觀塘lunch新據點
Dining娜有唔少原先喺港島區返工嘅朋友，近年公司office都搬咗去觀塘，聽佢哋講話一到lunch hour，成班同事就會為咗食乜而熱烈討論，除咗因為區內選擇愈來愈豐富、非常多元化外，更重要係食飯得一粒鐘鬆啲，要避開人潮真係好傷腦筋呢！
平價抵食日菜
Dining娜決定趁lunch time去湊下熱鬧，拉埋幾個朋友去覓食，盪盪下就俾我哋搵到間新開喺高級商廈入面嘅日本餐廳，午市專做日式便當，打開menu有成20款選擇，都幾豐富，包括大滿屋牡丹蝦皇魚生飯、黑松露三文魚腩海膽飯、香蔥托羅蓉親子魚生飯、刺身精選定食同特級壽司定食等，應有盡有，食足一個月都唔覺悶。
睇睇價錢都相當有驚喜，走大眾化路線，由$55至$98不等，難得出品質素較同類餐廳有誠意、有水準，最最最重要嘅係，全場有成250個座位，應該可以滿足區內大批上班族的午餐需求。到咗晚市呢度就會搖身一變成為日式放題店，主打鮮活魚刺身，價格都定得幾親民，回本應該唔難。
驚喜位：價錢親民，仲有250個座位，lunch唔使怕無位。
失望位：菜式選擇較大路，欠缺新鮮感。
大滿屋
地址：觀塘觀塘道414號一亞太中心10樓
電話：3622 1622
高質素工廈餐廳
觀塘社區重建，唔止住宅，就連工廈都在變，入面嘅餐廳、小店都愈見有格調，引嚟唔少區外人專程走入工廈搵食，事實上工廈餐廳可以更放心搞搞新意思，因為有著租金較街舖平、地方亦較大等優勢。該區返工嘅朋友就向Dining娜推介Unique Café & Kitchen，呢度環境好優雅，開放式廚房設計，等大家喺短短1小時lunch time可以好好relax下。
呢度主打精緻西餐，唔少女仔都柯打carbonara或者意大利飯，眼見澳洲和牛漢堡拼薯條、南瓜芝士素菜蝴蝶粉同甘筍意粉配白毛豬火腿亦有唔少捧場客，最後歎番杯特飲或者食番一口cake，感受慢活氣息，話呢度係城市綠洲，絕無誇張。
驚喜位：地方寬敞，裝潢夠特色，食物有水準。
失望位：出菜時間較慢，lunch得1個鐘，食得比較趕。
Unique Café & Kitchen
地址：觀塘巧明街114號迅達工業大廈2樓B室
電話：2126 7279
圖片來源：大滿屋、Unique Café & Kitchen
