腿，從此不怕累
高踭鞋的確造福了貪靚的女人，著起佢，雙腿變得修長，同時提升女人味，即使明知不能走得遠，不能企得耐，雙腳活受罪，但愛靚的死命都會著住佢周圍走。不過我想講，著鞋底太薄的平底鞋，行得耐，雙腳一樣受壓，超累！
近日同仔仔岀入都著ballerina這類鞋底很薄的平底鞋，有時仔仔扭抱，抱住佢行得耐，小腿一樣又痠又累，返到屋企以熱水浸腳，感覺作用不大，我右腳關節位一向有爆微絲血管，似乎因近日行得太多路，爆得勁咗，情況咁危急，必需找方法救亡，否則演變成靜脈曲張，青筋浮起曝現就後悔莫及了。
恰好，近幾天在公仔箱見娜姐show長腿，賣紓緩足貼，二話不說跑落街買盒來試用，現分享我的用後感。
一盒18塊分3個密封包裝，莎莎賣＄64.9，平均每塊約＄3.6，不過我唔會一次用晒6塊，用唔晒的記住放番入袋封住佢，免得成份被抽乾。
質地一邊如棉布質感，另一邊如具黐力的啫喱貼，跟撒隆巴斯的鎮痛貼相似，不過啫喱部份較厚身，黐力較溫和舒適 。
一雙腿我主要貼在小腿及腳踝，感覺冰涼舒服，我沖完涼臨瞓前貼上，薄荷冰涼感好似從每個毛孔慢慢滲入咁，涼足成個鐘，好爽！第二朝瞓醒，腳部疲勞真係覺得紓緩咗，容易撕，撕走後皮膚亦不留印或不起紅。
當中混合薰衣草、鼠尾草、迷迭香、檸檬及柑橘，五種草本香味，但我身邊那位人兄問我咩事成晚搽住藥油瞓覺，哈哈哈。
下頁有使用小貼士!
小貼士：
- 貼時忌一次過撕開貼，建議先撕開一半貼在皮膚上，之後才一邊貼一邊撕走餘下部份，咁樣就可避免起摺或氣泡，原理跟貼手機屏幕貼一樣。
- 貼在腳踝上，我覺得唔使咁大塊，不妨對摺後剪開兩塊用，咁就可以慳番塊，唔使咁浪費。
- 最好沖完涼，皮膚乾爽乾淨時用，貼上的皮膚忌濕，或不宜搽潤膚霜，否則會影響黏力。
- 想提升冰涼感，又唔怕凍，不妨用前先放雪櫃雪半小時。
- 除咗啱經常著高踭鞋的女士用，其實平時經常企得耐，及運動後的腿部痠軟，無分男女，都一樣啱用。
- 各位女士們若準備外遊血併，狂行三千，不妨帶定幾塊旁身，快靚正紓緩腳部疲勞，翌日可以再戰。
冷敷可紓緩腳部疲勞，我仲聽取我家老人言，勤用喜療妥按摩小腿，我的做法是針對攰的肌肉及爆微絲血管的部份，以打圈方式搓揉按摩數分鐘，有助紓緩腳部不適、促進血液循環回復正常、可起預防作用，避免靜脈曲張。
