萬聖節鬼屋巡禮
我就率先試玩過今年海洋公園哈囉喂，
由於自己唔驚玩鬼屋，所以無咩太大感覺。
而且今年鬼屋少左，感覺無咁熱鬧，
大熱既「彊屍」同「萬壽終醫館」設計比較好，
雖然我自己唔驚，不過同行既男仔女仔都有驚叫，
仲比我見到有個男仔匿左喺女朋友身後！
而「奧斯卡製片廠」都幾創新盞鬼架，
因為鬼屋入面周圍都有夜攝鏡錄低晒大家WE嘩鬼叫驚嚇樣，
仲有得比錢將實錄帶返去同朋友一睇再睇，一定好好笑。
另外今年著重既H14限制級鬼屋，
去前幾日先知要上網報名，一早full晒，所以無得玩，
後來知道係玩昆蟲真係大呼好彩！
如果比$627蚊買快證，我個人就麻麻啦，
原因係太貴，而且感覺每年都差唔多，但又年年加價。
普通票$320玩全日其實ok，但係就要係咁排隊，
可能只可以玩到2-3間鬼屋。
如果不幸仲要遇上打尖既內地客，真係幾火滾！
我自己去玩果日都親身經歷左幾次，唉。
網址:http://halloween.oceanpark.com.hk/tc/
雖然淨係可以report到海洋公園鬼屋玩後感，
不過都介紹埋另一個樂園比大家！
Disneyland既黑色世界一如以往適合大人細路，
鬼屋雖然唔多，但Disney既表演同舞會先係精粹，
我自己就好鍾意去睇，有一眾卡通人物同公主王子演出，
相信大人都會睇到眼都唔眨。
而且，今年仲多左光影匯，即係等同日本果邊既夜光巡遊，
唔知有無朋友仔有睇過呢？宜家香港都有真係太好啦，
呢個真係好值得去睇，好靚架！
佢地有分一日票同夜場票，分別係$450同$340，
如果想玩埋其他機動遊戲就一日票抵玩好多，
況且價錢都唔差得遠。
網址:Disney Halloween
山頂廣場鬼屋FRIGHT DOME，被譽為全美洲最驚嚇鬼屋之一，
宜家首度喺海外開設，進駐香港。
主題分別係「殺人小丑」同「德州電鋸殺人狂」，
仲有4D同喪屍等等，製作認真，
票價依時間分別有$199、$299、$399(快證)。
好想去體驗下外國製作，總係覺得外國鬼恐怖好多！
網址:http://www.frightdomehongkong.com/tc/
而同樣喺山頂既香港杜莎夫人蠟像館，就被改裝成棄置幽暗瘋人院，
要喺伸手不見五指既漆黑走廊搵出口，感覺有啲似逃出game，
不過我相信最恐怖都係沿途既蠟像，諗起舊時有套戲《恐怖蠟像館》，
如果佢地個題材可以套用到一模一樣，驚嚇度應該會大增！
可能係齋玩鬼屋無咁抵，佢地就推出左優惠套票，
以原價$575（網上價$350）包晒蠟像館、山頂纜車來回、
凌霄閣摩天台428同阿甘蝦餐廳套餐，有得玩又有得食。
如果只係想買單一票券，都係網上買最抵，差唔多平一半架！
網址:http://www.madametussauds.com/HongKong/
最後就係位於觀塘既工廈鬼屋Hide n” Seek，
第一個工廈活化既鬼屋，以香港之死為題，貼近民生，
講述香港已死，因住屋、生B無床位等民生問題，
都係香港人共嗚既野為主，真係好有創意！
不過聽到工廈就覺得有啲毛管戙，
可能係本身工廈比人感覺都好陰森，唔知玩落會係點呢？
好搞鬼既係佢地將入場費用稱為帛金，
學生$89，成人$109，同玩逃出價錢差唔多，
創辦人仲話想人走完奈何橋，忘記所有不快事添！
網址:https://www.facebook.com/playground.hs
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup
