孝順鄭秀文為中風爸爸 精心打造復康安樂窩

Text、 Source：Kiss | Edit：Carmen | Photos：鄭秀文FB、IG

鄭秀文爸爸 北京中風暈倒

鄭秀文父母現居的大坑道大寶閣，是Sammi 99年以2,280萬買入，現時寓所已升值幾倍市值近億，雖然父母在此住了十多年，不過近日Sammi就透露有意為父母搬家，全因嫌間屋太大。鄭秀文表示：「爸爸因為之前中風行動唔方便，佢話行去小便好遠，第時佢哋大屋搬細屋，你哋唔好話我待薄父母！」同家人感情要好，對家人照顧周到的鄭秀文，當然不會待薄父母，更加是廿四孝好女兒。

01年鄭父在北京中風暈倒，Sammi 當時就賠錢推掉廣告工作，包私人飛機陪爸爸返港接受治療；中風後，鄭父接受物理治療漸漸康復，但仍需借助枴杖行路。

安仔出入照顧岳父

現時鄭父年事已高，出入要人攙扶。而每次鄭秀文與家人外出吃飯，安仔都會細心扶實岳父，又會做司機送Sammi父母返家，絕對係廿四孝女婿。知情者透露：「始終鄭爸爸已經80歲，加上之前中過風，行路要用枴杖，舊年因為有老人病，身體差咗！Sammi都好緊張雖然有工人照顧但因為父母大寶閣屋企有成二千幾呎，喺睡房行去洗手間都有一段距離行出廳又有一段路，鄭爸爸覺得唔太方便所以先想搬！」

結婚四年，Sammi與安仔一直住在鄭秀文名下的淺水灣海峰園寓所，除經常回家探父母，Sammi亦會接父母返自己淺水灣寓所聊天飯敍，更不時陪爸爸在寓所外散步，鄭爸爸亦因此愛上淺水灣。

親自為爸爸設計 打造安樂窩

據知Sammi一直有個心願，希望可以住近父母，方便照顧以及常見面。吸金力強的鄭秀文，手持至少六個物業，市值超過3億。除96年買的海峰園當時有按揭外；據知其餘全部一炮過付款，當中兩個物業給家人及細佬居住，另外三個物業就放租。

因此當Sammi決定幫父母搬家，老公許志安就提議將自己買入的淺水灣冠園送給岳父岳母居住，知情者謂：「安仔10年買入干德道殷豪閣畀家人住，喺Sammi教路下，14年再以四千幾萬買入淺水灣冠園，原本安仔想將間屋用嚟做新婚愛巢，但Sammi住慣海峰園唔肯搬，安仔都尊重老婆，最後將物業放租，依家租約期滿，安仔就提議送畀Sammi父母居住，間屋已經開始裝修，裡面啲傢俬布置都係Sammi親自設計，尋求專業醫護嘅意見，喺全屋主要通道加建安全扶手，方便老人家借吓力，睡床都特別設計，連洗手間嘅地板同設備都以護老院設備為藍本，以安全為大前提。」有個廿四孝女兒再加埋個好女婿，Sammi父母認真有福氣！

結婚四年 依然甜蜜

Sammi同安仔結婚四年，相處仲係好甜蜜，一點都沒有老夫老妻的感覺。日前，二人到數碼港睇戲，離開時安仔原本想拖住老婆，見到記者改為捉住Sammi手臂，更一路甜笑！之後安仔負責揸車載老婆回家，身旁的Sammi友善同記者揮手拜拜。

孖住跑步

自己有好體力同健康才可照顧父母，所以鄭秀文近年愛上跑步，老公許志安被她感染，亦不時陪老婆一齊跑。每次Sammi都會全副裝備，戴著拉低可以遮住成塊面的太陽帽。