林子善補擺喜酒 眼濕濕講愛的宣言

撰文：東方新地｜圖片：東方新地 | 編輯：venusos | 原文：東方新地

林子善補擺喜酒 眼濕濕講愛的宣言

原來林子善曾經因為怕拖累現任太太董佩欣而跟她提出分手，後來因為唐詩詠的提醒而決定與太太共度餘生。

唐詩詠在ig中寫道：「有一天這個男孩跟我說：「妹，我不想拖累她，我跟她分手了，希望她能找到個更好的。」
我說：「那好吧！不過，要是她真的愛上別人，你將會永遠失去她。」
男孩聽到後沒有回答，突然有一天他跟我說：「妹，謝謝你，我們復合了，我要結婚了！」
然後我發現他一天比一天更愛他的女主角
放棄一段感情很容易，堅持卻很難
很高興今天你找到了你的最愛，更做到了你的承諾

我真的很替你開心 Love you 祝男孩跟女孩永遠幸福快樂！」

林子善與去年已註冊的太太董佩欣今日舉行婚宴，晚上兩人會見傳媒，子善表示原本只擺50圍，但因為太多親朋戚友畀面出席，所以加到63圍，預計婚禮支出約7位數！子善同太太好識做，嘴對嘴錫足一分鐘給大家拍照！

新郎子善好眼淺

提到會與太太共度餘生，子善都忍唔住講到眼濕濕，佢表示不想空口說白話，行動最實際，首先會照顧好自己身體、做好自己工作，咁先可以好好照顧太太，一齊走埋下半生。子善提到較早時未講愛的宣言已經喊晒，斟茶畀外父外母又好感動，自己好眼淺！

兄弟團迷倒姊妹們？

提到早上接新娘過程，子善招積咁話易過借火！型男兄弟團出馬，班姊妹見到袁偉豪已經開咗三分二門，之後見到馬國明同鄭嘉穎就更加失晒魂，幾乎係自動開門！子善又稱玩新郎時食咗鹹竹蜂加wasabi，咳到快死！

唐詩詠第一次做兄弟

兄弟團成員馬國明之前被指係「千杯不醉」，馬明接受訪問時自嘲係「千杯茶不醉」而已，不過身旁的詩詠自稱未見過馬明飲醉，飲酒幾乎係冇底！第一次做兄弟的詩詠經過今次後有晒經驗，話第時到呢班兄弟結婚都無問題，馬明聽後即刻表示：「我？十年八年後啦，未知呀。」

鄭嘉穎都係兄弟團成員之一，佢表示早上接新娘時好順利，都係食吓Wasabi同蟲、跳跳舞，難唔到佢哋！另外被追問幾時同女友陳凱琳拉埋天窗？嘉穎就話有好消息會通知大家，今日始終係子善的大日子，自己同子善相識多年，睇住佢完成人生大事，非常開心。

有唔少圈中人都有出席子善婚禮：

《果欄》林子善 係娛圈顧家男

林子善在屯門屋邨長大，16歲跟周星馳入行，在《喜劇之王》飾演「洪爺」一角，少年得志，但後來周星馳同拍檔拆夥，林子善因此近三年完全冇工開、零收入，之後做過時裝店sales、夜場DJ，到08年獲黃子華引薦入無綫拍《奸人堅》，事業先開始好轉。2012年，林子善與拍檔夾份投資首間龍鳳冰室，至今已有四間分店。

林子善話因為試過有兩年冇工開，當時生活好慘也曾經捱過，所以如今事業有起色，對未來嘅事佢會諗得更周詳：「依家要照顧老婆，要諗得更長遠，諗定之後兩年目標係咩，我要努力搵錢買樓，同太太組織家庭，因為之前買樓畀父母，又幫阿哥上車買樓，依家終於可以為自己打算吓！」

買樓贈父母幫阿哥上車

原來林子善首次置業，係以零首期方式買入屯門豫豐花園一個200多萬元單位，佢將豫豐花園放租兩年，之後自住咗三年後放售，把賺到嘅錢買入屯門藍地一間三層高嘅村屋送畀父母居住，佢話當時樓價215萬元，畀咗六成首期，每月供款只需3,000多元，而佢自己就為咗睇住冰室嘅生意，租住緊大坑一個單位。

義氣仔女

「其實幫阿哥上車嘅錢，我係用老婆本，但兄弟一場，既然哥哥開到聲一定會幫，姪仔出世，哥哥同阿嫂又唔太識理財，長此落去會好危險，我需要為佢諗一諗，既然佢想上車，我就幫佢，連自己兄弟都唔幫就真係冇義氣！」

除咗供緊買畀父母嘅村屋，原來林子善2015年仲買入咗東涌東環一個近300平方呎嘅一房單位，樓價逾400萬元，林子善畀咗27萬元印花稅，另由於壓力測試及職業問題，需要付出六成首期：「暫時計劃收樓之後會放租，或者等今年結婚時做新居。」又大呻：「爲咗供兩層樓我出盡九牛二虎之力，依家係窮人！」

4月婚宴 豪使百萬

35歲林子善由去年2月6日向Kary求婚成功後，籌備逾一年，如今終於筵開50席搞婚宴，期間豪使近百萬港元，林子善之前話因此要努力賺錢：「我同佢講『你想點就點，幾多錢話我知！』，一生人一次想佢最鍾意，我個人冇所謂！」

去年10月16日，林子善和Kary正式簽紙結婚，其後兩人就豪花十多萬到馬爾代夫拍攝婚紗照，再去泰國旅行。

甜爆放閃：「老婆要靚最緊要」

雖然婚紗照中林子善一身健碩肌肉勁吸睛，不過他就搞笑話：「請大家將注意力集中放在我漂亮的寶貝身上，在她身邊的男人只係窮到衫都冇得著而已！不需要有評論，我心裡她任何嘢都是最好的，正所謂『新人去影婚紗照，老婆要靚最緊要』！」

幫林子善影婚紗相的攝影師Jack Tang話在馬爾代夫拍攝時天氣時好時壞，令他非常擔心，幸好雨過後見彩虹，為子善帶來完美的婚照：「傳聞見到彩虹會帶來好運，祝福呢對好襯好夾嘅情侶！！之後全日影相都好天氣，真幸運！！」

摩天輪下求婚

去年2月6日在日本東京台場摩天輪下，林子善化身Kary最愛的卡通人物「阿拉丁燈神」，並將價值近20萬元的1.6卡鑽戒放在「神燈」中跪地求婚，令Kary感動爆喊，但仍慳家地質問子善隻戒指「點解買咁大隻？」跟住仲伸咗子善兩腳！不過事後Kary仍感動表示：「天寒地凍，呢個傻佬扮鬼扮馬，又扮派傳單，同班朋友搞呢件咁夢幻嘅事，真係好驚喜，我超鍾意！呢件心意我會永遠記住，LOVE U！」

林子善和太太Kary在去年10月16日註冊結婚，成為人夫的林子善與老婆鬼馬合照，被太太勾著鼻子走，原來寓意係聽晒老婆話！林子善留言話：「20171016之上路，有傻人終成眷屬，一起踏上婚姻之路。」其實近日忙於為新劇《果欄中的江湖大嫂》拍攝的子善，原來之前一晚仲通宵趕劇，瞓得咁少都抽空去註冊，與Kary正式成為合法夫婦，認真抵錫啦！