《愛回家》搬姜濤金句寸爆姜糖「拉隊走人」事件

《愛回家》踩過界寸爆敵台天王姜濤粉絲

昨日《愛．回家之開心速遞》（13日）一集踩過界，集名抄足姜濤金句「用實力說話」，呢集內容講述組合「大四喜」成員龍敢威（羅樂林飾）、譚道德（陳榮峻飾）、熊樹根（劉丹飾）及龍敢佳（鍾志光飾）喺節目中演唱新歌「Back Pain」。鍾志光回到後台唔多開心，羅樂林即問：「你創傷後遺症又復發？」鍾志光回應：「唔係，只不過我頭先唱唱吓，見到有啲觀眾行出去，咁係唔係叫做廁所位？」陳榮峻即刻解釋話表演有人「出出入入」好正常。

雖然情節好短，但《愛．回家》嘅內容似足諷刺早前姜濤粉絲喺音樂節見Anson Lo出場，拉大隊離場，引起神徒不滿之事。

姜濤粉絲被力數3宗罪：Anson Lo壓軸表演拉隊走人

MIRROR中4位人氣最高的成員Ian、Edan、Anson Lo和姜濤獲邀參與上週末一連兩晚的西九音樂節，其中Anson Lo和姜濤齊齊於週日登場表演。雖然當晚大會安排每位歌手出場前都有足夠的休息時間，以便在場觀眾出入會場。不過當姜濤表演結束後，就有大批身穿姜濤粉絲會會服的「姜糖」選擇在壓軸表演的Anson Lo登場後，才開始拉大隊離場。此行為被網民和Anson Lo粉絲「神徒」狂轟，批評「姜糖」不懂得尊重其他歌手之餘，連同團成員都唔俾面。

故意阻擋其他觀眾視線

同時因為「姜糖」選擇在Anson Lo開始表演後才拉隊離場，所以導致在場觀眾被迫睇「人頭」，睇騷視線嚴重受阻。有在場觀眾指出，當時不少觀眾都有出聲要求「姜糖」離場時盡量「踎低啲」，但大部分「姜糖」依然沒有理會，繼續掂行掂過，行為十分自私。

「神徒」大合照 大批「姜糖」踩場嗌口號

此外，昨日有段短片在網上瘋傳，指當Anson Lo粉絲「神徒」在音樂節開始前大合照時，大批「姜糖」上前嗌口號：「熱愛係姜，無可取代」。不少網民都留言表示認為「姜糖」的行為非常幼稚：「尊重真係好重要，但係睇得出佢哋冇」、「我覺得呢班人好無品，行為無知，佢哋侮辱緊嘅係佢哋自己嘅偶像，如果我偶像班粉有咁嘅行為，我會覺得好羞恥」等。

姜濤粉絲行為惹雙方罵戰：連最基本嘅禮貌都冇

事後不少在場觀眾和Anson Lo粉絲「神徒」在社交平台洗版式留言指控「姜糖」的無禮行為：「姜的fans一點禮貌也沒有。極度冇家教，總要成日企起身遮住人」、「真係好唔尊重下一個Anson Lo表演者，仲要大家係同一個組合，應該互相支持」、「連最基本嘅禮貌都冇，佢地冇品唔係浪得虛名」等。

姜糖認為…

不過有「姜糖」就反駁表示認為沒必要為其他表演者充撐場面：「當姜濤表演完畢，大家離開亦合理，一嚟已經夜，大家可以早啲回家休息；二嚟唔需要勉強自己，令自己受罪，仲要幫人抬轎助威？人哋已經有10萬大軍支持，不要替人擔心。」