最真實最痛苦 見家長經歷

但對我嚟講，劇情略為激烈咗少少，我見家長嘅經驗比較現實，但同樣好痛苦。

廿幾歲，書都未讀完，見到女朋友嘅屋企人，真係擔心又緊張。

一見到伯母，我已經送上禮物、熱情地打招呼：「Auntie ，你好！小小心意！」

但佢只係「哦」咗一聲，冇望我一眼。

然後都係叫下餸先，當然由世伯伯母渣主意，跟住就開始入正題⋯⋯

世伯：「係呢，你屋企有咩人？」

我：「我同埋我媽媽，爸爸十年前度離咗婚，而家冇再聯絡。」

世伯：「哦。」

輪到伯母：「咁你畢業打算做咩？」

我：「應該會做吓啲Freelance，寫吓嘢先。」

世伯伯母當然唔會話：｢好呀！後生仔做啲自己鍾意嘅嘢好吖，我哋同我個女都全力支持你㗎！」

而只係問我：「Freelance？咁收入好唔穩定㗎，好難計劃將來咁喎？」

我：「我會盡力，希望可以維持到應有嘅收入。」

對答嘅過程，我嘢都唔太敢食，畢竟見家長嘅目的都唔係為咗食嘢。世伯伯母嘅擔憂我好理解，唔會覺得佢哋勢利或者睇唔起我⋯⋯因為Freelance寫作，根本係一場未知嘅冒險。

跟住落嚟，你以為會有好激烈、好戲劇性嘅對話？

完全冇。

我唔太主動講嘢，而世伯伯母都冇咩嘢再問。

沉寂嘅氣氛，反而令我亂諗好多嘢：佢哋係咪覺得我玩玩吓唔使同我傾太多？佢哋係咪覺得我唔係一個好人選？佢哋之後會同女朋友講啲咩？

愈諗我成個人愈呆，對答都好生硬，一個幾鐘嘅過程，就係咁就過咗。

我寧願好似TVB咁一路食一路講膠嘢，都好過大家只係想快啲食完餐飯。

女朋友同屋企人一齊番去，我當晚一個人喺街行咗好耐，覺得自己好多地方可以做好啲，對答可以有自信啲。

見家長痛苦，係因為你見到自己嘅不足。

面對將來，當年嘅我完全唔知前路會點，而到咗幾年後嘅今日，仍然都係未知數。

以前我都會有一絲覺得，幸福唔計較錢，有錢都未必幸福。
當然而家都會咁諗，但愈貼近現實，你就知道，有錢先有穩定嘅生活。

而一個男人最重要最基本，就係令對方過住穩定生活。

或者，到某時候，要向現實低頭，面對失敗，放棄夢想。

稱之為「男人嘅讓步」。