謝安琪 產後出院 張繼聰愛的宣言 ：我餘生都係照顧佢哋

撰文及圖片來源:SundayKiss

謝安琪 23／3剖腹誕B女

現年40歲的阿Kay去年宣布暫別樂壇，終於造人成功再陀B女，湊成個「好」字！上星期四下午阿聰在沙田仁安醫院門外現身，宣布太太剖腹誕下7磅半B女。阿聰今次有陪太太入手術室開刀，B女出世後亦有幫手剪臍帶，不過就剪咗三次先成功！

阿聰早前透露已經為女兒改名，中文名叫張靖，英文名則為Karina。中文名係因為張氏夫婦都鍾意呢個「靖」字，有恬靜、安靜的意思。阿聰又笑指女兒的英文名本來另有打算，不過有一晚佢發夢時見到一個可愛小女孩，小女孩話希望自己叫「Karina」，因為想和媽媽英文名「Kay」的頭兩個英文字一樣。既然女兒報夢選擇自己英文名，阿聰當然贊成！

一家四口型爆出院

今日中午約12時，阿聰一家四口離開醫院，眾人相當合作，企定定讓傳媒拍照。化了淡妝的Kay產後首度曝光，面色紅潤，精神似乎不俗，不過水腫依然未退。張氏一家四口都係以黑色打扮型爆亮相，就連在阿聰懷中熟睡的Karina都搖身一變做潮爆B女，一身黑金色Hip Hop裝束，頭戴一頂有金色蝴蝶結的帽仔，有型又可愛，而且跟哥哥張瞻的造型襯到絕！

張繼聰愛的宣言

張繼聰：「我嘅餘生都係照顧佢哋！」

被問到是否會抽更多時間照顧家人，阿聰非常有承擔：「我嘅餘生都係照顧佢哋！」佢坦言現階段非常忙碌，仲有好多事情要處理，依家每日都只係瞓兩個鐘頭。雖然係辛苦，但阿聰表示太太阿Kay開刀生B及餵母乳辛苦，所以就算忙拍劇都會盡量抽時間照顧太太！佢又稱自己好似新手爸爸一樣手忙腳亂，幸好有很多人幫忙。

而為免影響張瞻與妹妹Karina的兄妹情，阿聰在女兒出世時亦有送禮物俾哥哥，而且佢一早提醒身邊親友唔好只顧讚女兒可愛而忽略了兒子。阿聰又大讚兒子抱妹妹時非常溫柔，自己覺得老懷安慰！

兄妹情深

阿Kay被問到傷口仲痛唔痛，佢就笑笑口表示：「康復情況OK，冇問題，多謝你哋！」之後一家四口登上七人車離開醫院。上到車後Karina就由媽媽阿Kay親自抱番，張瞻仲忍唔住摸摸妹妹面珠㖭！