阿茂整餅之：綠茶紅荳包（湯種法）手搓版

其實我初頭都唔知係嘜，但諗住開始整麵包唔好研究咁多野住，整到成功左先算啦（hea底性格）。開始整到一兩次之後就想試下整新野，開頭完全唔知「湯種麵包」係嘜黎，咁當然要搞清楚先。搵黎搵去，發覺Christine’s Receipt呢個網站講解得好清楚，由煮法、使用同儲存都勁清楚仲影埋相，咁實無死啦！之後又發現，原來湯種麵包都唔難整，而且好多網上食譜都係會用湯種的，於是我就蚊住衫尾又去試下整 😛 第一個試驗品係上次的玉桂卷，之後就係我想整好耐既綠茶紅荳包！其實我唔太喜歡綠茶味既野，但就好鍾意食紅荳，而兩樣夾埋我又好鍾意，所以就先試呢個 🙂

唔知大家有無用instagram，我就成日用的，update多過facebook好多好多。我係instagram follow左好多日本媽媽，佢地會好得閒好有心機咁整野食，焗蛋糕，面包，便當比小朋友食，其中我見到一張綠茶紅荳包既相，令我回味無窮，當時就cap低左，今次就想試整佢個入面有卷卷形狀卷住D紅荳既面包。點知，一整出黎係勁整齊，外層係白麵包，之後係綠茶，下面夾少少紅荳咁。不過有朋友話咁樣反而靚喎，哈。

今次影左好多好多過程相片～:)

煮湯種係要試的，開頭我煮lone左，唯有倒左去再煮…之後就搓成麵糰，再分兩舊，一舊加綠茶粉、奶粉，另外一舊唔加。

拎去發酵之後，就碌長佢，碌扁佢，碌長佢，碌扁佢，碌長佢，碌扁佢，碌長佢，碌扁佢，碌長佢，碌扁佢～

之後疊埋一齊，上面整一層紅荳，之後卷埋，掐實個收口，收口向下就再發酵，發完就焗。

登登登登！幾靚～！

以下呢個食譜來自leisrecat.com，但佢係整細細隻果D包仔，我就想有白麵包包住綠茶包，所以將綠茶粉同奶粉加落其中一舊度，包出黎就有花紋了。

綠茶紅荳包

材料A
高筋粉237克，綠茶粉3克，快速乾依士5克，鹽3克，砂糖30克 ，奶粉12克

材料B
牛奶100克，湯種* 78克

材料C
無鹽牛油 25克

材料D
蜜紅荳 100克

製作

1. 將A材料混合，加入B材料，當搓至有筋性後加入C材料。

2. 搓至拉出薄膜後，加D材料。放在室溫發酵，大約45-60分鐘 or double size。
3. 第一次發酵完成後，鬆弛大約10分鐘。
4. 整型，每個50g，最後發酵大約45分鐘。（呢到我就無分割了，就咁疊埋卷埋）
5. 放入200度，焗10-15分鐘。（一舊包咁大舊係要焗耐D既，好似我咁成舊就大約30分鐘，應該）

湯種製作(600克份量）
水500克、高筋粉100克
－將水及高粉攪拌均勻
－放在爐上加熱至65度，其間要不停攪動
－當完成後，在麵糊表面貼上一層保鮮膜，降到室溫後使用