$100以下的好物

May 5 2014

又係時候要介紹，
平靚正嘅好嘢俾大家喇，
時不宜遲，快啲睇吓今個月有咩好嘢先啦！

Irene:

Lavshuca 單色眼影 ($89) 購自logon
呢個牌子嘅眼影，
本身自己都好鍾意，貪佢平靚正，
而我平時好懶，唔係成日都化哂全妝，
好多時都係底妝、眉、加眼線就算。
而眼線就會用深啡色眼影畫，
因為夠快唔需要畫到好fine。
呢個眼影，不但粉質幼滑，仲好上色架！
而且仲大大盒，有排用，
佢其餘仲有好多顏色揀，
平平地買一粒平時大家常用嘅顏色都唔錯架！

Joan:

廣源良菜瓜精華露 $4x (購自台灣)
呢支精華露主要成分為絲瓜萃取液~
用嚟敷面洗面可以保濕滋潤皮膚!
其實我初初買真係貪佢平試下新野,
咁我皮膚性質比較乾同易出粒粒~
質地GelGel地,推開好水
一敷上面佢個感覺好冰涼,
直至洗走多餘嘅精華露都好冰涼~
而且泛紅粒粒都退左紅!皮膚真係幾滋潤!
另外聽我一個朋友講有一次曬傷左敷完真係無咁紅,
舒緩左皮膚嘅痛楚~
真係平靚正啊!下次一定會回購!

Jellia:

呢支洗面膏我已經用緊第3支啦～
佢有3隻唔同色嘅洗面膏，
分別有黃色、綠色同粉紅色，
3種唔同功能，
當中我最鍾意嘅就係呢支!
呢支有保濕成份，
洗完面好清爽乾淨仲一啲都唔乾!
佢超平$48就有啦 (購自千色店)~
只要少少洗面膏配合右邊個個一陣用就會有好好泡泡啦!
右邊個個潔面網係12蚊店買，
一包有2個，一個可以用好耐超抵!

Karen:

VDL tint bar milk colada (約$60) 購自韓國
VDL算係新進駐香港嘅品牌，
前排去韓國見到VDL就買咗呢支product試試。
貪佢一支兩用，搽咀或者當胭脂都得，
買之前試上手覺得佢淡淡地色好自然，
上面就直頭做到白裡透紅嘅感覺，
想做到化咗妝好似冇化咁就最啱喇！
佢嘅質地就好似lipgloss咁好易handle，
好易印開，亦唔驚會一撻撻。

用嚟搽咀都好OK，
因為我本身唇色好淺，
搽呢個粉紅色都可以好出，
淨係塗喺中間就好易做到漸變效果，
最重要係搽上咀都唔乾。
飲完水都未keep到啲色，
唔會即刻甩晒要再補，唔錯！