N個藝人被爆根本是「偽人」金城武、木偶怡、「越難越愛」都有份！

N個藝人被爆「雙面人」根本是「偽人」

鍾嘉欣早前被網民狠批人前人後兩個樣，私底下經常對人黑口黑面，近日再有網民在社交網專頁開post，並列出他所接觸過的親身經歷，揭穿藝人私底下的真面目！

鍾嘉欣以外 「烈女」被列為「大鼻藝人」No.1

該名在社交網專頁開post的網民，以不開名的方式，列出了超過20名他接觸過的「乜咁大個鼻」藝人，包括「烈女」、「亞視副總裁」、「命硬」、「游水New」、「勁舞Dancing Queen」、「男人最痛」、「痰+E」、「越難越愛」等等，不過就無講到話對方「大鼻」的原因，其中他將「烈女」列為「大鼻藝人」No.1，有網民就認同指：「10幾年前同太太去四川影婚照，回港時當地候機室見到裂女，佢本身已經西口西面，之後有粉絲想同佢合照，佢話ok，但我之後聽到佢X助手：『有烏蠅嚟就幫我撥走佢啦』，正pk。」

亦有多個網民憶述：「N年前同烈女做個一次訪問咁大把，當時book咗間靚餐廳喺落場時間做訪問，結果佢遲咗到仲一嚟到就傾咗半個鐘頭電話先埋位，當然佢同經理人公司同事係當無事發生過一樣。」、「烈女早就臭名遠播，劇本又唔熟，埋位前就乜X都話得，一埋位就噏唔出，累全世界冇得收工，佢係正宗冚家X。」、「裂女好X巴閉咖，晚上龍崗道泊求其低架車就走入老麥買包，然後叫人快啲俾佢，十足啲廢老咁巴閉囉。」

「E神」被指與粉絲合照後打去學校投訴

這個post又引來不少網民大講自己的親身經歷，其中有網民表示：「我小學個陣E嚟我哋學校附近拍電影。有幾個同學好中意佢，所以佢哋去問E可唔可以影相。E話可以，仲企到好埋笑面迎人咁同佢哋合照。結果轉個頭就打左去我學校度X校長老師唔識教學生 (真係爆晒粗個種) ，然後要求學校記佢哋「大過」。第二日校長特登在早會講，同我哋學生講個社會就係咁，最後學校當然采佢老X，而本身忠粉嘅同學都即刻脫飯。」

該名網民續說：「嗰時係冇智能手機，同學係用即影即有。後來我哋估因為E同助手唔會認得套校服，所以要睇相去認校徽，先可以打去投訴，所以先應承合照。所以都好好奇點解佢咁有心機時間去投訴人。」又解釋：「即影即有影出嚟嘅就直接係一張相，當時話E有要求一張佢keep，所以班同學都勁開心，以為係重視fans嘅表現。係事件發生後先估係咪咁先搵到學校，因為校服上面係有校徽。校長嗰時都有同我哋全校講話：『唔可以着校服喺街度流連』呢條校規其實都係保障大家，換咗套衫係冇人搵到你學校。」

這位網民對「E神」的爆料引來眾多網民熱烈討論，有網民指：「小學生咋喎…佢都要咁？」、「真係好陰濕！」不過亦有不少網民力撐「E神」私下係好Nice同好「吹得」。

「𡃁坤」被指脾氣古怪EQ低

亦有網民講話最難相處的藝人係「𡃁坤」：「唔係佢鐘意扮大牌攞架子，係佢本身個人脾氣真係好古怪好難埋到身，佢D思想行為其他人好難GET到，不過鏡頭前佢又真係一個好出色專業嘅演員。」獲得其他網民認同指：「曾經做過一間餐廳serve過佢，佢真係怪怪哋。」、「佢係有啲古怪，同埋你係估唔到佢原來幾天真！難聽啲講有少少X居」、「識得佢圈子嘅人，話佢其實係eq低，性格好傲嬌，似小學雞，係燥底d，但個人其實無咩機心，好真實」等等。

「男人最痛」見網民擰歪面

有網民就講到：「男人最痛我好多年前係機場同佢面對面行過，佢一見我望到佢即刻好快擰歪面，好似好驚我會同佢打招呼咁，當時我嗰一秒都未撈到佢係邊過，佢真係當左自己大明星，以為人地一見到佢就會拎簽名」引來網民認同話：「好多奀星都係咁情況！大佬我都噏唔出你個名係熟口面唔使即刻擰歪面嘛！反而真係大明星真係唔會咁做！」、「真係奀星專係咁，同一個情況我係筲箕灣見到曹永廉，佢又係擰歪面，真係吹脹！」

「木偶怡」被指好冇禮貌兼臭串

有網民就話：「以前做Sales遇過木偶怡，佢真係好冇禮貌同好臭串，嗰時佢仲要係二線姐仔，我到而家都好憎佢！重點佢個鼻堅大。」亦有網民指「周國腎」好飄忽：「一時好nice一時好難頂，仲有啲band同rapper都係」。

但亦有網民表示：「一個藝人沒可能24小時咁好精神狀態，將心比己，如果是私人時間面口不好，不一定是臭串，特別是在公眾場合，你一nice可滿足fans，但阻到別的人便不好，便是另一種乞人憎，千期唔好用個人對ariltist的期望去衡量藝人的品格，會過份不平。」

任達華獲封「冇架子藝人」No.1

而講到「冇架子」的藝人，大家都認同任達華一定係首選，有網民激動表示：「任達華超好呀真係！有次係免稅店見到，排隊比錢佢在我前面，我細細聲同老公講佢好型呀。咁佢比完錢我以為佢走左啦，咁我比完錢佢竟然仲係對面睇一陣野，見我地出黎佢就行過黎主動傾計一齊行！！！真係好難忘」、「任達華真係無得頂 親民到爆」、「我做sales時都serve過任達華，真心nice」等等。

繼網民爆料 前空姐彈出再爆 多名藝人係雙面人

一名自稱前空姐的內地網紅，拍片透露有兩名前空姐同事在工作時，曾遇到搭乘飛機的金城武，即興奮上前向對方要簽名，當時金城武非常客氣地簽了名，但在下機前，他卻用日文向乘務長投訴，指控該兩名空姐打擾到他休息。

空姐力數10大藝人機艙惡行

第10位：「大笑姑婆」

「大笑姑婆」形象見稱的女星，其實人前人後兩個樣。空姐阿Sa爆料指一位以「大笑姑婆」形象見稱女星，有空姐是她的小粉絲，但每次上機個女星都瞓咗覺，直到落機終於可以影番張合照，點知個女星就好晦氣話：「影喇影喇咁想影！」空姐小粉絲當堂嚇一嚇，自此割席不再喜歡個女星。

第9位：「自私黑超大導演」

至於這位「自私導演」，在東京坐飛機香港時，阿Sa就見到「自私導演」攜帶超大型陶瓷藝術品上飛機，外面只拿薄身發泡膠包住。不過因為體積太大超出限制，被要求送去寄艙。最後到香港後缺乏保護的陶瓷藝術品破碎，倒轉頭反而要求航空公司賠償，更Call齊記者求關注。阿Sa就話：「既然你件物件咁貴重，係咪應該買保險呢？」

第8位：「豪門千金」

豪門千金坐頭等，每5分鐘就按一次服務鈴，卻不是什麼緊要事情，通通都是雞毛蒜皮的小事；而且去廁所仲要求要空姐Block住廁所，空姐連休息時間都沒有！阿Sa就感嘆其實頭等艙仲有其他乘客，不可能全副心力招呼你一人，並笑言道：「平時冇乜人留意佢，想要attention seeking掛！」

第7位：「暴躁學者」

雖然不算娛樂圈中人，不過這名學者以鬧人見稱，引經據典見人就鬧。阿Sa話有次香港飛台北班機，「暴躁學者」見延遲起飛就開始瘋狂鬧人，阿Sa唯有拖得就拖，希望對方可以冷靜下來。不過都算神翻轉，「暴躁學者」火爆完之後，阿Sa禮貌講句對不起，對方都相當熱誠地握握手，連阿Sa都話「粗聲粗氣唔代表心地唔好。」

第5、6位：「踢波阿伯x2」

兩個踢波阿伯好朋友孖住上榜，因為有一次兩個阿伯同一班機，態度超惡頂，阿Sa在阿伯身邊經過，阿伯即刻好惡喝停：「喂，攞杯水畀我！」，打份工當然只能夠乖乖照做……

而另外一位阿伯都相當極品，阿Sa準備出發去馬爾代夫時見到阿伯與他老婆。阿Sa禮貌打招呼問是否乘搭國泰的航班，卻被對方惡言回應：「唔搭你哋仲有其他機咩？」不過他老婆就毫不給臉，直接一句「有啊」回應，認真落面！

第4位：「心急人上」

阿Sa表示「心急人上」有幾單八卦是非曾經見報，本身在航空界中相當出名。有次「心急人上」心急上機，空姐上前查看登機證帶位，卻不料「心急人上」疑似嫌空姐手腳慢，從空姐手中搶過登機證自己找位置，空姐感覺自然不會舒服。雖然阿Sa都話感覺麻麻，不過見到「心急人上」近年家庭美滿，都祝願對方更加穩重，行為變得更加好。

第3位：「數字先生」

有次這位數字先生同老婆由香港去倫敦，因有位空姐撞到他手臂，期後火爆的數字先生大罵：「我屋企工人都無你咁蠢！」該名空姐難過得匿埋一邊狂喊，機艙長在該程航機將她調往另一個機艙位置。

第2位：「投胎餓鬼」

前空姐阿Sa憶述幾年前，曾serve過一位藝人，取名「投胎餓鬼」，指當時該名藝人與家人一齊坐商務，本身已經食咗好多嘢，之後佢再嗌嘢食，但所點的飛機餐已派完，結果即場「發爛渣」，更將餐牌拋上枱面，再呼喝空姐：「無嘢啦，走啦！」阿Sa指「餓鬼投胎」早前在澳門也曾發生令人側目的事件。

第1位：「Fashion西客」

前空姐阿Sa指航空界最討厭嘅人第1位，非潮流西客莫屬！阿Sa說：「所有空姐見到呢個人都頭痛，講粗口惡言侮辱乜都齊，掉嘢都好閒，試過有次call保安，機長行埋去，你估佢點講？『You are just my driver！』不過唔知點解，佢又冇畀呢間航空公司blacklist，佢而家生咗個女，或者可以對人nice啲啦。」但以往惡行絕對喺空姐眼中出晒名！

再爆「張生」人品差 茅頭直指張振朗

去年看完《萬千星輝頒獎典禮2020》後，阿sa又有料爆，爆當屆有獎攞的「張生」、「龔小姐」鮮為人知的秘聞，疑似指張振朗及龔嘉欣。

「張生」見高拜見低踩

前國泰空姐阿Sa開咪分享對《萬千星輝頒獎典禮2020》觀後感，奪得「最受歡迎電視男角色」的張振朗，台上發表感言時一度眼濕濕仲話：「我家人教導我一定要識尊重別人，別人先識尊重你」得到不少掌聲，不過前國泰空姐阿Sa就坦言對「張生」冇乜好感，原因是有一臨記朋友，電視城接觸不少藝員，阿Sa問呢位朋友全行邊個最乞人憎，得到答案是「張生」，因為「張生」在片場愛扮大哥，而且見高拜見低踩，並不是電視機前所見的謙虛有禮，並指一早上位的前輩級黎耀祥人前人後一樣有禮，對上下一視同仁，當年得視帝連不同廠的清潔姐姐都過廠恭喜祥哥，阿Sa直指：「張生應該學吓嘢，要喺公司上下都對你尊重，你對人要一視同仁。」

爆龔嘉欣為事業放棄愛情

阿Sa又指有一位大馬空姐好友認識當地豪門auntie，爆料指龔嘉欣本來有位富二代男友，更已談婚論嫁，更收到她嫁入豪門的喜訊，但最後龔嘉欣為事業棄愛情，阿Sa話：「龔嘉欣原本可以嫁入豪門，不過對自己嘅職業好執著。」阿Sa又讚龔嘉欣上台的得獎感言夠真摯，比攞大獎的「哨牙妹」感人得多。