大導演吳宇森與太太牛春龍結婚45年，兩夫妻今年先後罹病，二人互相照顧，陪伴對方對抗病魔。身為大導演吳宇森背後的女人，牛春龍多年來一直專注照顧家庭之餘，又在丈夫拍電影時，為對方寫拍攝側記，接受媒體訪問，為丈夫的電影作宣傳，名副其實的賢內助。

4 |林惠嘉（李安太太）

另一大導演李安與太太林惠嘉的婚姻亦感動到大批網民。林惠嘉在李安事業6年期間，不但成為家庭的經濟支柱，更以行動和言語支持丈夫的夢想。到李安成功成為名揚國際的大導演時，林惠嘉謙虛表示自己並沒有支持他，只是沒有拖對方後腿，令不少網民都感到非常敬佩。

5 |郭藹明（劉青雲太太）

94年開始拍拖，98年拉埋天窗，劉青雲與郭藹明結婚超過二十年。青雲曾在一次訪問中坦言老婆是他人生最好的禮物，並在15年奪金像影帝時，在台上感言冧到老婆 眼濕濕：「我要多謝我太太，每次當我揸住隻太空船，飛到去宇宙唔知邊一度嘅時候，你總係有辦法，令我好安全咁返嚟地球！」皆因婚後息影的郭藹明為老公打理頭家功不可沒，成為劉青雲背後最強的支柱。