處女下海!! 直擊原宿手作潮店BROOKLYN CHARM

收到風來自紐約嘅首飾潮牌「BROOKLYN CHARM」已登陸日本，
喺型人聚腳地原宿嘅Cat Street插旗！
呢間店除左有現成飾物買外，
最大賣點係有2,000多種配件畀客人揀來自製飾物，
「獨一無二」永遠係吸客王道，
我今日都特登去左潮聖ヽ(〃v〃)ﾉ ﾜ～ｲ

去度見到間舖迫滿人，
有男有女有單拖有情侶又有三五成群，
年齡由十幾歳到三十幾歲都有～

呢度有兩層，首先係喺1樓自助餐式揀配件。

2,000幾種配件包括昆虫、貓狗、字母、心心、星星等多款形狀吊飾，
仲有唔同種類嘅天然石、仿珍珠⋯⋯以及用各式物料製成嘅鏈和繩。
配件嘅價位好闊，由￥100～2,000都有，
埋單時遂粒計數（鏈和繩就以10cm作單品結算），
整一條手鏈或頸鏈大概要￥5,000～6,000 / HK$382～459。

由於花多眼亂，所以強烈建議先構思好作品，
諗過度過先好買料，否則手多多執下執下，
好易眼闊荷包窄！

執好配件即可上2樓DIY工房落手！
呢度除左有專業店員教你手作外，
亦提供所有要用嘅工具。

店員會喺你面前親身示範基本技巧，
即使唔識日文都好易理解。

我同店員講今次係處女下海，
問佢：「新手整條鏈要幾耐？」「通常約半個鐘就搞店架喇！」
度準長度、襯好配件、鉗圓鐡圈、諗接駁方法等⋯⋯∑（;￣□￣Ａ ｱｾｱｾ
想整得靚過程要極度集中，整到我眼又矇耳又聾，
手作呢家野真係易學難精！

結果搞左我成2粒幾鐘!!
當時個場景就好似拍戲咁：
啲人一批批輕輕的來，一批批悄悄的走，
我就一碌木咁坐喺角落頭耷耷眼甩甩⋯⋯

雖然製作時間要咁耐係意料之外，
不過成品令我非常滿意!! ♡ﾔｯﾀ━━━ヾ(*≧∀≦*)ﾉ━━━!!!♡
（最後決定唔要兩塊葉）

講真我覺得幾舊水整一條鏈都幾貴～
但呢度啲配件大部分款都好特別，唔係深水埗貨色；
最重要係，可以同Honey或老死齊齊圍威喂開心半日，
舊錢唔止整到心水首飾，同時仲買埋美好回憶，
值得！☆:･ﾟ.*ﾒﾁｬ(´ε｀*人)ｩﾚｼ*.ﾟ･:☆

BROOKLYN CHARM
▶http://www.brooklyncharm.jp
▶東京都渋谷区神宮前4-25-10