要珍惜另一對 夾得埋嘅情侶

女友嘅好朋友，最近開始拍拖，女朋友成日都同我講：「唔知幾時可以一齊去玩呢？你會唔會介意㗎？」

「梗係唔會啦～多啲人熱鬧啲仲好！」我答。

但原來，有另一對情侶參與嘅時候，會有一樣比熱鬧更重要嘅好處⋯⋯

「點呀你？冇事嘛？」

有一日，我收到呢一個WhatsApp。

而嗰一日，係我同女朋友冷戰咗大約兩星期嘅時候，已經灰心到準備分手。

Send呢個Message畀我嘅，就係女友好朋友嘅男朋友，之前冇咩點傾過偈，所以都有啲突然。

原來，佢知道我哋鬧交，好希望可以幫下我。

我將自己啲諗法，感受同佢分享，佢又幫我打聽下女朋友嘅諗法，本來好絕望嘅我慢慢諗通咗，又知道要點做，終於一步一步追番女朋友。

兩對情侶，除咗一齊吃喝玩樂之外，最重要係可以「守望相助」，當鬧交鬧得好勁嘅時間，有人講一句：「唉，算啦，原諒佢啦！我嗰個都係咁啦，嬲一陣好喇！」成件事真係會易解決好多。

冇事就一齊玩，有事就一齊呻。

呢幾日，終於有機會約得成一齊去個短旅行，但呢樣嘢係極為危險，隨時因為行程或者其他小問題，翻面連朋友都冇得做。

而好好彩，我哋四個都有講有笑，就算中途我食錯嘢肚屙成日、就算大家都各自同大家嘅另一半嘈交，旅程都非常美滿。

「期待下次再同你哋去玩～」我哋都互相咁講。

愛情中，搵到另一對夾得埋嘅情侶好重要。

有時二人世界，有時四人遊。

睇住另一對情侶十指緊扣，一齊努力為愛一輩子而努力，都係另一種甜蜜。