《白色強人》72歲姜大衛結婚45年陪妻捱過大腸癌 貼心傍實李琳琳

撰文：東方新地｜圖片：新傳媒圖片、IG｜編輯：Cyan

【白色強人】72歲姜大衛 貼心傍實李琳琳

有種老戲骨怎麼看也不厭、形象正直深入民心，看見他不止有畫面還有聲：「再鋒利嘅刀，都有生鏽嘅一日⋯⋯」不過在《白色強人》演院長的John哥姜大衛今次不是賣廣告，身體力行證明這把刀耍足72年都依然健壯，不止幕前演出氣場依舊，私底下結婚45年仍貼心愛護妻子李琳琳。七年前陪妻捱過大腸癌感情更勝從前，日前John哥現身九龍城，接載剛剛與友人會面的李琳琳、再體貼做埋司機送走友人，然後兩公婆順路去雜貨舖入貨再回收汽水玻璃樽。兩盤汽水、加起來48個玻璃樽，72歲John哥輕鬆拿上手，左右手一邊一盤親自搬入舖頭，老而彌堅未生鏽！

演藝世家又有新血

從童星到武俠小生到近年重返無綫繼續擔當要角，姜大衛與同輩演員相比，身子依然硬淨兼且保持一年兩到三部劇極高產量，曾經在訪問中更揚言不想退休做廢老，只要有得拍會一直拍到老死「上天」 為止。其實父母、繼父、兄弟、女婿都係演員，姜氏演藝世家今年又有新血加入。姜大衛49歲時老來得子生下孻仔，人稱「細John」姜卓文一樣醉心演藝一心入行繼承父親衣砵。去年大學畢業後即回港密密試鏡儲經驗，剛剛更落實參與ViuTV《全民造星》第二季成為最後96名入圍選手。雖然John哥話過希望兒子入行靠自己，不過耳濡目染有 演藝細胞、加上血統優良高大靚仔型格似韓星，細John一入圍已經不負所望成為矚目大熱，John哥今次「飲得杯落」！

4歲入行做童星,姜大衛話永不言休唔係得把口,身子硬淨保持高產量,今個月又有新劇出街!

李琳琳約見朋友會面，John哥亦好有風度做司機送走友人。

結婚45年、還同心捱過大病，出名愛妻又顧家的John哥每次出動，一定見太太李琳琳在左近！

七年前大病一場患上大腸癌，丈夫兒子悉心照顧 總算康復，現年70的李琳琳面色紅潤、狀態大 好，一見John哥座駕駛至，行動矯健極速登車。

孻仔姜卓文 入圍《全民造星》

23歲孻仔姜卓文去年大學畢業即部署入行， John哥說過不會出手帶入行，今年果然看到細John靠自己入圍成為《全民造星》96 名入圍選手之一。

49歲時老來得子，John 哥與太太還有兩個大女都錫到細John姜卓文「燶」，而細John亦乖仔又孝順，經常見佢陪伴兩老左右。

細 John一邊參賽，一邊照樣放拍拖相放閃，還明言「ILOVEYOU」。

姜大衛 李琳琳結婚45年

姜大衛和李琳琳自1974年結婚，育有兩女一子，大女姜依蘭07年嫁曹永廉，二女姜依文亦已組織家庭，現居溫哥華，細仔姜卓文是李琳琳於1996年以48歲高齡誕下。2011年中李琳琳被爆患上大腸癌，手術後卻因癌細胞擴散至淋巴位置，要進行化療，被傳媒拍到激瘦如同紙版人，不過經過老公姜大衛悉心照料，兩年後李琳琳終於戰勝病魔，兩公婆感情更勝從前，John哥早年接受傳媒訪問時表示：「嗰段時間我的確係好擔心，唯一可以做嘅就係共同面對。四十幾年感情，其實唔需要講出聲都知，大家都係冇咗對方唔得嘅！」

婚姻之道 互相包容

講到45年婚姻相處之道，姜大衛認為最重要係互相包容，佢話自己年輕時好多事情都會堅持己見，看不順眼就會出聲，但隨住年長的看法也有所不同：「之後會明白其實好多執拗都冇乜大不了，總之唔傷害到自己同別人就得啦。兩公婆嗌交，都係因為睇法唔同。後生時，我哋總係想改變對方，但慢慢就會知道，有啲嘢係冇得迫嘅！」