卓韻芝44歲與老公梁子賢離婚！4年情完結

卓韻芝的前夫梁子賢剛於41屆電影金像獎憑《飯戲攻心》與張蚊同獲最佳美術指導提名，不過獎項最後由《風再起時》奪得，卓韻芝的離婚宣言亦由此提名講起：

「得悉你獲取提名，我很高興，肉緊死人，典禮翌日仍在互相提醒和勉勵；自問沒曾想像婚姻會結束，更沒曾想像婚姻結束時內心竟有貢獻感。

上年，我們分開了，兩個人比從前更了解對方，多了一段糊里糊塗的共同記憶，一場離合散聚的共同體驗，情誼不會結束，而是生命裡多容納一個靈魂。你將永遠是我的朋友，我將永遠有你撐腰；我倆的內心小孩純潔如初。」

最後她又說：

繼續約食飯、相約BBQ，我說過『保重』，說完我失笑，好像好像誇張了。愛情有雷，婚姻有義。梁子賢，勾過手就是朋友。I have a pen, the pen is blue. I have a friend, the friend is you.

卓韻芝2018年颱風下出嫁婆婆好開心

2018年9月，於超強颱風「山竹」襲港下，與未婚夫「閃電俠」梁子賢結婚，婚禮上，卓韻芝穿裙褂出嫁，並按傳統俗習禮過大禮，話說當新郎及兄弟團殺到時，阿芝婆婆好開心掛住同孫女婿傾偈，竟忘記叫孫女阿芝出場，要阿姨在旁提醒，十分搞笑。

卓韻芝梁子賢向俞琤敬茶

之後卓韻芝同老公向最愛至親婆婆跪地斟茶，其實自從阿芝母親離世後，兩婆孫相依為命，感情深厚，孝順嘅阿芝亦表明婚後會與婆婆同住。而卓韻芝伯樂俞琤亦有接受一對新人敬茶，見俞琤當日笑到見牙唔見眼，就知佢非常開心。

卓韻芝結婚Sammi喊不停

晚上婚宴喺中環外國記者會舉行，場外雖然有颱風「山竹」來襲，但場內氣氛依然溫馨熱鬧，到賀嘉賓有田蕊妮、蔡一智、黃耀明、徐天佑、導演許鞍華及C AllStar陳健安等等。粉紅姊妹團鄭秀文、蔡卓妍及梁詠琪開心陪嫁，Sammi喺IG拍片話：「好開心、好感動，喊死人！」跟住阿芝即刻話：「係呀，我一開始講嘢佢已經喺度喊，我心諗你唔好整喊我啦，佢喊我又好想喊。」之後，Sammi又同阿Sa、Gigi拍片祝福一對新人。

卓韻芝第一次叫老公

期間，卓韻芝更拖埋老公接受傳媒訪問，阿芝表示︰「多謝大家打風都嚟，我仲上網check，山竹又名『夫妻果』，相信個風都會畀我同朋友聚會先，今日賓客有近200人。」提到婚禮主題，佢就話︰「我老公……我咁大個女都係第一次咁樣叫人，我老公設計張帖係綠色，因為love is green，綠色係和平、環保同舒服。」

緊緻系姊妹

卓韻芝坦言喺台上好緊張︰「我上到台即刻喊，個腦一片空白，老公都好緊張，佢平時份人好低調。我記得多謝咗婆婆同俞琤，因為婆婆係證婚人，我發現佢之前仲苦練簽名。」至於被Sammi笑佢鬆散，阿芝話︰「佢哋笑自己係佛系同鬆散系姊妹，其實我哋係緊緻系姊妹。」

阿Sa好enjoy

另一好姊妹阿Sa蔡卓妍就話由於冇接新娘玩新郎嘅環節，笑指佢哋係最舒服嘅姊妹：「新娘一嚟就話冇玩新郎，我哋主要係負責靚。（冇得玩有冇失望？）最好唔好啦！費事玩人玩着自己。（最忙做啲咩？）主要都係影相同擺甫士，同嘉賓吹吓水。（幫手頂酒？）我都頂得幾杯嘅，其他姊妹就難講啲。」