大肚 都要靚！女星示範仙氣孕婦look
Text ｜ Candy Choy
其實今時今日都冇乜再話咩孕婦裝架喇，就算係大咗肚，大家唔應該好似以前咁再遮遮掩掩，一來係喜事嚟嘛，慢慢睇住佢一路大，真係身邊嘅朋友都興奮緊張埋一份，二來香港人多車多，假如你係瘦底，個肚唔顯眼，啲人識唔讓座，仲分分怪你坐咗關愛座幾唔抵！所以話，大咗肚應着顯肚嘅衫，不過唔駛吓吓貪舒服着啲太休閒嘅衫，放棄自己以往嘅形象，大肚婆都可以扮靚靚，好有仙氣！睇呢四位美、韓、中、台女神， 大肚 都咁識打扮，絕對唔係因為佢哋係明星，而係proud of 自己係準媽媽果種自然流露嘅女人味同自信，再加埋少少打扮，真係可以令女人可以好靚，幸福少少面圓個樣，仲有啲返咗去少女時代添！
花款教主 Blake Lively
Blake Lively 果然係《花邊教主》出身，戲裡戲外，Blake Lively 都係成日着到花枝招展，2014年開始陀第一胎時，都係keep 住咁索，長肚唔長肉嘅佢，着住貼身連身裙，即使腹大便便依然好有曲線美，好誘人！
完全係真人版Cinderella咁！
佢仲好識展現自己最靚，又可以一露嘅部位。
平日嘅佢，對衣著都好講究，造型特別多，唔會有咁多顧忌，高踭鞋照着，但同時都會着吓trench coat、外套、連身A-Line裙保護吓肚仔。
Keep 住時尚 全智賢
34歲嘅韓國女神全智賢今年二月榮升靚媽，雖然仍未復出，不過知情人士話佢完全冇走樣，當然啦，你睇吓佢生之前，都仲係keep住個靚樣，雖然長咗少少肉，但完全唔係肥，只係更有神嘅感覺，而且仲keep住佢嘅百變造型，復古、少女、成熟優雅打扮難佢唔到！
女神梗係要跌吓膊先夠仙氣啦！
大肚仲young 張梓琳
身高182，今年32歲嘅中國首位世界小姐冠軍張梓琳，有網民曾比較佢同湯唯，話湯唯本來36歲嘅佢，大咗肚竟然好似老咗十年咁，反而一向走成熟路線嘅張梓琳，就愈望愈young，着起粉紅晚裝好青春，連平日嘅打扮都好少女味，素顏皮膚靚過晒好多十幾廿歲後生女添呀！
剪咗人氣lob頭，真係青春晒。
最強仙氣 伊能靜
你睇吓下面嘅相，點會相信伊能靜已經47歲？雖然佢同比佢細十年嘅老公舊年結婚，仲因為老公太鐘意小朋友，自己又驚生唔到而差啲鬧離婚，但最後佢都成功造人，個樣同身形仲要keep 得好靚，仙氣拍數爆燈！大肚都着住人氣嘅off -shoulder 衫，最尾果兩張相，真係用嚟激勵所有女人嘅人生咁，點解47歲都仲可以成個少女咁？答案係，唔好再俾藉口自己，老咗，就由佢肥又佢hea，「終生美麗」其實真係好吸引！
有什麼Netflix、Disney+推薦及必睇劇集？
為大家整理一下截至目前為止小編追過的Netflix影集清單，必睇Netflix電影或劇集片單；Disney+方面，則可以一看電影片單推介。
