黎諾懿被太太裝APP監控「婚後轉變很大」自爆:5億駙馬得個名
黎諾懿日前接受阿Bob林盛斌主持的《人夫放假約出去滾》的訪問,公屋出身的黎諾懿與落選港姐李潔瑩(Nicole)在2014年結婚因此被封為「5億駙馬」,他更自爆原來在婚後轉變很大,還被太太在手機裝APP,全天候監控其行蹤!
黎諾懿:呢個功能冇得閂
黎諾懿近日上Bob(林盛斌)主持的J2節目《人夫放假約出去滾》做嘉賓,在節目中自爆太太在他的手機中安裝了一個名為「Find My Friends」的定位追蹤APP,美其名是擔心他出埠一旦被擄,都可以救到他,黎諾懿笑言:「呢個功能冇得閂呀,太太知我喺邊,有時就會叫我去附近幫佢買嘢!我依家好簡單,唔係金魚街就係花墟。」
黎諾懿自爆相識經過「我太太垂涎我嘅美色、追我,哈哈!」
係拍《讀心神探》嗰陣,周美欣介紹太太畀黎諾懿識,「有幾次約出嚟食飯,我太太垂涎我嘅美色、追我,哈哈!我太太係非常之好嘅女仔,單純、好,咁啱我同佢都單身,好自然行埋一齊。」
五億駙馬無懼「軟飯王」稱號 黎諾懿直言:我唔係靠外家
有人話黎諾懿係五億駙馬,連婚禮開支都係外家畀,仲送樓畀佢哋直情是「軟飯王」,不這黎諾懿就話當初並唔知太太家境,第一次去佢屋企,都覺得有啲嘩然,但時間可以證明一切,「如果我識咗佢,我唔做嘢就話啫,但當然依家好多人都覺得我孭住五億駙馬嘅身份,但我成日都話我太太嘅身家、歷史我改變唔到,我係鍾意我太太個人,其他人點講我都冇乜所謂,亦唔介意,我太太、我爹哋媽咪、佢爹哋媽咪理解就夠,我亦都唔需要同任何人交代。留畀時間證明,我有做嘢,我又唔係靠外家,有幾多億都分唔到畀我,駙馬係名稱嚟嘅啫!」
黎諾懿亦強調外家並無送樓畀佢哋,但明白娛樂圈就係咁。「係嘅我就唔使咁辛苦啦,最緊要屋企人知就夠,其實樓嘅嘢一check 已經知唔係,但我都明呢行係寫呢啲,唔通寫我好畀心機睇劇本咩?冇人會想睇啦!」
黎諾懿信風水 求婚唔浪漫
「我本身篤信玄學,有日,風水師同我講要結婚,唔係就要三年後,太太嗰時瞓喺我側邊,我就叫醒太太話結婚嘞,佢話哦,咁結囉!冇求婚!太太叫我買求婚戒指,幾個鐘後,太太話:『都係唔好,戴一世㗎,我信唔過你啲taste,我去揀完,你去畀錢啦!』之後仲要去餐廳扮求婚,我同太太講:『你都知嚟做咩,戒指你又見過,你覺得有咩驚喜呢?』佢話:『我唔理,你要做番。』求完,佢話:『都唔浪漫嘅!』我話你都知道晒,係唔會浪漫嘅。到生B,我同太太講:『老婆,我想生猴B!生咯!』佢話:『你可唔可以浪漫啲?」我話:「唔係呀,剩番半年,唔係想生就生到。』雖然最終生唔到猴B 生咗雞仔,但我就係咁唔浪漫。」
生兒育女 太太陪做書童
時間一轉眼「小春雞」已4歲多,黎諾懿又指同太太有共識,由他教大仔「小春雞」待人接物,讀書方面則交給太太,兩人認為囝囝無需要讀書好叻,因為世界一直在轉變,20年後「小春雞」投入社會時,應該好多工作已被機械取代,唯一不能被取代的,是人腦入面的創意,所以黎諾懿希望囝囝能有獨立思想,最重要是學語言,他透露囝囝正在學日文、英文、廣東話和普通話。
黎諾懿自嘲英文差入唔到大學
黎諾懿憶述自己雖然係中七畢業,高考有2C4D,成績唔差,不過英文唔合格,所以入唔到大學。初入行成為「奧運六星」後,也與林峯、吳卓羲、黃宗澤等其他幾位男藝員表現有段距離,因此被公司安排做兒童節目加以磨練,星運一直浮浮沉沉未好過,直到2011年參加湖南衛視節目《舞動奇蹟》第三季贏得冠軍,之後才飾演《愛回家》馬壯一角。
準備每日塞五嚿水畀囝囝
黎諾懿笑指自己是富一代,囝囝便是富二代,又指大仔「小春雞」初出世時,自己是個緊張大師,但到後來細仔「小冬牛」出世,他就學懂了放手,讓家中兩大長老同工人姐姐去照顧BB,他笑言:「老婆叫我湊多啲,話驚囝囝大個咗唔跟我,我就話第時我日日塞五嚿水畀佢,佢就跟我啦!」
《人夫放假約出去滾》黎諾懿鏡頭前滔滔不絕 喺屋企居然唔講嘢?
黎諾懿兩個夠晒數唔再追女
現時41歲的黎諾懿,與前港姐李潔瑩結婚7年,2017年誕下兒子「小春雞」,自數年前開始黎諾懿已恨生B恨到出口,直言為免兒子孤單,每晚和太太都不設防造人,終於在去年6月生日時宣布追B成功,同年12月黎諾懿宣布細囝出世,乳名叫「小冬牛」。他指大仔叫「小春雞」是因為在雞年春天出世,而「小冬牛」則是在牛年冬天出世。雖然之前黎諾懿打算追個女湊成一個「好」字,不過「小冬牛」出世後,黎諾懿就話兩個夠晒數,老婆亦準備封肚。
5億駙馬過億豪宅曝光
當初結婚到底有冇收樓,當事人冇親口承認,不過婚後由村屋搬入何文田大型豪宅屋苑,黎諾懿IG曾曝光家中陳設,有巨廳有大露台有長廊仲有天台,是屋苑內僅得22個嘅複式連天台特色單位,最細嗰個都有二千幾呎、市值過億。無可厚非,屋企大啲,留家抗疫啲時間都容易打發啲,除咗玩廚神喺自己個巨型廚房開 live 煮好嘢外,豪宅可以廣邀朋友開P 食飯、可以喺露台閒閒哋放廿幾個花盆種自家菜、可以喺天台開幾個吹氣池打造小春雞私家水上樂園,仲可以畀囝囝擺廚房仔、電動超跑大型玩具都仲有大把位剩,呢位5億駙馬嘅生活真係令人艷羨!
黎諾懿為什麼被太太裝APP監控?
黎諾懿於節目受Bob訪問,自爆太太於其手機裝了定位追蹤APP,話因為太太擔心他會出事被擄,都可以用APP去救他,他更自爆最近…詳情請看
黎諾懿太太李潔瑩的背景相當有米,為什麼被封為5億駙馬?
黎諾懿太太李潔瑩被揭其家族擁有5億美容院王國,而且李潔瑩本身也是…詳情請看