戴耀明突宣布結婚！與前女友復合全因1烏龍見真情、曾暗戀佘詩曼長達16年

戴耀明宣布結婚！前女友復合幾個月即變老婆

戴耀明入行接近三十年，感情生活向來低調，之前曾自爆暗戀佘詩曼，更開口想娶對方入門﹗戴耀明忽然宣布婚訊，另一半並非暗戀多年的佘詩曼，而是前女友，戴耀明指在無綫多年，演過不少奇怪角色，估唔到結婚都充滿戲劇性﹗他指未婚妻是圈外人，從事投資金融行業，2011年二人拍拖一起五、六年，因經常嗌交導致分手收場﹗戴耀明指二人因一個誤會幾個月前復合﹗

戴耀明以為患骨癌 驚青告知前度

戴耀明透露早前發現手前臂腫痛多時，正安排作詳細檢查前相當憂慮，自認驚青的他，一度以為患上骨癌，除了告知至親的媽媽外，便是通知前度女友﹗戴耀明指和前女友雖然分手，但一直保持聯絡，感情如家人一樣親近，所以有事都立即通知對方，前女友知道他患病都好擔心，大家傾談間講笑提議不如去沖喜吓，如果有事便一起共患難，若然安然無恙，便當做一個伴，陪伴大家走埋人生下半場﹗戴耀明指幸好最後報告出了，他只是受傷腫了，而沒有患重病，就因這場誤會，令二人再次走在一起﹗復合了﹗便想好好珍惜餘下時間，所以二人決定結婚﹗

戴耀明讚女朋友為人樂觀 生B隨緣

戴耀明形容未婚妻有幽默感，為人又樂觀，正合他找另一半的條件，因為想開開心心走落去，至於問到會否趕生B，讓戴媽媽可以早點抱孫，戴耀明就話一切隨緣﹗提到之前自爆暗戀佘詩曼，戴耀明就話當笑料睇便可，不用認真，佢話同阿佘是比較熟的圈中朋友，亦好欣賞對方，對她沒有任何幻想﹗

戴耀明小時被指過度活躍 全因「1點」而做演員

《360秒人生課堂》戴耀明生動演繹自己的人生高低起跌，但背後原來藏有一個又一個的感人故事﹗戴耀明自小被懷疑過度活躍，入行做演員只因「怕悶」，認為當演員可以扮演不同職業的角色，戴耀明話：「今日做飛機師，聽日可以做律師，後日可以打劫阿婆，諗起都開心﹗」滿足其坐唔定的性格﹗

戴耀明重申：我唔係茄哩啡，我個名叫戴耀明

戴耀明加入無綫後，演過不少角色，參演過無數古裝、時裝及民初劇，以及不同劇種溫情、搞笑至勵志都有，演過的角色有記者、綁匪及日本軍官等等，但觀眾都記唔到其名字，偏偏只記得佢叫「茄哩啡」，在街上多次被以此稱呼，戴耀明說時一臉唏噓，他指當時過程則與其演藝路一樣，有悲亦有喜﹗分享至尾聲，戴耀明大大聲講：「我唔係邊個邊個，我亦唔係茄哩啡，我個名叫做戴耀明。」

戴耀明19歲投身娛樂圈：一定要有副業

想當年，戴耀明19歲就投身娛樂圈，一做就做咗幾十年。「讀書已經好鍾意做話劇，希望大個後可以投身呢行。其實入行經過都幾戇居，有日，我阿媽睇電視嗰時見到亞視請演員，咁啱當時畢業，未搵到嘢做咪試下，咁就入咗行。後來喺亞視做咗1年，發現冇咩人睇，覺得無綫好似好啲，就去無綫考訓練班囉！」加入TVB後，戴耀明先至發現TVB新人輩出，比起亞視更難「有人睇」。

「當時過嚟TVB冇諗過呢點，不過既然選擇咗，可能係命中註定嘅呢！我唔知道乜嘢叫做運氣，但可能係我唔夠進取。我比較被動，人際關係比較輸蝕。」身為獨生子，即使對星途樂天知命，但總要對家人有所承擔。

戴耀明入行29年，曾於1993年參加《第12屆新秀歌唱大賽》，同屆參加者有張崇基、張崇德等，之後節目就加入TVB拍劇，一直都做綠葉角色，其中最令人熟知的就是於《巾幗梟雄之義海豪情》中飾演日本軍人，而備受好評。當時劇裡其中一幕，宅男女神陳法拉為了拯救愛人，不惜在他面前裸露身體「獻身」，戴耀明在節目中大膽回應：「雖然並非真的看到，但那意識好正！」戴耀明近年開設抖音帳戶，積極做直播帶貨賺錢，他直言收入比拍劇高3倍。

戴耀明：我係戇居

「可能係我個樣生得戇居居，所以普通一句對白，由我個口講出嚟，就變得好騎呢。其實我都覺得自己演喜劇係容易啲被接受，扮市井我冇問題，如果要我演醫生、律師，似乎冇咩說服力。」

戴耀明談及亡父 年邁母親的簡單心願勁催淚

《360秒人生課堂》分享過程中，戴耀明除了大談當演員的辛酸，也談及家人，他不忘細數亡父離世對他的影響，以及對年邁母親的種種歉意及愧疚。

戴耀明家人支持 甘心留喺TVB

「其實屋企人好支持我做呢行，又冇嫌棄我喺娛樂圈唔湯唔水，搵唔到大錢。其實人一世物一世，做到自己鍾意嘅嘢，又唔係搵唔到食，OK啦！做演員都有萬零2萬蚊底薪，加埋爆show分佣，收入都算穩定。

「試過有年爆show搵多咗十幾萬，但都有試過唔爆show冇乜錢，唯有少啲出街囉！坦白講，我呢個年紀已經好難喺出面搵份工。反而keep住做呢行，幫到我搞啲小生意，因為啲人認得我，傾起生意上嚟都易啲。做呢行一定要有副業，以前都有搞過酒吧同埋運輸。除非TVB炒我，如果唔係我都唔會放棄。」甘心留喺TVB做綠葉，只可以話佢真係好鍾意呢份工！

戴耀明為盡孝道放棄北上發展

戴耀明在《360秒人生課堂》提及與母親的關係、如何愛錫自己，但遺撼在無綫工作近卅年，未曾帶過媽媽入電視城，一直因為怕麻煩而未有帶阿媽參觀自己工作的地方，更為照顧家中八十多歲的母親放棄不少北上發展機會，由於是家中獨子，父親十多年前已逝世，所以要獨力負起照顧母親的責任。

另外戴耀明透露母親思想單純，最大心願是他能找到一個好的女伴，背後原因更暗藏洋蔥。戴耀明在其社交網亦留言預告謂：「有些東西，掙扎咗好耐，到底應唔應該講﹗到最後，都係講咗…死﹗就死啦。」

戴耀明曾暗戀佘詩曼16年！

戴耀明自從2017年跟拍拖5年的有錢女朋友分手之後，一直單身至今。早前他接受tvb娛樂新聞台《星光路上》訪問，戴耀明大方分享自己的感情生活，坦言渴望愛情，更提起當年當年暗戀佘詩曼一事，大讚對方是心目中的女神。

戴耀明揚言想娶佘詩曼做老婆

2021年佘詩曼於《金枝慾孽》中飾演爾淳小主，戴耀明飾演太監「小禮子」，二人因此而認識。當年戴耀明經常向佘詩曼表達愛意，「我經常跟阿佘說，我賺到錢會娶你做老婆。」更揚言當年就想把她娶回家，「她係一個好正嘅女人，我相信好多人跟我一樣，有娶她的想法。」

戴耀明妄想表白有一半機會：好掛住你

暗戀佘詩曼長達16年的戴耀明，無論身價地位都差一大截，因此當年不敢追這位當紅小花，不過又一次就借醉傳短訊示愛：「我好掛住你。」最後得不到女神回應。不過戴耀明似乎無悔：「講出嚟就有五十五十機會，唔開聲嘅話永遠都係零。」

戴耀明曾坦言自己現在不再年輕，渴望組織家庭，只想盡快找個人奉子成婚， 更大膽地回應：「我依家有個方向，唔係用正途去結婚生仔。想嗱嗱聲同女仔上完床有BB，然後即刻馬上結婚係最快。我又唔會話做犯法事，但盡量希望識到個女仔可以盡快結婚。無辦法，我唔係28歲，我已經係48歲啦，當個小朋友12歲我都已經60歲，我依家努力緊呢方面。」

戴耀明媽媽獲譚俊彥暖心導賞、為戴耀明母子完夢

雖然節目不能夠幫他搵到好歸宿，但於仍為他安排了一個驚喜，找來戴耀明的好友譚俊彥帶戴媽媽參觀電視城的古裝街：

譚俊彥暖心安排戴媽媽參觀古裝街 觀眾：爭少少見到佘詩曼

由視帝進行導賞故然令人意外又驚喜，原來譚俊彥與戴耀明之所以「兄弟相稱」，是因為二人在譚初入無綫拍攝《天命》時早有交情，譚俊彥仲講到對劇本有不明白之處，都會向資深的戴耀明請教，聽得戴媽媽好開心又恩慰。觀眾對這個驚喜安排亦感到意外，但有網民就表示如果可以由「三好」佘詩曼負責導賞，可能畫面就更感人，因為早年戴耀明曾公開表示發誓娶佘詩曼為妻，痴戀的形像深入民心：

戴耀明即場示範驚喜反應

有譚俊彥做嘉賓，認真面子十足，原來二人一早就在後台聽戴耀明的演講，說到動人之處戴媽媽都感動流淚，播放完參觀片段之後，「導賞員」譚俊彥將戴媽媽帶到小明身邊，一家團聚任務完成，戴耀明亦公開感謝好兄弟的送暖行動！

戴耀明媽媽風趣帶動全場氣氛

其後戴媽媽接受訪問，被問到是否全部兒子的演出都有觀看，她坦言唔係全部，由其是演歹角的時候「做衰仔嗰陣、唔係好想睇」引發全場爆笑，戴媽媽表示見到阿仔做打劫阿婆、綁匪角色雖然唔想睇，但「扮衰嘢又真係好神似、好嘢就好笑」，更公開呼籲希望公司可以安排正面角色給戴耀明，建議監製可以分派多點有拍拖、結婚戲份，嚇得小明以為阿媽有投訴。

被問到是否希望兒子攞獎、攞視帝，戴媽媽開心回應「唔好咁強求」、「唔求佢做電影皇帝，咁醜樣」，總之是但一個獎都可以「女配角、女主角都無問題，最緊要做好本份」，兩母子在台上互相倜侃，場面既爆笑又溫馨：

戴耀明社交網講感言：我只係一個好平凡嘅小市民

戴耀明在社交網講出：「幾個月前當我收到呀Bob哥哥 來電嘅時候，心情真的有點複雜，有開心+害怕，一方面好開心，因為可以試吓，自己從未試過嘅台上演說。但另一方面又有啲害怕，害怕自己講得唔好之餘，又唔知應該點講關於 戴耀明 這條友。自問只是生活喺香港地 一個好平凡，好平凡..以演員為職業的一個小市民，只想把這個小市民最真實的一面和大家分享。」

回顧本台曾訪問戴耀明：

戴耀明被網民惡搞嘅起源，嚟自《巾幗梟雄之義海豪情》，佢飾演日軍向山少佐，同陳法拉重有幕床戲，呢場戲影像化咗唔少巴打嘅final fantasy，亦令佢做咗毒男嘅代表。「晴晴（陳法拉）獻身俾我嗰場戲，其實我冇掂過佢㗎！但係法拉真係好專業，雖然大家冇同時入鏡，但係拍我嘅戲分嗰時，法拉都照樣做番成場戲俾我，照樣除衫，帶我入戲。」「咁當時你個腦諗緊咩呀？」我問。

「全程投入㗎喇！對住法拉好容易投入㗎嘛！」真係聞者葡萄，見者噴血。不過《巾》劇監製李添勝當年曾經公開點名多謝戴耀明。

「聽到我好感動，佢係我伯樂，關照咗我十幾年。有時我出show唔夠數，添哥都會救我，佢可以講得上係我嘅再生父母。」當年黎耀祥都係多得李添勝關照，憑住《巾幗梟雄》一鋪翻身，但戴耀明就唔敢將自己同黎耀祥相提並論。

「我想像唔到自己可以擔起1套劇。唔係對自己冇信心，但做咗十幾年，大概都知道乜嘢人可以帶得起成套劇。我自問只可以喺主角側跟錦上添花，只要觀眾留意到我，我已經好滿足。初入行嗰幾年，都會對人氣有憧憬，而家做咗十幾年，都睇化喇！」你咁講法即係話黎耀祥唔靚仔啫！

戴耀明做秋生短命都制

入行廿幾年，好多人叫唔出佢嘅真名外，甚至連片尾字幕都打錯佢個姓做叫「載」耀明。

「而家行出街都有人會叫我大茄㗎！初初未習慣都會有啲唔開心，但做咗十幾年，情緒上冇咩事喇！我只會覺得呢啲人冇禮貌。反而最慘嘅係當年喺訓練班出嚟，試過要扮牛頭馬面，笠住個面具拍古裝，角色完全見唔到個樣。又試過坐係藝員休息室，保安以為我係臨時演員，重諗住趕我走。最辛酸嘅係，我哋做配角會同時間騎住幾套劇，最多試過兩個月騎4套劇。凌晨4點拍完一組戲，另外一套劇又開晨早6點。多劇拍雖然係辛苦，不過一定會爆show，一睇銀行簿仔就開心番。」但係佢並唔係為咗爆show就咩角色都肯演。

「如果要我除褲露屎忽、打格仔露J嗰啲，我一定唔會接，就算露完可以上封面我都唔制。但係如果係梁家輝嘅《情人》，嗰啲又唔同。人一定會計數，有等價交換。我年紀唔細，如果俾5千蚊我拍兩組鹹戲，就梗係唔制啦！除非真係冇飯開㗎啫！我最大嘅宏願係做到黃秋生，佢每個角色都好搶。做到佢咁樣，我真係短幾年命都制。」黃秋生已經係影帝級，戴耀明要學佢，首先要掃番幾個獎先。不過佢似乎對《萬千星輝頒獎典禮》有啲意見。

「『飛躍進步』獎其實都係頒俾主角級嗰啲，最好有個『綠葉』獎！」講完呢句，佢就哈哈大笑。相信，佢都知道呢個建議係妙想天開。

黃秋生開金口讚開心過攞奬

2015年戴耀明跟黃秋生一同出演劇集《梟雄》，他於TVB《星光路上》大談當時的拍劇過程，憶述當時停機後被黃秋生喊停，戴耀明當刻相當緊張，心想一定是自己演技差，需被影帝黃秋生指點：「靚仔，你邊度嚟㗎？」戴耀明隨即回答自己出身於演藝訓練班，誰不知黃秋生大讚更鼓勵自己繼續努力。當下被黃秋生大讚戴耀明直言開心過奪獎。

戴耀明仍渴望獲獎

現年都入行多年，戴耀明都直言自己曾多次渴望憑劇集中的角色獲獎，他表示獎項是對於一個演員而言是一個肯定及回憶。雖則至今，願望仍未成真，但戴耀明從未氣餒。

後記：而我不知戴耀明是誰？

入行近卅年，拍過嘅劇絕對比好多1線小生重要多，戴耀明亦不止一次接受採訪，其中一個訪問在多年前進行，記者帶咗戴耀明落旺角影相。影影下，人群開始聚集起嚟，後來重有自遊行主動要求逐一同佢合照。戴耀明忽然變成旅遊景點，可惜喺班自遊行入面，冇人講得出戴耀明個名。對於1個演員嚟講，冇知名度會唔會係最大嘅遺憾呢？