努力維繫感情 最需要嘅係⋯

每一對情侶都一定具備，或曾經具備我以下將會講嘅嗰種元素。

如果你可以保持到，或者重新搵得番，包你感情會再突飛猛進。

事緣係我同女朋友行過一間CD舖，間舖播緊一首好舊嘅情侶合唱歌，不停Loop呢隻歌。

當時我同女朋友都冇咩反應，但隔咗一陣，行行下，神奇嘅事發生！我同女朋友不自覺哼起隻歌，仲一人一句咁跟住合唱⋯⋯唱完之後，兩個人互望傻笑，仲十指緊扣。

你可能會問，有咩咁特別？唱下歌啫！

特別在於，嗰排我哋好少講嘢，唔係好有心機拍拖，出街循例食餐飯就返屋企，拍拖已經係可有可無⋯⋯而嗰刻我哋竟然咁低能，好似中學雞拍拖咁一路行街一路唱歌一路笑，衰啲講句，有少少迴光反照咁。

拍拖嘅甜蜜，會隨住年紀愈大，變得愈難感受到。

因為工作壓力，因為份人變得「認真」，所以攰到連低能吓嘅時間都冇，嘢都唔想講，放工後早啲瞓好過。

又因為人愈大，需要愈現實，兩個人成日討論買樓，計劃將來，令大家不知不覺間，覺得拍拖只剩低「實際需要」，一句甜言蜜語重要啲，定一幢樓重要啲？唔使問啦！

但回想當初，拍拖嘅意義在於咩？就係有個人願意陪你做一啲其他人唔會陪你做，傾一啲其他人冇興趣聽嘅嘢，就算幾悶，幾無聊，佢都覺得有趣。

你嘅世界，即刻覺得有個人可以一齊分享。

不過，唔知幾時開始，兩個人愈嚟愈封閉，笑都有少少勉強⋯⋯

維繫感情嘅方法，就係大家要記住，無論拍幾耐拖，無論兩個人幾多歲，都要拋開面子嘅枷鎖，繼續畀對方見到你最低能嘅一面。

因為，拍拖就係要低能。

兩個笑下笑下，好快就白頭到老。