拍拖嘅呢個階段 比熱戀更幸福

大部份人定義，熱戀期係拍拖嘅頭幾個月。

所以對於拍拖幾年嘅我哋，當然離開熱戀已經好遠好好遠。

之不過，有時候我哋又會有熱戀嘅感覺，甚至比一開始更加鍾意對方。

好多人覺得熱戀係最美好嘅階段，其實不！等我話畀你聽，愛情最美好嘅時候，究竟係幾時⋯⋯

點解大部份女仔覺得熱戀係最好，係因為對方會訓身、搏盡、仆倒咁去為妳付出。妳一話肚餓，帶妳去邊度邊度食好嘢；妳一話病，即刻好緊張咁隔幾秒就問妳有冇事⋯⋯熱戀期，幾咁珍惜妳。

而大部男仔，點解熱戀會咁對女朋友咁好，除咗新鮮感外，當然係因為怕失去。啱啱先得到手，梗係要好好咁呵護佢，正如你買咗部新電話，都好小心咁用，驚佢跌落地。

但用耐咗，跌頭一次都好心痛，不過之後點跌都唔緊要了，你可能以為愛情都一樣，段感情淡咗，所以點唔珍惜都冇所謂，對方同自己一啲都唔在乎。

熱戀過後，愛情都漸漸失去。

錯了！

當個個人都沉醉熱戀，其實好傷身，你諗下，幾十年嘅感情，得幾個月嘅熱戀期，成日都去懷緬、成日都去在意，係幾咁辛苦、幾咁唔化算嘅一件事？

然後你又會覺得而家而家有幾差，愈諗就愈灰，愈灰就愈覺得唔想再愛落去。

不如試下唔好再著眼熱戀，而係著眼當下，發掘下而家嘅優點。

係，而家見到對方唔會再心動；但會有種安穩嘅感覺。

係，而家兩個人開始冇乜話題，但有時唔使講都了解對方。

係，而家鬧交係好激氣，但甜蜜嘅時候會比以前更加實在。

「熱戀」同「白頭到老」係好多人嘅幸福指標，一頭一尾，愛情美好嘅階段。但最長時間嘅係兩者中間嘅過程，大家不停去磨合，不停去學習，不停跌完又起番身。

呢段努力一步一步向前嘅過程，甚至比熱戀時付出更多，係愛情中值得欣賞嘅階段。

熱戀過了，又有乜所謂。