防曬底妝產品

好多肌膚問題如乾燥、雀斑及其他衰老現象等都會受日曬、紫外線影響，
所以為咗keep住白滑同健康嘅皮膚，防曬功夫365日都要做足架！
知道好多朋友都好懶去搽防曬產品，
其實而家好多底妝產品都有防曬效用，好方便實用，
今次就同大家介紹下唔同品牌有防曬度嘅底妝產品啦。

CLARINS SPF50 UV Plus Anti-Polluiton PA++++ $370/30ml
有粉紅、透明、粉藍三種色調選擇，
保護肌膚同時有修飾作用。
抗污染複合配方加入阿爾卑斯有機變豆菜萃取，
刺激肌膚增加多達70﹪SPRRS蛋白製造，
阻截因紫外線及污染物造成嘅游離基，
另外有多重抗污染修護植物配方由有機哈蜜瓜萃取、
有機黑醋粟芽萃取、白茶萃取、毛足菊萃取組合而成，
加強抗污染物及抗氧化功效，
當中有機黑醋粟芽萃取能舒緩及鎮靜因紫外線及污染物造成嘅過敏，減少泛紅。
有最高嘅UVA防曬級別PA++++，

高效抵禦UVA及UVB，長效保護達10小時。

三種色調分別有唔同效果：
粉紅色適合本身冇乜血色，面青青嘅朋友，
搽咗會有自然紅潤感覺。
粉藍色適合泛紅膚色，有助修飾瑕疵，
透明色適合任何人士用嚟提亮膚色。
質地水潤、薄身，一啲都唔笠，仲有淡淡嘅香味。
我就試咗粉藍色上手比大家睇~

可能大家見到粉藍色調色霜都驚效果太白，
呢款推開後效果自然，唔會特別偏白，
亦改善到泛紅膚色。

ALBLANC Moist White Long Keep Base SPF20 PA++ $340
主要保濕成分有洋甘菊精華、藥蜀葵精華、尤加利精華、透明質酸，
薄片透亮粉體提升肌膚自然光澤感，
防汗、防皮脂，令妝容更持久。

帶粉橙色嘅base，質地好水，
好易推，感覺清爽唔會笠痴痴，
搽咗之後膚色冇咁暗沉，有提亮效果，
色澤亦非常自然。

左：Jill Stuart Relax Aqua Chiffon Protector SPF50+ PA++++ $210/60ml
呢款咁靚嘅花花設計係限量版嚟架，
比以往嘅Aqua Chiffon Protector提高咗防曬度數。
加入乾爽粉體，就算有汗水都能保持舒爽感覺，
美容及水溶性嘅保濕成分有玫瑰蜜、橘子蜜、
薰衣草蜜、水解絲蛋白等，加上乳木果油，
提高滋潤度，面部同身體都適用架。
高防曬配方防禦UVA、UVB，
預防色斑、雀斑及衰老現象。

質地水水地嘅lotion狀，
好易推，感覺水潤，唔笠身，有啲令身效果，
令皮膚好有光澤，而且冇咁暗啞，
仲有陣白花香味。
右：Jill Stuart Airy Tint Watery CC cream SPF30 PA+++ $240/34g
上底妝同時有護膚功效，
粉紅珠光粉體增加肌膚透明感同紅潤感覺，
美容成分有櫻花萃取液、月見草萃取液、透明質酸、
牛油果油、薰衣草油等，
毛孔focus powder有效遮蓋毛孔，
皮脂吸附粉體防汗、防皮脂，令妝容更持久。

質地水潤，感覺幾滑，
用嚟均勻膚色同修飾泛紅，效果唔錯，
有提亮膚色效果，好自然貼薄，唔會有厚重感，

仲有甜甜地嘅香味。

Biotherm White D-Tox CC Cream SPF50+ PA++ $350/30ml
CC Cream能調節膚色，同時修護膚質。
主要成分有亮白活性成分、深海能量因子、
向日葵籽精華、水源再生因子，
海洋水亮複合物配合專利防曬科技Mexoryl，
能均勻膚色，改善膚質，撫平粗糙肌膚，
提供長效保濕效果，令肌膚更有光澤，
SPF50防曬保護，防禦紫外線，
系列有不同顏色選擇，
分別有不同功效，針對不同肌膚問題，
而呢款粉紫色就有均勻膚色功效。

質地cream狀，質感比較rich，幾滑，
感覺潤身啲，但唔會厚重，

推勻後會變爽身，有陣花香味。
搽完睇起嚟白淨啲、滑啲，
但健康膚色未必適合，
可能會令膚色變得較灰白。

ILIA Sheer Vivid Tinted Moisturizer SPF20 $465/50ml
可能大家對ILIA呢個品牌唔係咁認識，
ILIA係有機化妝品牌，全部產品含85%有機認證嘅活性成分，
產品成分採購自有機農夫，
所有產品或成分都不進行動物測試，
全線配方不含麩質或乳製品，減少致敏機會。
而呢款調色面霜有保濕力高嘅透明質酸，
促進肌膚表面微循環，令肌膚更水嫩，
以有機白茶為主要成分，高效抗氧，
舒緩功效嘅草本成分有效鎮靜肌膚。
有機蘆薈能有效保濕之外，仲可以緊緻肌膚。
白茶可助修護肌膚，有機迷迭香精華有助對抗自由基。

有機芝麻油、牛油果油及有機椰子油成分有效滋養及修護肌膚。

質感好水，水潤易推，好似搽緊skincare咁，
好易搽得均勻，效果貼薄，
有少許光澤感，唔會好令，
想均勻膚色，出街睇起嚟精神啲，可以一試，
如果想有更高遮瑕度就要再加遮瑕膏喇。

左：彩豐行Yogurt Hydrating BB Emulsion SPF15 PA+ (Moisturizing #02) $79/30ml
右：彩豐行Yogurt Hydrating BB Emulsion SPF15 PA+ (High Coverage #03) $79/30ml
彩豐行係註明香港製造嘅品牌，價錢比較大眾化，
品牌有各式各樣嘅護膚化妝品，而家BB cream咁流行，又點會少呢。
呢款BB Cream主要成分有透明質酸鈉、甘油。

質地好似啫喱狀咁，#02質地較水，
要慢慢推開推勻，遮瑕度屬一般，
均勻膚色同遮紅印都OK，效果自然。

#03質地相對比較杰身，比#02難推少少，
但妝感唔會覺得好厚，遮瑕度同#02差唔多。

想要防曬保護之外，又想有多啲遮瑕度嘅話，
可以考慮以下嘅Cushion粉底，
同時有防曬保護及修飾肌膚功效，而且效果自然透薄。

Blanc Expert Cushion Compact SPF23 PA++ $290(refill) $100(case)
含松樹萃取物，減淡色素沉澱，
保濕成分有潤膚因子、酯油、甘油，
含高濃度水分及多種油分，重塑水油平衡，
仲有強效去皺嘅腺甘酸，
除咗有撫平修飾肌膚功效之外，仲係有護膚功效嘅粉底。
防曬成分能阻隔UVA及UVB，有助預防色斑及因日曬導致嘅光衰老現象。

輕輕按壓攞嘅份量已經足夠印開面頰位置，
上面時有涼涼地嘅感覺，好舒服，
質感清爽但一啲都唔乾，遮瑕度唔錯，
紅印遮得幾好，雀班都冇咁明顯，效果好自然。

Laneige BB Cushion SPF50+ PA+++ $320/15g (with 1 refill)
升級版嘅BB Cushion用咗獨特技術Cell Trap Technology，
令BB Cream充滿空氣感，
升級版嘅粉末粒子有吸走油脂作用，
而微球粉末可避免底妝變黃情況，令妝容更持久。
另外亦加入咗專利美白技術Melacrusher，
能溶解細胞內嘅色素，減少色素產生，
針對改善黑色素、暗黃、泛紅問題。
有效抵抗污染嘅印楝提取物
可阻隔因外來污染而引致嘅色素沉澱，加強美白效果。
高效保濕成份礦物水含豐富礦物質，

有效撫平紋理，淨化有害物，
比普通礦物水提供超過30%以上嘅水分，
令肌膚更水嫩有光澤，
亦可為肌膚即時降溫4度，保持清爽感覺。
防汗配方有效阻隔汗水及油脂，令妝容更long-lasting。

質地好透薄，令令地好有光澤，
令皮膚睇起嚟水潤啲，一般紅印都遮到，
雀斑亦淡少少，效果自然，仲有微香添。

Holika Holika FACE 2 CHANGE Water Cushion Pump BB SPF 30 PA++$298/15g
以水感按壓橡皮氣墊代替海綿，
含30%Evian礦泉水，有效保濕、去黃，
75%保濕+彈力精華，保水能力高，同時改善紋理。

平時見開嘅BB cushion都係海綿狀，
呢款好特別，粉底係由幾個小洞pump出，感覺新鮮。
質地亦特別水，唔似一般粉底，
感覺好滑，上面後令身有光澤感，好薄身，
但都可以遮到少少紅印，用作均勻膚色就好好喇，
適合本身瑕疵唔多嘅皮膚。

最後比個小tips大家，
藍色、紫色嘅調色霜較適合中至白淨膚色，
而健康膚色嘅朋友可以選擇象牙色，
效果會較自然。
揀調色底霜時要考慮自己嘅膚色，
除咗要睇面嘅膚色，仲要考慮頸嘅膚色架。
如果你頸嘅膚色比面深色，
就要更加小心選擇一啲藍、紫色嘅調色霜，
因為有機會令面頸膚色更大差別，
令面嘅膚色相比下過白。

如果本身膚色深，最好選擇象牙色嘅調色霜。
以後揀調色底霜嘅時候就要留意喇!

如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook