宋熙年、陳智燊夫妻檔月賺60萬！入行12年未被重用 離開TVB轉型做KOL
近年不少藝人拒續約無綫，轉型做自由身KOL，不過成功例子寥寥可數，最成功的莫過於陳智燊(Jason)同宋熙年兩公婆，一個月賺六十萬。轉型成功因為兩公婆形象正面討好，大受客戶網友歡迎以外，都多得佢兩個夫唱婦隨合作無間。最近無線兩線劇集離奇看到兩夫婦身影，皆因《非凡三俠》是宋熙年去年加盟邵氏參與的劇集，而《堅離地愛堅離地》是2017年拍落未播的倉底劇，亦是陳智燊的在無線的告別作。
原文刊登於：東方新地｜圖片來源：東方新地、TVB、宋熙年IG、雷霆881
陳智燊告別作首播 宋熙年客串演張智霖前妻
最近無線兩線劇集皆見陳氏兩夫婦的身影，當中男方有份做男主角的《堅離地愛堅離地》屬於2017年拍攝的劇集。原定2019年5月於無線首播，但撞正4月爆出的「安心偷食」事件，黃心穎有份參與的劇集全部無限期停播。《堅離地愛堅離地》除了是陳智燊的告別作，亦是黃心穎現存最後一套作品。
至於宋熙年有份參演的劇集為《非凡三俠》，劇中宋熙年飾演張智霖前妻。此劇陣容吸引，除了有久未露面的張智霖，成功由𡃁模轉型演員的周秀娜，更罕見地有陳豪及王浩信以非主角角色參與的劇集。陳智燊宋熙年所有劇集存貨都已經開播，暫時亦未知二人將來會否再參與任何劇集拍攝。
陳智燊宋熙年夫妻拍住上 轉做KOL月賺60萬
宋熙年華姐出身，因口才了得，一向都是擔任主持工作，但多年來也未被重用。兩公婆決定離巢後，轉戰KOL工作，就講兩公婆現場示範一條龍客戶特約短片誕生過程。兩公婆早前現身圓方商場，宋熙年扮到靚一靚化埋全妝，陳智燊亦都執得好正手持專業靚cam一部。宋熙年入去護膚化妝品專門店擺pose介紹最新出品，陳智燊就全程舉機跟住拍。邊行邊影，開箱、試用、大頭、全景樣樣影齊，最後再補多個兩公婆自拍做ending。二人合作默契十足，Jason表情認真手勢好似攝影大師一樣，最獨家嗰樣係一條片嘅誕生背後源於兩公婆夫唱婦隨夠恩愛，真係抵佢哋兩個咁成功！
陳智燊：「宋熙年係我人生大獎！」 大爆向老婆求婚過程
藝人陳智燊同老婆宋熙年婚後非常甜蜜，係圈中嘅模範夫妻。日前陳智燊接受電台錄音訪問時，當年為咗唔影響二人嘅事業，自爆同宋熙年玩足7年地下情，更分享向老婆求婚嘅過程，真係羨煞旁人！
地下情7年 終開花結果
陳智燊喺接受商業一台訪問時表示，當年同宋熙年一齊主持《娛樂新聞台》而認識，互相深入了解幾年後先正式開始拍拖。陳智燊指當時自己係一個好小心、好慢熱嘅人，但宋熙年就剛好相反，經常「bilibala」、好開朗，二人形成一個強烈對比，可能就係一凹一凸，令佢哋一拍即合！
同宋熙年拍拖9年，其中有7年係地下情，陳智燊喺節目坦言當時要同宋熙年扮唔識：「唔可以拖手、唔可以傾偈，大家要扮普通朋友。都唔算辛苦只係經常有好多無聊嘅戲要演，好似喺公司一齊開會，或者同同事食飯，會故意坐開啲，扮陌生咁打招呼。」
宋爸爸60大壽當日求婚
拍拖9年，係時候要考慮一下人生大事，陳智燊話求婚當時非常驚險，要特意向劇組請假，仲要喺一日之內來回香港同澳洲：「個日我等佢做完節目之後，坐夜機返澳洲慶祝佢爸爸60大壽，我咪扮拍劇一早出門喺街度遊蕩，等佢出門口就即刻拎行李去機場。」行程雖然非常趕，但最後陳智燊都成功製造驚喜，抱得美人歸！
過往Jason曾多次表示入TVB最大的得著，就是認識到太太宋熙年，他指：「迎娶太太宋熙年，已是我人生的大獎。」
希望生三個孩子
陳智燊同宋熙年結婚一年幾就造人成功，2018年9月就迎來佢哋第一個愛情結晶品Damon。陳智燊揚言希望生夠3個：「我想家庭熱鬧啲，始終我自己係四兄弟，成長環境就係打交、鬧交、爭嘢，幾開心嘅，如果可以俾個仔咁嘅環境，我覺得都會好幸福。」
有什麼Netflix、Disney+推薦及必睇劇集？
為大家整理一下截至目前為止小編追過的Netflix影集清單，必睇Netflix電影或劇集片單；Disney+方面，則可以一看電影片單推介。
