阿仔止痕孖寶：片糖水 +Kiehl’s baby cream

天氣乾燥，加上阿仔好鍾意浸浴缸玩水，這星期開始明顯出現皮膚敏感，經常出力搲四肢、肚皮、面和頸，小朋友皮薄肉嫩，搲幾下表皮紅腫起癱，尤其朝早起床更嚴重，見佢一邊搲一邊叫好痕，試過厚敷cream都冇用，結果奶奶一招片糖水幫阿仔立即止痕。

我以為平時阿仔浸浴有加Oilatum沐浴油，抹身後塗Cetaphil保濕乳液，睡前塗按摩油已經足夠，誰知乾燥起來，阿仔的皮膚表面會變得『鞋烚烚』，繼而開始痕……

見他狂搲『肚dum』(近學習褲褲頭)，揭起衫看見表皮開始起紅印和毛孔凸起 (好似起雞皮般)，可以預料到如果繼續搲應該會爆微絲血管甚至破皮，但兩歲幾人仔又點會聽話忍住唔搲丫，就在束手無策之際，奶奶whatsapp 傳來古方─浸片糖水

-用熱水將1.5條片糖溶解 (我試過剩下幾粒未溶，阿仔一邊沖一邊執起食 -_-”)，再倒入BB 浴盆，溝暖水(比正常38度水再涼少少，因為試過38度水令阿仔皮膚更痕)，大約半盆滿。

-任由浸洗一會，期間不斷用盆中片糖水淋手臂、肩膊和後頸，大約10分鐘之後已經完全止痕。
-用花灑沖身，如常洗頭沖涼

用毛巾印乾身之後塗Kiehl’s baby cream ，這cream質地明顯比市面上的bb cream更厚更油潤，塗抹時肌膚需要一段時間才完全吸收，原本夏季時用過覺得太粘太油，甚至阿仔搽面之後出油滋粒，但發現浸過片糖水之後塗這個效果幾好，皮膚回復軟滑，用手指按會覺得似敷mask之後的濕潤感，而且可以維持整晚，阿仔冇身痕睡得甜，我就有覺好瞓。