Christy近期愛用心水產品

Feb 27 2015

平時上網我都好鍾意睇下人地有咩心水推介既產品，
無論護膚品，化妝品，護髮產品，
餐廳推介我都好有興趣睇架！
有時買買埋埋屋企都儲埋一堆野，
當中有好驚喜同中伏既產品，
雷野就遲下同大家分享啦，
以下係我試用過價錢合理又好唔錯既產品。

LUSH 薄荷清爽面膜 $100/125g,$175/315g

香港空氣咁污濁，
皮膚都好容易變差，
所以深層清潔係好重要架！
清潔面膜我就用過好多款，
有啲我嫌佢敷完係超級崩緊！
而呢個敷完個感覺都幾好，
feel到塊面好乾淨又唔會太乾之外，
仲有即時收緊毛孔既效果，
亦可以幫我清到好多黑頭，
膚色亦會均勻白淨啲，黃氣無咁重添！
而且佢仲有去油脂同消炎作用架。

佢呈綠色，有啲紅豆粒粒係入面，
敷緊既時候有陣好清涼既感覺，
聞落去仲好似薄荷朱古力雪榚，好好聞！
如果想試既朋友我建議先買細樽試下岩唔岩自己用，
100蚊就買到125g細樽，都可以用到好多次。

Dr.Wu杏仁酸 $220

大家都知道水揚酸,果酸呢類型既產品可以幫助疏通毛孔,
去除皮膚老化角質等功效。
面上無咁多死皮搽其他護膚品都會吸收啲架!

我自己亦都好小心揀呢類型產品,
怕會好刺激,引發起敏感。
呢支杏仁酸既產品就比其他果酸既產品溫和,
皮膚比較敏感既時候用都唔會覺得好刺激,
通常我會係爆緊暗粒既時侯用,
用完第2日就會feel到皮膚平滑番好多,
亦控制到暗粒情況唔會一路爆落去。
就算係甩皮既地方搽上去都唔會有拿既感覺。

不過佢話會有亮白既效果我又唔多覺,
美白都係靠番美白精華啦!
就算平時皮膚無咩問題,
我都會keep住一星期用兩次,

生暗瘡既次數都減少左好多

Cream黎講我都試過好多唔同款,
有啲質地太厚好難吸收,
好似搽極都只係面既表層,吸收唔到咁,
一上粉底就好易會有擦子膠碎,
有啲搽上去嗰下好似好潤,
但過一陣就開始乾,搽完好似無搽過咁,
我又唔OK啦!

Etude House Moistfull Collagen cream $170

之前我係SASA見到佢做緊promotion就買黎試下,
點知效果出奇地好,
佢屬於gel cream狀，
搽上面既感覺好滑好soft，
保濕得黎佢唔會太笠，

而最重要佢有鎖水效果,
我自己鼻翼位好易甩皮,
搽完佢全日個粉都可以好貼唔甩皮。
用完佢我都即刻去買多樽囤貨。

PHYSIOGEL Intensive cream ＄159

之前試過無啦啦皮膚敏感,
皮膚好易就甩皮又成日好紅,
搽其他護膚品都唔敢!因為好易覺得好拿,
係呢啲咁危急既關頭我就會拎呢支野出黎救命,
相信敏感皮膚既朋友都知佢係好野,
好適合敏感偏乾既朋友用。