為咗可以見一面 唔理車程有幾遠

有好多甜蜜都係因為新鮮，所以幾辛苦都唔緊要。

其中一樣包括係－見對方一面。

初初同女朋友一齊嘅時候，我哋兩個住得好遠。

仲記得頭幾次拍拖嗰陣係冬天，仲要係喺全年最凍嗰幾日。

當時為咗見佢，我可以一早六點幾就起身，冒住寒風，坐個幾鐘巴士去佢度。

唔係一個月一次，而係日日都去，準時過返工。

去到佢屋企其實都冇咩嘢做，佢煮早餐同午餐畀我食，一齊睇戲就一日。

好平凡，但只要見到對方就已經滿足。

拍拖會去佢樓下接佢，食完飯會送佢，為嘅只係可以見多陣，唔會覺得攰，唔會覺得眼瞓。

「去拍拖啦，唔好上堂啦！自己睇番Notes咪得囉！」女朋友本來係一個好學生，但同我一齊之後成日畀我叫佢走堂。戀愛大過天，讀書都要放埋一邊。

一齊得愈耐，見面當然愈嚟愈唔寶貴，尢其一齊住嘅時候，更加唔會再有接佢同送佢。

有時甚至會覺得日日都對住呢個人，真係好悶⋯⋯鬧交嘅時候，更加唔想再留喺同一個空間。

「我今日遲少少返，唔想咁早返嚟同你鬧交。」

從前嘅浪漫，一定係回不去了，往事只能回味。

每個階段都要搵出最舒服嘅相處方式，女朋友係會永遠追求浪漫，但如果佢見到我太攰、聽日要好早返工，都唔會堅持叫我送佢返屋企；禮物間中送下就夠，因為要儲錢結婚；一齊住係有好多問題，但慢慢一齊捱過去。

點解咁多問題都要喺埋一齊？除咗因為係小問題之外，就係一諗到有日會以後都見唔到對方，就會寧願「一齊面對問題」好過「分咗手就乜事都解決晒」。

「新鮮感」係緊要，但「兩個人一齊走過好多日子」更加重要。