韓國mask大比拼

韓風潮流依然高企，
好多韓國護膚品同化妝品牌都紛紛進駐本港，
係香港熱門行街勝地入面，韓牌店舖更加係開到成行成市，
可以話根本唔需要飛到去韓國都可以買到想要既野。

好多韓國護膚品牌都會出好多款唔同既mask，
種類多到真係花多眼亂架！
而今日我就挑選左3款唔同牌子既mask試下o唔ok啦。

Dream Skin 驢奶保濕水凝啫喱面膜

一聽到驢奶兩個字就覺得好新奇，
心唸唔知會唔會有羶味呢？
大家千期唔好以為呢種成份好冷門，
原來驢奶成份近年係韓國都備愛熱捧，
好多韓國朋友都鐘意用架！

而驢奶除左有營養同美顏之外，
佢仲寫住有深層保濕、修護毛孔、亮白、
控油、增加彈性同潤滑肌膚等功能，
簡直好似一塊mask可以滿足你咁多需要咁。

打開包裝既時候就覺得佢既設計好貼心，
面膜分為上、下兩張可以緊貼住面部，
拎塊面膜出黎既時候唔會水滴滴，
個包裝袋入面都無咩精華剩。

佢話敷20﹣30分鐘，
一般呢種質地既mask都可以敷得耐啲無咁易乾，
不過我敷左約15分鐘後張mask就開始乾乾地，
而佢面部剪裁我都覺得好貼，
惟獨佢個鼻位係長方形剪裁，鼻翼位好易彈起唔貼。

我敷完撕左塊面膜落黎之後，
塊面都唔算太濕，
可能我太乾都吸收得好快，
敷完就覺得緊緻效果幾明顯，
仲覺得塊面好滑，
而且敷完即時亮白既效果幾明顯，
不過隔一陣後種亮白感會消失，
保濕效果都有，但未算好驚喜。

滋潤度：★★★☆☆
貼面度：★★★★☆
易乾度：★★★☆☆
面膜質地：水凝啫喱
精華質地：gel狀
容量：30g
氣味：無味
原產地：韓國

TONYMOLY既蝸牛面膜好出名，
我有好多朋友去親韓國都會搬一箱番黎架！
今次就會試埋佢另一系列睇下咩效果啦。

TONYMOLY FLORIA NUTRA﹣ENERGY MASK SHEET

TONYMOLY呢個Floria系列，係以幹細胞同天然草本精華為主要成分，
可以幫助強化肌膚細胞自我更新能力，保濕滋潤，維持肌膚柔軟。
而面膜亦含有摩洛哥堅果油，可以令肌膚高效保濕。

拎左塊而膜出黎之後，
個袋都仲有少少精華，可以夠我搽埋條頸位。
精華質地都幾水狀，感覺會清爽啲。

面膜剪裁尚算貼面，
不過我就嫌佢鼻位偏細，鼻翼位就敷唔到啦。
包裝上寫住可以敷15﹣20分鐘，
但我亦係敷左10分鐘左右塊面膜就開始乾。
撕左塊面膜之後，塊面亦都唔算太濕，
隔一陣可以話係清爽曬！
保濕效果對我黎講都係一般，無咩太大驚喜。
比較適合油性肌膚。
另外，佢有好大陣人工香料味，我就麻麻地….
我建議最多敷5﹣10分鐘就夠啦。

滋潤度：★★☆☆☆
貼面度：★★★☆☆
易乾度：★★★★☆
面膜質地：棉質
精華質地：偏水狀
容量：20g
氣味：人工香料味
原產地：韓國

之前我地都有同大家推介過seatree既唇膏，
可以話又平又質量又好，

買曬一set都唔會太心痛，
絕對係平價之中既好物推介。
不過佢既skin care我自己就未試過啦。
今次我都好期待試下佢既mask。

Seatree steam essence mask sheet

唔知大家有無聽過steam cream（蒸氣霜）?
呢個名詞係香港就比較少聽見，
不過而家係日韓都好流行用佢，
因為日韓地區都比較乾燥，
而steam cream就有好強保濕力。
seatree本身都有出steam cream，
而我今次試呢塊就係含有steam essence既mask。

塊mask既精華好足夠，非常濕潤，
個包裝入面都仲有好多精華，
而入面既精華係奶白色，
有啲似稀身既米漿咁。

睇到下面張相都知塊mask既剪裁確實幾fit我，
非常貼面。
只係我都係嫌佢鼻位偏細，
所以敷唔到鼻翼位(唔知係咪韓國女仔個鼻都係偏細架呢？）

佢寫住可以敷20分鐘，
而我就敷足20分鐘塊mask都未開始乾。
敷完之後塊面都幾濕潤，
之後我都無去洗面，過一陣精華吸收曬又唔會太笠，
打後成晚我都無再搽其他skin care都覺得好夠潤。
佢都有淡淡花香味，但唔算太濃尚可接受。
總括黎講，我都覺得呢款mask係幾有驚喜。
乾性皮膚既朋友就好岩用啦。

滋潤度：★★★★☆
貼面度：★★★★☆
易乾度：★☆☆☆☆
面膜質地：棉質
精華質地：奶白色

容量：20ml
氣味：微微花香味
原產地：韓國

＊溫馨小提示＊
敷paper mask絕對唔係敷得愈耐就愈著數架!
如果覺得塊mask開始乾就要撕落黎，
唔係就會倒吸面上既水份架啦，
所以絕對唔好敷過夜呀！

如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)