梁文禮怒斥姜濤AL「侮辱張國榮作品」 再被踢爆私下狠評巨星冇料！
梁文禮私下批評梁詠琪被鬧是雙面人後，以為告一段落，點知梁文禮再被爆料，指他是雙面人慣犯，經常公開讚完歌手，轉頭便在私人FB帳戶踩到一文不值，陳奕迅、姜濤、MIRROR、盧瀚霆等都被佢狠狠批評！
梁文禮怒斥姜濤AL「集體強姦張國榮作品」
梁文禮睇完梁詠琪個唱，公開畀讚，但私人FB帳戶就狠批：「個flow差，歌編得差，舞差，當然佢唱得差啦~其實都預咗，但係無諗過咁離譜，唱K咁！連《愛自己》都入唔到呀大佬，我全晚都睇得好掹，坐立不安……」
梁文禮爆陳奕迅黑歷史：唔通寫佢黑面唱歌咩？
原來梁文禮係慣犯，向來在私人FB批評歌手之習慣，去年尾陳奕迅在紅館舉行跨年騷，大獲好評，梁文禮睇完騷在IG大讚陳奕迅，並寫道「久違了的呢個陳奕迅」，大讚個騷完美，由陳奕迅的演出、以至燈光、舞台、舞蹈員等都非常好。不過其後卻把此Post和與網民的對話截圖，在私人FB分享，並寫出另一番話：「唔通我要寫佢（陳奕迅）之前黑面唱歌，唱到發脾氣，唔記得《四季》歌詞，喺我同麻利面前拋咪拋到跌咗支咪落地！」去年陳奕迅翻唱五首其他歌手的作品，當中有莫文蔚的《慢慢喜歡你》，梁文禮亦有意見，直斥：「如果你好似我咁鍾意《慢慢喜歡你》，就千祈咪L聽陳奕迅個版本」。
梁文禮斥姜濤、AL翻唱哥哥歌曲：集體強姦張國榮作品
梁文禮在私人FB曾轉載一篇講姜濤、盧瀚霆Anson Lo翻唱張國的歌致敬，梁文禮加入個人意見：「集體強姦張國榮作品」，對二人翻唱張國榮作品好反感。不過奇就奇在梁文禮曾在IG公開大讚姜濤，大讚姜濤是天生的表演者，「100% Natural Born Artist」、「上台殺死人，如有神光照射」，果然雙面人。
批評MIRROR出周邊商品醜
梁文禮又曾批MIRROR：「點解MIRROR啲周邊公仔可以咁醜？設計完全無心兼無良心，點頭通過所有嘢出得嘅都係，你哋邊個會買？千祈唔好畀我睇到，即刻unfollow你！」梁文禮更將與友人對話截圖在私人FB公開，友人追問他買唔買到MIRROR演唱會飛，梁文禮反問：「一定要睇咩？不如做啲更有意義嘅嘢啦！」
梁文禮轉貼楊千嬅：你咪X去睇佢演唱會
梁文禮亦曾批評有岑寧兒：「個個都話YoYo係天使嘅聲音，你聽過天使把聲咩？可能係Minions咁都得㗎嘛」，梁文禮又曾轉貼楊千嬅的Post：「你咪X去睇佢演唱會，以後唔同你打牌！」
不過梁文禮都有知音人，指他「講真嘢唔得咩？」、「係自己私人FB講嘢都唔得呀？」、「無拿拿再爆料，係咪梁詠琪啲公關做㗎？」
周啟生撐梁文禮被梁詠琪粉絲狙擊
唔單止咁，樂壇前輩周啟生都出聲撐梁文禮，狙擊埋梁詠琪一份：「一個DJ出post批評一個，根本唔識唱歌嘅名歌手，對我來說這是絕對公平合理的，人人也可以說自己心裏面的一番說話。最惹人爭論的，就是他用另外一個帳號，想問一問大家，身邊有幾多人有多個一個帳號？一班水平低嘅人，永遠會支持同佢自己差唔多渣嘅歌手。成件事最奇怪嘅就係佢要道歉，人批評你，你批評人…..何罪之有？」即遭梁詠琪粉絲圍攻。
周啟生：無道理就撩交嗌！
疑似梁詠琪粉絲留言鬧爆周啟生：「最大問題係梁文禮係雙面人」，周啟生回應：「人格問題，同佢講嘅內容真偽無關」。有網民就留言指好懷念七、八十年代香港樂壇，指香港現今有實力的歌手不多，周啟生即回應：「一班食客，垃圾都可以吞落肚，仲邊度有好嘅廚師？」周啟生被梁詠琪粉絲瘋狂狙擊，他不客氣回覆：「鍾意盲撐嘅自己出post，我唔會去畀意見，唔鍾意我嘅 post，唔好入嚟睇，搞事嘅人，我見一個踢一個」、「不要掀起罵戰，我只不過講我意見，無道理就撩交嗌！」
MIRROR 首度回應
MIRROR今日（2月24日）難得齊人出席活動，眾人在活動後接受訪問，姜濤除了講到自己的健康狀況，又直認近日已升呢做業主，但因為新居被曝光，所以冇得自住，正考慮放租！
姜濤認做業主考慮放租
有記者恭喜姜濤近日升呢做業主，姜濤直認：「多謝！呢個就係我放鬆嘅手段！」而被問到會唔會再買多幾層？他笑言：「希望廣告商多啲搵我，呢層我本身諗住自住，但依家搞成咁（指被曝光），可能會畀屋企人住，依家仲商量緊。」隊友紛紛建議他租出去，或者買完即刻賣返出去，Lokman更提出發達大計，就係大家夾錢買一間屋，話姜濤住嗰度，跟住再賣返出去，就可以有錢賺！
Anson Lo：覺得好聽同難聽係冇對與錯
近日Mirror出席活動，被問到最近DJ梁文禮在其私人FB帳戶狠批MIRROR周邊公仔醜樣，及指姜濤、盧瀚霆Anson Lo翻唱張國的歌曲是「集體強姦張國榮作品」等，Anson Lo表示無梁文禮的私人帳戶，所以不知道他的用字，但指：「即使真係好harsh都好，都係好make sense，每個聽眾都有自己taste and preference（口味和選擇）。覺得好聽同難聽係冇對與錯，我估大家都係着重唱功同埋音色方面，呢樣係我哋每出一首歌都想有進步嘅地方。」 姜濤就直言因為已戒玩手機，所以不太清楚成件事的詳情：「所以我唔方便去講啲乜。呢排我都有好多批評，所以我嘅心態係任何批評對自己都係一個好珍貴嘅批評。」
AK力撐梁文禮：我哋有私下聚會
而AK就表示：「我哋同阿禮都認識，呢幾年佢都會畀好多唔同嘅advice我哋，我哋真係做得唔好嘅時候，佢都會直接同我哋講，所以我覺得大家唔好將呢件事放得太大，講真喺一個private嘅account，同埋香港有言論自由，每個人都可以講佢自己鍾意嘅意見，同埋發表佢自己想發表嘅嘢，所以真係唔評論咁多。我哋呢幾年都有私下聚會，對我哋嘅歌有咩意見都會直接講，所以唔會影響我哋之間嘅感情。」
有什麼Netflix、Disney+推薦及必睇劇集？
為大家整理一下截至目前為止小編追過的Netflix影集清單，必睇Netflix電影或劇集片單；Disney+方面，則可以一看電影片單推介。
