遮瑕問題集

Jan 23 2015

之前我地寫左篇關於碎粉問題既特集，
估唔到反應好好，原來唔少朋友仔都對揀適合自己既化妝品有好多疑問，
有見及此，今次我地就會教大家揀適合自己既遮瑕產品。
平時大家揀遮瑕，可能只係會用死一隻色，
其實眼部同面部色素唔同，膚質都會有唔同，
所以我地要因應返自己既眼部同面部皮膚需要去揀架，
咁先可以做到零瑕疵既肌膚妝容！

有咩瑕疵要遮？

雖然市面上唔少粉底都有一定既遮瑕度，
但係上左粉底之後，其實面上仍然見到有唔少細微瑕疵，
明顯既有黑眼圈、雀斑、暗瘡、墨，
仲有鼻翼、下巴同咀角既暗沉色素，
呢個時候就要用遮瑕去逐一修飾。

平時遮面既遮瑕已經好好，
但用黎遮眼圈就變灰或者出現乾紋，
咁應該點樣去揀遮瑕？

其實面部既遮瑕產品一般滋潤度無咁高，
如果眼周本身有乾紋，用同一隻遮瑕就有可能令到眼部太乾，
所以會建議大家用creamy狀既遮瑕，滋潤啲。

而眼部同面部既色素唔一樣，
正常眼底皮膚比較薄，色素較易浮面，
睇落去都會比面部其他地方暗沉，
用同一隻色既話就會做唔到一個好既遮瑕效果。

所以眼部同面部係應該要分開去遮，
除非皮膚本身好好，唔需要點去遮眼袋眼圈，
唔係就要用兩款唔同質地唔同顏色既遮瑕架喇！

平時如果要遮眼部瑕疵，需唔需要搽左粉底先？

如果單用粉底已經可以完全遮蓋眼圈問題，就當然直接只用濕粉，
相反，如果知道自己單用粉底都唔夠遮住眼圈，
就唔建議用濕粉+遮瑕，反而直接用遮瑕會更好。
因為眼周肌膚比較乾，愈加得多妝愈厚，
搽少一層，令個份量無咁厚，咁就唔會咁易出現乾紋。

市面上有好多唔同種類既遮瑕產品，
應該揀邊隻先最岩自己呢？
以下就會講解幾隻最常見既遮瑕產品，
等大家有左初步認知之後，
先再因應個人需要去揀返岩自己既遮瑕。

遮瑕液

滋潤度：★★★☆☆
遮瑕度：★★☆☆☆
透薄度：★★★★☆
容易度：★★★★★

呢類液狀既遮瑕質地就比較薄身，
水分較高，容易推開，可以中至低度遮瑕，
適合去遮比較淺既色素，例如微絲血管、鼻翼紅印等，
但係要遮比較深色色素（墨、雀斑）就未必遮得晒，
遮瑕液係咁多隻遮瑕入面比較易handle，
因為佢質地透薄自然，但係遮瑕度就略嫌不足。

creamy遮瑕霜

滋潤度：★★★★★
遮瑕度：★★★★★
透薄度：★★☆☆☆
容易度：★☆☆☆☆

creamy質地比液狀厚身，而且較潤，
係咁多種遮瑕產品中最高度遮瑕，
用黎遮深色色素（黑眼圈、色斑、墨）就最好。
但係呢類creamy狀質地厚，要handle得好就比較難，
唔適宜拎太多份量，搽得太厚好易變左「粉樣」，
所以建議配合遮瑕掃，拎適當份量上面。
適合乾性皮膚，油性皮膚就過於滋潤，容易會出現溶妝情況。

遮瑕筆

滋潤度：★☆☆☆☆
遮瑕度：★☆☆☆☆
透薄度：★★★☆☆
容易度：★★★★★

遮瑕筆比人感覺好似木顏色咁，
質地爽身，無咁易甩色，唔厚，

咁多種黎講最容易handle，
不過就屬於淺度遮瑕，
用佢黎遮一啲細微又唔係咁深色既瑕疵，
例如係咀角，或者用黎touch up就好好，好方便。

遮瑕stick

滋潤度：★★★☆☆
遮瑕度：★★★★★
透薄度：★★★☆☆
容易度：★★★☆☆

stick狀遮瑕度同creamy狀一樣高，
適合用於面部深色色素或者暗沉瑕疵（斑、墨），
配合埋遮瑕掃去遮，透薄同遮瑕效果就最好，
但如果直接搽上面，就略嫌有少少厚。
相比起creamy狀，佢既滋潤度就無咁高，
所以唔建議用黎遮眼底、眼周有乾紋位置。

*TIPS*
咁大家可能都會問，咁暗瘡點算呢？

其實我地就唔建議喺暗瘡上面再加添其他化妝品，
不過如果一定要用，就可以揀一啲有消炎成分既產品，
市面亦都有啲消炎成分既遮瑕品，
遮瑕度唔係太高，但就唔會令到粒瘡爆，
太潤或者太乾都會令暗瘡惡化架！

顏色應該點樣揀？

試顏色時應該試上鼻翼兩側位置，
掃上、印開，見到顏色搽左好似無搽咁，
但又遮到瑕疵，就係一個最適合既顏色。

如果遮雀斑或者墨，因為係深色色素，
就應該揀深1-2度色，配合細號遮瑕掃輕輕點上，
就可以完全遮蓋瑕疵。
要留意既係，我地係遮色素，
如果粒墨係突出黎，我地就無可能將佢整平，
只係視覺上遮左個色素架咋。

點樣先知邊種滋潤度岩自己？

平時去專櫃試遮瑕產品，試果時覺得好OK，
但返到屋企又可能覺得「咦？點解好似有啲乾？」
咁係因為平時大家可能只係試落手背，
而無真正試上面或者眼，
如果只係試上手，就可以分別試手背同試手指關節，
因為手背同面部肌膚相近，而手指關節位有好多細紋，
試上去如果覺得都夠滋潤，都遮到細紋，用落眼就一定夠潤。
但係相反，上到手都覺得好似差啲，
唔夠潤又唔夠遮瑕度，上到面就更乾架喇！